ބަންގްލަދޭޝްގެ ރައްޔިތުން ރާއްޖޭގައި ވިޔަފާރި ކުރަމުން ގެންދަނީ ދިވެހިންގެ ނަމުގައެވެ. ރާއްޖޭގެ ރަށްރަށުން ރަށުކައުންސިލްތަކުން ، ބިދޭސީންނަކަށް ދަނޑުބިމެއް ދުލެއް ނުކުރެއެވެ. ދަނޑުބިން ދޫކުރަނީ ދިވެއްސަކަށެވެ. އެ ދަނޑުބިން ބަންގްލަދޭޝް މީހުންނަށް ކުއްޔަށްދެނީ ދިވެއްސެކެވެ. މިމައްސަލަޔަކީ ވަކިރަށަކަށް ޚާއްޞަ ކަމެއްނޫނެވެ. ދަނޑުބިން އޮންނަ ކޮންމެ ރަށެއްގައިވެސް މިމައްސަލަ އެބައޮތެވެ. ދަނޑުގޮވާމަށް މަޝްހޫރު ، ކާށިދޫ ، ތޮއްޑޫ ، ލ. ގަމާއި ފޮނަދޫ ، ބ. ގޮއިދޫ ފަދަ ރަށްރަށުގެ ދަނޑުތައްހުރީ ބަންގްލަދޭޝް މީހުންނަށް ކުއްޔަށް ދެވިފައެވެ. ކައުންސިލުން ކުއްޔެއް ނުނަގާއިރު ، ނުއަގުގައި ވިއްކާފައެވެ. ދަނޑުވެރިކަންކުރާ ކުދި ރަށްތަކުގައިވެސް މިކަން އޮންނަނީ މިގޮތަށެވެ. މިހުރިހާ ރަށެއްގައިވެސް ތިބެނީ ދަނޑުގެ ވެރިންނާއި ދަނޑުވެރިންނެވެ. ދަނޑުގެ ވެރިންނަކީ ، ކައުންސިލުން ބިންދޫކުރާ ދިވެއްސަކަށް ވާއިރު ، ދަނޑުވެރިންނަކީ ބަންގްލަދޭޝް މީހުންނެވެ.
ދަނޑުގައި ހައްދާ އެއްޗެއް ، އެއެއްޗެއް ހައްދަން ޖަހާ ބޭހުގެ ގިނަމަދުމިނެއް ، އެއްޗެއް ވިއްކާ އަގަކާއި ތަނެއް ، އަދި ހައްދާ ވަރެއް ، އެއްޗެއް ވިއްކައިގެން ލިބޭ ފައިސާއަށްވާގޮތެއް ދަނޑުވެރިޔަކަށް ، ނުވަތަ ދިވެއްސަކަށް ނޭނގެއެވެ. އިންސާނުން ކާން ކަމުނުދާވަރަށް ބޭސްޖަހއިގެން ހެއްދިޔަސް ، ރަށުގައި ހައްދާ ބާވަތްތަކާއި ހައްދާ މިންވަރެއް ، ޚުދު ކައުންސިލްތަކަކަށްވެސް ނޭނގެއެވެ. ދަނޑުހައްދަން ޖަހާ ބޭހުގެ މަޢުލޫމާތާއި ހައްދާ ތަކެތީގެ ހިސާބު ބެލެހެއްޓުމަކީ ، ކައުންސިލްތަކުން ކުރަންޖެހޭ ކަމެކެވެ. އެތަކެތި ރަށުން ބޭރުވާ ޢަދަދަކީވެސް ކައުންސިލްތަކުން ބަލަހައްޓަން ޖެހޭނެ އެއްޗެކެވެ. އެހެންނަމަވެސް ، ކައުންސިލްތަކުން އެކަމެއް ނުކުރެއެވެ. އެންމެ ދެރަވެގެން ، ދަނޑުވެރިކަންކުރަން ރަށުގައި އުޅޭ ބިދޭސީންގެ ޢަދަދުވެސް ، އަދި އެއީ ޤަވާޢިދާ ޚިލާފަށް އުޅޭ ބައެއްކަން ނުވަތަ ނޫންކަންވެސް ގިނަ ކައުންސިލް ތަކަކަށް ނޭނގެއެވެ.
