ޕޯސްޓްމޯޓަމް ހެދުމަށް ނިޝާމާ މުހައްމަދުގެ ހަށިގަނޑު ރާއްޖެއިން ބޭރަށް ފޮނުވައިފި އެވެ.
އޭނާގެ ހަށިގަނޑު ޕޯސްޓްމޯޓަމް ހެދުމަށް އިންޑިއާ އަށް ފޮނުވާފައި މިވަނީ ނިޝާމާ މަރުވިތާ 11 ދުވަސް ފަހުން ނެވެ.
ޕޯސްޓްމޯޓަމް ހަދަން ނުފޮނުވި ދިގުލައިގެން ދާތީ އާއިލާއިން ކަންބޮޑުވުން ފާޅުކޮށްފައިވާއިރު، އެ އާއިލާއިން ވަނީ ޕޯސްޓްމޯޓަމް ހެދުމާ ދެކޮޅު ވެސް ހަދާފަ އެވެ.
ނިޝާމާ މަރުވެފައި އޮއްވާ ފެނުނީ ހދ. ނޮޅިވަރަމްގައި މި މަހުގެ 10 ވަނަ ދުވަހު އެވެ.
ކޮޓަރި ތެރޭގައި މަރުވެފައި އޮއްވާ ފެނުނު އުމުރުން 29 އަހަރުގެ ނިޝާމާގެ މަރުގެ ތުހުމަތު ކުރަނީ އޭނާގެ ފިރިމީހާ އަބޫބަރު ފައިސަލަށެވެ. އެކަން ތަހުގީގުކުރަން އޭނާ ފުލުހުންގެ ބަންދުގައި ބަހައްޓާފައި ހުއްޓާ ދަންޖެހުމުން، ފަރުވާ ދެމުންދަނިކޮށް މިދިޔަ ހޯމަ ދުވަހު ވަނީ މަރުވެފަ އެވެ.
އެ އާއިލާއިން ބޭނުން ނުވި ނަމަވެސް އެއީ ޝައްކު ކުރެވޭ މަރަކަށް ވުމުން ފުލުހުން ބޭނުން ނަމަ ޕޯސްޓްމޯޓަމް ހެދޭނެ އެވެ.
ދިވެހިންގެ ޕޯސްޓްމޯޓަމް ހަދަނީ އިންޑިއާ އަށް ފޮނުވައިގެން ނެވެ. މި އަހަރު އެކަނި ވެސް ތިން މީހެއްގެ ހަށިގަނޑު ފޮނުވައިގެން ޕޯސްޓްމޯޓަމް ވަނީ ހަދައިފަ އެވެ.
