ރާއްޖެ ޓްރާންސްޕޯޓު ލިންކް (އާރުޓީއެލް) ގެ ޚިދުމަތަށް 65 ހައި ސްޕީޑް ފެރީ ބަނުމަށް އަލްޝާލީ މޯލްޑިވްސް ޕްރައިވެޓް ލިމިޓެޑާއި ހަވާލުކޮށްފިއެވެ.
މި އެއްބަސްވުމުގައި އެމްޓީސީސީގެ ފަރާތުން ސޮއެ ކުރެއްވީ ސީއީއޯ އާދަމް އާޒިމްއެވެ. އަލްޝާލީ މެރިންގެ ފަރާތުން ސޮއިކުރެއްވީ ކުންފުނީގެ ޗެއަރމަން އަބްދުﷲ ހުސައިން މުހައްމަދު އަލް ޝާލީއެވެ.
މިއީ މި މަޝްރޫއުގެ ދެވަނަ ފިޔަވަހީގެ ޚިދުމަތަށް ބޭނުން ކުރުމަށް ބަންނަ ފެރީތަކެވެ.
ސަރުކާރުގެ މުހިއްމު އެއް ސިޔާސަތުގެ ތެރޭގައި ހިމެނޭ ރާއްޖޭގެ ހުރިހާ ރަށެއް ހައި ސްޕީޑު ފެރީ ނިޒާމަކުން ގުޅާލުމަށް ހިންގާ މި މަޝްރޫޢަށް ދައުލަތުގެ ބަޖެޓުން 536 މިލިއަން ރުފިޔާ ޚަރަދުކުރުމަށް ވަނީ ނިންމާފައެވެ.
މި މަޝްރޫޢުގެ ފުރަތަމަ ފިޔަވަހީގެ ދަށުން 50 މީހުންގެ ޖާގައިގެ 17 ފެރީ ބަނދެފައިވާއިރު، މިފެރީތައް މިހާރު ޒޯން އެކެއްގައި ހިމެނޭ ހއ.އަތޮޅާއި ހދ.އަތޮޅާއި އަދި ށ.އަތޮޅުގައި އަންނަނީ ޚިދުމަތް ދެމުންނެވެ.
އެމްޓީސީސީން އަންނީ ޒޯން ދޭއް އަދި ތިނެއްގައި ހިމެނޭ އަތޮޅުތަކުގައި ޤާއިމުކުރަންޖެހޭ ފެރީ ސްޓޮޕްތައް ތަރައްޤީކުރުމުގެ މަސައްކަތްކުރަމުންނެވެ.
