ދިރާގުގައި ޗީފް ޓެކްނޮލޮޖީ އެންޑް އިންފޮމޭޝަން އޮފިސަރުގެ މަގާމު އުފައްދާ ބޭފުޅަކު ހަމަޖައްސައިފިއެވެ.
ޗީފް ޓެކްނޮލޮޖީ އެންޑް އިންފޮމޭޝަން އޮފިސަރު (ސީޓީއޯ)ގެ މަގާމަށް ހަމަޖައްސާފައިވަނީ މުހައްމަދު މުސާދެވެ. އަދި އެ މަގާމަށް މުސާދު އައްޔަންކުރީ މިމަހުގެ 19 ވަނަ ދުވަހު ބޭއްވި ބޯޑު ބައްދަލުވުމުގައި ކަމަށެވެ.
ސީޓީއޯ ރިޕޯޓުކުރަން ޖެހޭނީ ކުންފުނީގެ ސީއީއޯ އަދި މެނޭޖިން ޑިރެކްޓަރަކަށް ކަމަށާއި މަގާމުގެ މަސްއޫލިއްޔަތުތަކުގެ ތެރޭގައި އިންފޮމޭޝަން ގަވަނަންސްއާ ބެހޭ ސްޓްރެޓެޖީތަކާއި ޕޮލިސީތައް އެކުލަވާލުމާއި އިންފޮމޭޝަން ސިސްޓަމްތައް މެނޭޖުކުރުން ހިމެނޭ ކަމަށް ދިރާގުން ބުނެއެވެ. އަދި ސައިބަރ ސެކިއުރިޓީ ގުޅުންހުރި މަސައްކަތްތަކާއި ޑިޖިޓަލް ޓްރާންސްފޮމޭޝަން މަސައްކަތް ވެސް ހިމެނޭ ކަމަށް ބުންޏެވެ.
ދިރާގުން ބުނީ މުސާދު ސީޓީއޯގެ މަސްއޫލިއްޔަތުތަކާ މުސާދު ހަވާލުވެވަޑައިގަންނަވާނީ އަންނަ މެއި މަހުގެ އެއްވަނަ ދުވަހު ކަމަށެވެ.
ސީޓީއޯގެ މަގާމަށް އައްޔަންކުރުމުގެ ކުރިން މުސާދު ދިރާގުގެ ޑިޖިޓަލް ޓްރާންސްފޮމޭޝަން ޑިރެކްޓަރުގެ މަގާމުގައި ހުންނެވި މުސާދަކީ ޓެލެކޮމް ދާއިރާގައި 23 އަހަރަށް ވުރެ ގިނަ އަހަރުގެ ތަޖުރިބާ ލިބިވަޑައިގެން ހުންނެވި ޗާޓަޑް އިންޖިނިއަރެކެވެ.
އޮސްޓްރޭލިއާ، އިނގިރޭސިވިލާތް އަދި ނިއު ޒީލެންޑުން އޭނާ މަތީ ތައުލީމު ހާސިލުކުރެއްވި މުސާދު ވަނީ އޮސްޓްރޭލިއަން އިންސްޓިޓިއުޓް އޮފް ބިޒްނަސް އިން އެމްބީއޭ ހާސިލްކުރައްވާފައެވެ. އަދި އޭނާ ވަނީ އިނގިރޭސިވިލާތުގެ ޔުނިވަރސިޓީ އޮފް ހަލްއިން ވަނީ ބެޗެލަރ އޮފް އިންޖިނިއަރިންގ އިން މޮބައިލް ޓެލެކޮމިއުނިކޭޝަންސް ޓެކްނޮލޮޖީ ވެސް ހާސިލުކުރައްވާފައެވެ.
މީގެ އިތުރުން ނިއު ޒީލެންޑުގެ ވިކްޓޯރިއާ ޔުނިވަރސިޓީ އޮފް ވެލިންގްޓަން އިން މާސްޓަރ އޮފް ކޮމަރސް އިން އިންފޮމޭޝަން ސިސްޓަމްސް ވެސް މުސާދު ވަނީ ހާސިލުކުރައްވާފައެވެ.
