ގައުމު މިވަގުތު ގޮސްފައިވާ މިވާ ޙާލަތުން އަރައިގަތުމަށް ރައީސް އަބްދުﷲ ޔާމީންއަށް ނަސްރު ލިބިވަޑައިގަންނަވާނެ ކަމަށް ހައުސިންގ މިނިސްޓަރ ޑރ މުޙަންމަދު މުއިއްޒު މިރޭ ވިދާޅާވެއްޖެއެވެ.
ޑރ މުއިއްޒު ކުރެއްވި ޓްވީޓެއްގައި ވިދާޅުވީ ހައްގަށް ނަސްރު ލިބޭނެ ކަމަށާއި، އިސްލާމް ދީނާއި ގައުމުގެ ހައްގުގައި ރައީސް ޔާމީން ކުރައްވަމުން ގެންދަވާ އިޚްލާސްތެރި ހިތްވަރުގަދަ މަސައްކަތް ރައްޔިތުންގެ ފުރިހަމަ ބައިވެރިވުމާއެކު ކާމިޔާބު ވާނެ ކަމަށެވެ.
ސުޕްރީމް ކޯޓުން މިރޭ ނެރުނު އަމުރު ތަކާއި ގުޅިގެން އިދިކޮޅު ފަރާތްތަކުން މަގުމައްޗަށް ނުކުމެ އުފާ ފާޅު ކުރަމުންދާއިރު ސަރުކާރުގެ ފަރާތުން ބުނެފައި ވަނީ ކޯޓު ޙުކުމްތައް ތަންފީޒު ކުރުމަށް ސަރުކާރުން މަސައްކަތް ކުރަމުން އަންނަ ކަމަށެވެ. އިދިކޮޅު ސަޕޯޓަރުންގެ އެއްވުންތަކަށް ފުލުހުން ވަނީ ކަރުނަގޭސް ޖަހައިގެން ރޫޅާވެސް ލާފައެވެ.
