ރައްޔިތުންގެ މަޖިލީހުގެ ބާރަ މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން ނިންމާފައި ވިޔަސް އެ މެމްބަރުންގެ ގޮނޑި ނުގެއްލޭ ކަމަށް ސުޕްރީމް ކޯޓުން މިރޭ ޙުކުމް ކޮށްފިއެވެ.
ސުޕްރީމް ކޯޓުގެ ޙުކުމުގައި ބުނެފައި ވަނީ މެމްބަރުން ޕާޓީ ބަދަލު ކުރުމުން ގޮނޑި ގެއްލޭނެ ކަމަށް ކުރިން އެ ކޯޓުން ކޮށްފައިވާ ޙުކުމް ބާތިލް ކޮށްފައިވާ ކަމަށާއި އެގޮތަށް ނިންމީ އެކަމާބެހޭ ގާނޫނެއްވެސް ހެދިފައި އަދި ނެތުމުން ކަމަށެވެ.
މެމްބަރުންގެ ގޮނޑި ނުގެއްލޭ ކަމަށް ސުޕްރީމް ކޯޓުން ޙުކުމް ކުރިއިރު ސިޔާސީ ހުރިހާ ލީޑަރުން މިނިވަން ކުރަންވެސް ސުޕްރީމް ކޯޓުން މިރޭ ވަނީ ޙުކުމް ކޮށްފައެވެ.
ސުޕްރީމް ކޯޓުން މިރޭ ކުރި ޙުކުމްގައި ވަނީ ކުރީގެ ރައީސް މުޙަންމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމް އާއި އަދާލަތު ޕާޓީގެ ރައީސް ޝައިޚް އިމްރާން އަބްދުﷲ އާއި ކުރީގެ ނައިބު ރައީސް އަޙްމަދު އަދީބާއި ކުރީގެ ޑިފެންސް މިނިސްޓަރު ކާނަލް މުޙަންމަދު ނާޒިމް އާއި ކުރީގެ ޕީޖީ މުހްތާޒް މުޙްސިން އާއި ދިއްގަރު ދާއިރާގެ މެމްބަރު ފާރިޝް މައުމޫންގެ އިތުރުން ޖަލަށް ލާފައިވާ ގާޒީ ނިހާން އާއި ވިޔަފާރިވެރިޔާ ޙާމިދު އިސްމާއީލް މިނިވަން ކުރަން ވަނީ ޙުކުމް ކޮށްފައެވެ.
މީގެތެރެއިން ބަޔެއް ބޭފުޅުންނަކީ ދިގު މުއްދަތަށް ޖަލަށް ލާފައިވާ ބޭފުޅުންނެވެ. ބަޔެއް ލީޑަރުން މިވަގުތު ތިއްބެވީ ރާއްޖެއިން ބޭރުގައެވެ.
