ހުޅުމާލެ ކުނިކަހާ ސާފުކުރާނެ މީހުން ވޭސްޓް މެނޭޖްމެންޓް ކޯޕަރޭޝަން (ވެމްކޯ) އިން ހޯދަން އިޢުލާންކޮށްފިއެވެ.
ވެމްކޯ އިން ކުރި އިޢުލާނެއްގައި ބުނެފައިވަނީ ހުޅުމާލެ ކަހާ ސާފު ކުރުމުގެ މަސައްކަތަށް 50 މީހުން ބޭނުންވާ ކަމަށާއި އެ ވަޒީފާއަށް ބޭނުންވަނީ މަސައްކަތަށް ޝައުގުވެރިކަން ހުރި ގާބިލު މީހުން ކަމަށެވެ.
އެ މަގާމަށް ހޮވޭ މީހުންނަށް 8،000 ރުފިޔާގެ މުސާރައެއް ލިބޭނެ ކަމަށް ވެސް ވެމްކޯ އިން ބުންޏެވެ.
ވަޒީފާއަށް ކުރިމަތިލާ ފަރާތްތަކުގެ ތެރެއިން ބަލައިގަންނާނީ ފުރަތަމަ ހުށަހަޅާ 100 ފޯމު ކަމަށާއި މަގާމަށް އެދި ހުށައަޅާ ފޯމް އަދި ލިޔެކިޔުންތައް ބަލައިގަންނާނީ މއ. ޖަންބުގަސްދޮށުގެ ދެވަނަ ފަންގިފިލާއިން ކަމަށް ވެސް ބުންޏެވެ.
ވެމްކޯ އިން ބުނީ ފޯމު ބަލައިގަންނާނީ ހެނދުނު 9:00 އިން މެންދުރު 1:00 ހަމައަށް އަންނަ މަހުގެ ނުވަ ވަނަ ދުވަހާ ހަމައަށް ކަމަށެވެ. އަދި މީހުން ނެގުމުގައި އެ ދާއިރާއިން ލިބިފައިވާ ތަޖުރިބާއަށް ބަލާނެ ކަމަށެވެ.
މީގެ އިތުރުން ވެމްކޯގެ މަސައްކަތްތައް ކުރިއަށްގެންދިއުމާ ގުޅުންހުރި ގާނޫނުތަކާއި ގަވާއިދުތަކަށް އަހުލުވެރިވެފައިވާ މިންވަރު ބެލުމާއި އިންޓަވިއުކުރުމަށް ވެސް ވަނީ ހަމަޖެހިފައިވާ ކަމަށް ވެމްކޯ އިން ބުނެއެވެ.
މި ވަޒީފާއަށް މީހުން ހޯދަން އިޢުލާނުކޮށްފައި މިވަނީ ހުޅުމާލޭގެ އާންމު ސަރަހައްދުތައް ކުނިކަހާ ސާފުކުރުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވެމްކޯއާ ހަވާލުކުމުންނެވެ.
މާލެ އާއި ވިލިމާލެ އަދި ހުޅުމާލޭގެ ކުނީގެ ކަންތައް ވެމްކޯ އިން ބަލަހައްޓަމުން އަންނައިރު، ކުނި ކެހުމާއި ގޭގެއިން ކުނި އުކާލުމުގެ ޚިދުމަތް ވެސް އެ ކުންފުނިން ދެއެވެ.
