ލަގްޒަރީ ޕްރައިވެޓް ޕަސިންޖަރުން އުފުލުމަށް ރާއްޖޭގައި ބައިނަލްއަގުވާމީ އެއަރލައިނެއް އުފެއްދުމުގެ މަސައްކަތް ފަށާފައިވާކަމަށް ޚަބަރުތައް ފެތުރެން ފަށައިފިއެވެ.
ރާއްޖޭގެ އޮންލައިން ނޫހެއް ކަމަށްވާ "މި" ނޫހުގައި ބުނެފައިވަނީ ބޭރު ބަޔަކާއި ގުޅިގެން ރާއްޖޭގައި ބައިނަލްއަގްވާމީ އެއަރލައިނެއް އުފެއްދުމުގެ މަސައްކަތް ކުރަމުން އަންނަކަމަށެވެ.
އެ ނޫހުގައި ބުނެފައިވާ ގޮތުގައި ލަގްޒަރީ ޕްރައިވެޓް ޕަސިންޖަރުން އުފުލައިދިނުމުގެ ޚިދުމަތް އެ އެއަރލައިނުން ފެށިނަމަވެސް އަގުތައް ބޮޑެއް ނުވާނެއެވެ.
ދުބާއީ ކުންފުންޏަކާ ގުޅިގެން މި އެއަރލައިން ފަށަން ތައްޔާރުވަނީ ރާއްޖޭގައި ރިސޯޓް ހިންގާ އަދި ސަޕްލައި މުދާ ވިއްކާ ދިވެހި ބޮޑު ކުންފުންޏަކުންކަމަށް އެ ނޫހުގައި ބުނެފައިވީނަމަވެސް އެއީ ކޮން ކުންފުންޏެއްކަން ހާމަކޮށްފައެއް ނުވެއެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި “މެގަ މޯލްޑިވްސް” ގެ ނަމުގައި އެއަރލައިނެއްގެ ޚިދުމަތް ފަށާ، ގިނަބައެއްގެ މަގުބޫލުކަން ހޯދިނަމަވެސް އެ އެއަރލައިން ވަނީ މިހާރު ހުއްޓާލާފައެވެ.
ރާއްޖޭގައި މިހާރު އޮޕަރޭޓް ކުރަމުން އަންނަނީ މޯލްޑިވިއަން، ވިލާ އެއަރ، މަންޓާ އަދި ޓީއެމްއޭ އެވެ.