މާލެފިޔަވައި ، ބިދޭސީން ހައްދާ ދަނޑުވެރިކަމުގެ ބާވަތްތައް ވިއްކަން ރާއްޖޭގައި އުފެދިފައި އޮންނަ އެންމެ ބޮޑު މާރުކޭޓަކީ ، ހދ. ކުޅުދުއްފުށީގައި ކޮންމެ ހަފުތާއަކު އޮންނަ " ހޮނިހިރު މާރުކޭޓް " އެވެ. ތިލަދުންމަތީ ދެބުރިއާއި ށަވިޔަނި އަތޮޅުގައި ބިދޭސީން ހައްދާ ދަނޑުވެރިކަމުގެ ބާވަތްތައް ވިއްކަން ގެންނަނީ " ހޮނިހިރު މާރުކޭޓް " އަށެވެ. އެ މާރުކޭޓަށް އެއްޗެތި ވިއްކުމަށްފަހު ، ބަންގްލަދޭޝް މީހާ ދެންޖެހިލަނީ މާރުކޭޓުގެ އިރުމަތިން އޮންނަ އެރަށުގެ ބަނދަރު މަގަށެވެ. އުތުރުން ތަންކޮޅަކަށްގޮސް އެވަންނަނީ ކަންމަތީ ހުންނަ ސައި ހޮޓަލަކަށެވެ. ރަނގަޅަށް ބަނޑުބޮޑުވަންދެން ސައި ބޯލުމަށްފަހު ދެން ބައްދަލު ކުރަނީ އެތަނުގައި ކައްކަން އުޅޭ ބަންގްލަދޭޝް މީހަކާއެވެ. އެދުވަހު ގެނައި ތަކެތި ވިއްކާފަ ލިބުނު ފައިސާ ޙަވާލުކުރަނީ އޭނާއާއެވެ. އެފައިސާއަކީ އެދުވަހުން އެދުވަހަށް ބަންގްލަދޭޝްއަށް ޓްރާންސްފަރ ކުރެވޭ ފައިސާއެކެވެ. ފޯން އެޕެއް ބޭނުންކޮށްގެންނެވެ. އެއީ ބޭންކް މެދުވެރިކޮށް ޓްރާންސްފަރ ކުރެވޭ ފައިސާއެއްނޫނެވެ. ޓްރާންސްފަރ ކޮށްދެނީ ވަރަށް ކުޑަ ފީއަކަށެވެ. ދުވަހުން ދުވަހަށް އެފައިސާ އެލިބެނީ ބަންގްލަދޭޝްގައި ހުންނަމީހަކަށް ، އެގައުމުގެ ފައިސާ ، ޓާކާ އިންނެވެ. މި ނެޓްވޯކަކީ ، މުޅިރާއްޖޭގައި ޤާނޫނާ ޚިލާފަށް ފައިސާގެ މުޢާމަލާތުން ޖަރީމާ ހިންގާ ނެޓްވޯކެކެވެ. ދަނޑުވެރިކަންކުރާ މީހުންނޫނަސް ، ބަންގްލަދޭޝްގެ ވަރަށްގިނަ މީހުން ، އެކިގޮތްގޮތުން އެމީހުންހޯދާ ފައިސާ ބޭރަށް ފޮނުވުމަށް މިނެޓްވޯކް ބޭނުން ކުރެއެވެ. މިއީ އެންމެންނަށް އެނގޭ ބޮޑު ސިއްރެކެވެ.
ކުޅުދުއްފުށީ އަތިރިމަތީގައި ، ބަހާދަރާއި ސިކަންދަރަށް ދޫނުކުރާވަރުގެ ، މާލެދަތުރުކުރާ ބޮޑު ބޯޓެއް ބަންނަން ފަށައި ހުއްޓިފައި އެބަހުއްޓެވެ. އެބޯޓުހުރީ ނިމުމަކާ ގާތްވެފައެވެ. މަނީލޯންޑަރ ކުރާ ދެމީހަކު ރާއްޖެއިން ފޮނުވައިލިތަނުން ހުއްޓިފައެވެ. އެއީ ދިވެއްސަކާ އިނދެގެން އުޅޭ ، ބަންގްލަދޭޝްގެ ފިރިހެނަކު ބަންނަ ބޯޓެކެވެ. އޭނާގެ ސައި ހޮޓަލެއް ކުޅުދުއްފުށީގައި އެބަހުއްޓެވެ.
