ހެޔޮ ކަމުގެ މަގުގައި ހިނގާ މީހަކަށް ވަރަށް ގިނަ ހުރަސްތައް ގިރާ ކުރަން ޖެހެއެވެ. މިއީ ދުނިޔޭގެ ކަންތައްތައް ހިނގާ ގޮތާމެދު ވިސްނާލި ކޮންމެ މީހަކަށް އެނގޭނޭ ޙަޤީޤަތެކެވެ. ޝައިޠާނާ ރެޔާ ދުވާލު މަސައްކަތް ކުރަމުން ދަނީ އިންސާނުން މަގު ފުރައްދާށެވެ.
އާދަމް ޢަލައިހިއްސަލާމް ހައްދަވައި ފުރާނަ އެޅުއްވުމަށް ފަހު ﷲ އެންމެހައި މަލާއިކަތުންނަށް އެންގެވީ އެކަލޭގެފާނަށް ސަޖިދަ ޖައްސަވާށެވެ. އިބިލީހަކީ މަލާއިކަތެއް ނޫނެވެ. އެހެން ނަމަވެސް މި އަމުރުފުޅު އޭނާއަށްވެސް ކުރެއްވުނެވެ. ބޮޑާ ކަމާއި ކިބުރުވެރިކަމާއެކު އޭނާ ދެކޮޅު ހެދީއެވެ. އޭނާގެ ހިތަށް އެ ވަގުތު ވަދެގެން ދިޔައީ މި ޒަމާނުގެ މުޖުތަމަޢުތަކުން މި ފެންނަ ނަސްލީ އިމްތިޔާޒެވެ. އޭނާ ދެކޮޅު ހެދީ އޭނާއަކީ އަލިފާނުން ހެއްދެވި މަޚްލޫޤަކަށް ވީތީ މަށިން ނުވަތަ ވެލިން ހެއްދެވި މަޚްލޫޤަކަށް ސަޖިދަ ނުޖަހާން ވެގެންނެވެ. އަމުރުފުޅު އައީ ތިމާ ހެއްދެވި ފަރާތުން ކަމެއް އޭނާގެ ބޮލަކަށް ނުވަނެވެ.
އެ ދުވަހު ﷲ ގެ އަމުރުފުޅާ ދެކޮޅު ހެދުމަށް ފަހު އޭނާ އެދުނީ ޤިޔާމަތާ ހަމައަށް އޭނާ ދިރި ދުނިޔޭގައި ބެހެއްޓުވަމަށެވެ. އަދި ﷲ ގެ އަޅުތަކުން މަގު ފުރައްދަން މަސައްކަތް ކުރާނޭ ކަމަށްވެސް އޭނާ ދެންނެވިއެވެ. ﷲ އޭނާގެ އެދުން ފުއްދަވައި ދެއްވިއެވެ.
އެ ދުވަހުން ފެށިގެން ހެވާއި ނުބައިގެ ހަނގުރާމަ ފެށުނީއެވެ. ﷲ ވަނީ އިންސާނާއަށް ސިކުނޑި ދެއްވައި އޭނާ ބޭނުން މަގަކުން ހިނގުމުގެ އިޚްތިޔާރު ދެއްވައިފައެވެ. އޭނާ ބޭނުން ވަނީ އިބިލީހުގެ ގޮވައިލުމަށް އިޖާބާދީ އެ މަގުން ދާން ކަމަށް ވާނަމަ ދާންވީއެވެ. އެކަމަކު އެހެން ހެދުމާއެކު އޭނާ ﷲ ގެ ރަޙްމަތުން ބޭރުވީއެވެ. އިބިލީހާ އެކީގައި އޭނާ ދައްކާ މަގަކުން ދާން ބޭނުން ހިސާބަކަށް ދާންވީއެވެ.
އެކަމަކު އެ މަގުން ހިނގަ ހިނގާ ހުރެފައި އޭނާގެ ހިތަށް ބިރުވެރިކަން ނުވަތަ އީމާންކަން ވަދެގެން އެނބުރި ﷲ ގެ މަގު ޚިޔާރު ކުރުމާއެކު އިބިލީހުގެ ބާރު ކެނޑުނީއެވެ. އޭނާއަށް ފުރަގަސް ދީގެން ﷲ ގެ ރަޙްމަތަށް އެދިގެން ދަތުރު ކުރާ މީހަކަށް އޭނާ ކުރާނޭ އެއްވެސް ކަމެއް ނޯންނާނެއެވެ. އާދައިގެ ބަހުރުވައިން ދަންނަވާނަމަ އޭނާއަށް ޖެހޭނީ ހަމަ ހަޅޭއް ލަވަލަވައި ހުންނާށެވެ. އޭނާއަށް ފުރަގަސް ދިން މީހާ ގޮސް ﷲ ގެ ރަޙްމަތަށް ވަންނަ މަންޒަރު ބަލަން ހުރުން ނޫން ގޮތެއް އޭނާއަކަށް ނޯންނާނެއެވެ.
ވުމާއެކު އަޅުގަނޑުމެންނަށް މި އޮތީ ދެ މަގެއް ފެންނާށެވެ. ދެ މަގުން ކުރެ ޚިޔާރު ކުރާނޭ މަގެއް ކަނޑައެޅުން އޮތީ އަޅުގަނޑުމެންގެ އަތްމަތީގައެވެ. އިބިލާހާއެކު ދާން ބޭނުންވާ މީހަކަށް އޭނާޔާއެކު ދެވިދާނެއެވެ. އެހެން ނަމަވެސް އެހެން ހަދައިފި މީހަކަށް ﷲ ގެ ރަޙްމަތެއް ނޯންނާނެއެވެ. ރަޙްމަތަށް އެދޭ މީހާ ﷲ ގެ ޙަޟްރަތަށް އެނބުރިގަންނާށެވެ. އެހެން ހަދައިފި ނަމަ އިބިލީހަކަށް ކުރެވޭނޭ އެއްވެސް ކަމެއް ނޯންނާނެއެވެ.
