ހދ. ނާވައިދޫ ފެނުގެ ނިޒާމް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު މިއަދު އިފްތިތާހު ކޮށްދެއްވައިފި އެވެ.
މި މަޝްރޫއު އިފްތިތާހުކޮށްދެއްވީ އެކަމަށްޓަކައި އެރަށުގައި މިއަދު ބޭއްވި ޚާއްސަ ރަސްމިއްޔާތެއްގަ އެވެ.
ރައީސް ސާލިހު ބޮޑުތިލަދުން މައްޗަށް މިއަދު ފެއްޓެވި ދަތުރުފުޅުގައި އެންމެފުރަތަމަ މަންޒިލަކަށް ވަޑައިގެންނެވީ ވެސް އެރަށަށެވެ.
މިއަދުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ މި ސަރުކާރުގެ ވިސްނުމަކީ އެއްވެސް ރަށެއް ބާކީ ނުކުރުން ކަމަށެވެ. އަދި މިއީ އޭގެ މިސާލެއް ކަމަށެވެ.
އެގޮތުން އެ ރަށުގެ ފެނުގެ ނިޒާމު ގާއިމް ކޮށްފައިވާ ކަމަށާއި ގިނަ ކަންތައްތަކެއް ކުރުމަށް ނިންމާފައިވާ ކަން ރައީސް ސާލިހު ވަނީ ފާހަގަ ކުރައްވާފަ އެވެ.
އެގޮތުން ފުޓުބޯޅަ ދަނޑުގައި ޓާފް އެޅުމާއި ރަށްގިރާ މައްސަލައަށް ހައްލު ގެނައުމާއި ސިއްހީ މަރުކަޒު އަޕްގްރޭޑް ކުރުމާއި ބަނދަރު ބޮޑުކުރުން ވަނީ ފާހަގަ ކުރައްވާފަ އެވެ.
ނައިވާދޫ ފެނުގެ ނިޒާމު ގާއިމުކޮށްފައިވަނީ ސާސީ ކޮންސްޓްރަކްޝަން ޕްރައިވެޓް ލިމިޓެޑާއި ހަވާލު ކޮށްގެންނެވެ. އޮކްޓޫބަރު 2019 ގައި ފެށުނު އެ މަސައްކަތް އެ ކުންފުނިން ނިންމީ މިދިޔަ ޖޫން މަހުގަ އެވެ. އެ ޕްރޮޖެކްޓްގެ އަގަކީ 15,398,304.77 ރުފިޔާ އެވެ.
އެ މަސައްކަތުގެ ދަށުން ދުވާލަކު 40 ޓަނުގެ ފެން އުފައްދާ އާރްއޯ ދެ ޕްލާންޓާއި 4.5 ކިލޯ މީޓަރުގެ ފެނުގެ ނިޒާމުގެ ވިއުގައެއް އެޅުމާއި ފެން ރައްކާކުރުމަށް 185 ޓަނުގެ ދެ ތާންގީ އަދި ވާރޭފެން ރައްކާ ކުރުމަށް 150 ޓަނުގެ ތާންގީއެއް ވަނީ ބަހައްޓާފަ އެވެ.
އެ މަސައްކަތް ނިމުނުން ނާވައިދޫގެ 174 ގެއަކަށް ފެނުގެ ކަނެކްޝަން ވަނީ ގުޅައިދީފަ އެވެ.