މާލޭގެ ރެސްޓޯރެންޓާއި ސައިހޮޓާތަކުން ، ބިދޭސީންގެ ނުފޫޒު ނުފޯރާ ހުންނަނީ މަދު ތަނެކެވެ. ތަރުކާރީއާއި ބޭސްވިއްކާ ފިހާރަތަކުން ، ބިދޭސީންގެ ނުފޫޒު ނުވަދެ އޮންނަނީ މަދު ތަނެކެވެ. ތަރުކާރީއާއި މޭވާ ، ރިސޯޓްތަކަށް ސަޕްލައި ކުރުމުގައި ބަންގްލަދޭޝް މީހުންނާއި އިންޑިއާ މީހުން އެބަ އުޅެއެވެ. އެ ވިޔަފާރިތައް ރަޖިސްޓަރީ ކުރެވިފައި ހުންނަނީ ދިވެހިންގެ ނަމުގައެވެ. ދިގުމުއްދަތަށް ކުއްޔަށް ނަގައިގެން ގެދޮރު ޢިމާރާތް ކުރަމުން އެބަގެންދެއެވެ. ގުދަނާއި އެޕާޓްމަންޓްވެސް ބިދޭސީން ކުއްޔަށް ދެމުން އެބަގެންދެއެވެ. ގެސްޓްހައުސްތައް ހިންގަމުން އެބަގެންދެއެވެ. އެންމެފަހުން ކަންނެލި އޮޑިފަހަރާއި މަސްއޮޑިފަހަރަށްވެސް ، މާލެދަތުރުކުރާ ބޯޓުފަހަރަށްވެސް ބިދޭސީން އަރައިފިއެވެ. ފެރީ ދޯނިފަހަރުގެ މާލިމީންނަށްވެސް ބިދޭސީން ވެއްޖެއެވެ. މިހުންނަނީ ބޮޑެތިކަންތަކެވެ.
މިއީ މި ޤައުމުގެ އިޤްތިޞާދުގައި ޙަރަކާތްތެރިވުމުގެ ފުރުޞަތު ދިވެހިންނަށް ގެއްލޭ ނުރައްކާތެރި ޙާލަތެކެވެ. މިޙާލަތު އުފައްދަނީ ދިވެހިން އަމިއްލަޔަށެވެ. ރާއްޖޭގެ އިޤްތިޞާދުގެ ތެރެޔަށް ވަނުމަށް ބިދޭސީންނަށް ފުރުޞަތުދެނީ ދިވެހިންނެވެ. މިއީ ، ސަރުކާރަށް އެކަނި ޙައްލުކުރެވޭނެ ކަމެއްނޫނެވެ. ފަރުދީ ޒިންމާ އަދާކުރާ ޖީލެއް ބިނާކުރެވިގެން ނޫނީ މިކަން ޙައްލެއް ނުކުރެވޭނެއެވެ.
އިޤްތިޞާދު ކުރިއަރައި ، ޤައުމެއް ތަރައްޤީވެދާއިރު ، އެޤައުމެއްގައި މަސައްކަތްތެރިން ނެތްނަމަ ، ބިދޭސީން ގެނައުމަކީ ނުވަތަ ބިދޭސީން އައުމަކީ މައްސަލައެއް ނޫނެވެ. އެއީ އިޤްތިޞާދީ ފައިދާއެކެވެ. އެހެންނަމަވެސް ، ނަހަމަ ގޮތްގޮތުން ، ޤާނޫނާއި ޤަވާޢިދާ ޚިލާފަށް މަސައްކަތް ކުރުމަށް ފުރުޞަތު ހުޅުވިގެންދާނަމަ އެއީ ވަރަށް ބޮޑުއަދި ނުރައްކާތެރި ގެއްލުމެކެވެ. ޚާއްޞަކޮށް ، އެ ފުރުޞަތު ހުޅުވައިދެނީ ދިވެހިން އަމިއްލަޔަށްކަމުގައި ވާނަމަ ، އެއީ އަދި ވަކިން ބޮޑު ނުރައްކަލެކެވެ. އެކަމުން ސަލާމަތްވުމަކީ އެކަށީގެންނުވާވަރުގެ ކަމަކަށް ވާވަރުގެ ނުރައްކަލެކެވެ. މިހާރުވެސް ޤައުމުގެ ޙާލަތު މިއޮތީ އެހާ ހިސާބަށް ގޮއްސައެވެ.
ދިވެހިންގެ ވަޠަނާއި ޤައުމާ ، ބިމާއި ކަނޑު އަދި އަމިއްލަ ނަފުސު ރައްކާތެރިކުރުމަކީ ދިވެހިންގެ ފަރުދީ ވާޖިބެކެވެ. އެކަން ކޮށްދޭކަށް އެހެންބަޔަކު ނާންނާނެއެވެ. ދިވެހިން ބިކަވެ ، ހަލާކުގެތެރެޔަށް ވަދެގެންދާއިރު ، ހޭލާކަށް ނުވޭތޯއެވެ ؟
ތިކަން ހުއްޓިދާނެ މިހާރުވެސް ހުރިހާ ކައުންސިލްތަކުން ތިފަދަ ތަންތަން ބަލައި ފާރަލައި ހުއްދަތައް ބާޠިލް ކޮށްލީމަ!