އަލަށް އިސްލާމްދީން ގަބޫލުކުރެއްވި ބޭފުޅަކުކަމުގައިވާ، ޢަބްދުލްމާލިކު ލިބްލަންކް އޭނާ ލިޔުއްވި ލުއިފޮތެއްކަމުގައިވާ، އަހަރެން އިސްލާމްވުމަށް މަގުދެއްކީ ބައިބަލްއެވެ. މި ނަންކިޔުނު ފޮތުގައި ލިޔުއްވާފައި ވެއެވެ. އަހަރެން ކްރިސްޓިޔަނެއްގެގޮތުގައިހުރި ދުވަސްވަރު، އަހަރެމެން ތަބާވަމުންދިޔަ ބައިބަލްގެ އެއްފޮތް އަނެއްފޮތާ ތަފާތު އެތައް ނުސްޚާތަކެއް ދުށީމުއެވެ. އޭގެތެރެއިން އެއް ވާޝަންކަމަށްވާ "ތެސަލޯނިއަން" ބައިބަލްގެ 5:17 ގައި "މެދުނުކެޑި އަޅުކަމުގައި ދެމިހުރުން" މިސުރުޚީގެ ދަށުގައި ލިޔެފައިވާ ޢިބާރާތްތައް އަހަރެންގެ ސިކުނޑީގައި ކޮށަމުން ދިޔައެވެ. މެދުނުކެނޑި އަޅުކަމުގައި ދެމިހުންނާނެ ގޮތެއް ބަޔާންކޮށްފައި ނެތުމާއެކު، ކްރިސްޓިއަނަކު މެދުނުކެނޑި އަޅުކަމުގައި ދެމިހުންނާނީ ކިހިނެއްތޯ އަހަރެންގެ އަމިއްލަ ނަފުސާ ސުވާލުކުރަމުން ގެންދިޔައީމުއެވެ.
އަހަރެން ދުށީ މިކަން ކާމިޔާބުވާނީ، މީހާގެ ޢަމަލުތައް ރަނގަޅުވުމާއެކު، އަބަދާއި އަބަދު ކަލާނގެ ހަނދުމަކުރުންމަތީ ދެމިހުރުމުންކަމަށެވެ. އެހެނަސް އެއީ ކުރުން ފަސޭހަނޫން، މުސްތަޙީލު ކަމެއް ކަމުގައި މެނުވީ އަހަރެންނަކަށް ނުފެނުނެވެ. ވީމާ އަހަރެން އެކަމާމެދު އަބަދުވެސް ވިސްނައި ފިކުރުކުރަމުން ގެންދިޔައީމުއެވެ.
އަދިވެސް އޭނާ ލިޔުއްވާފައިވެއެވެ. 1987 ވަނައަހަރު އަހަރެންނަށް އިސްލާމްދީނުގެ ތެދުމަގު ފެނުމާއެކު، އަލަށް ތަޢާރުފުވި ދިރިއުޅުމުގެ ގޮތާމެދުގައި އަހަރެން ހުއްޓުމެއްނެތި މުޠާލަޢާކޮށް ދިރާސާކުރަމުން ގެންދިޔައީމުއެވެ. އެހިސާބުން އަހަރެންނަށް ޔަޤީންވީ އެއްކައުވަންތަ اللَّهُއަށް އީމާންވެ، އިސްލާމްދީނުގައި އަންގަވާފައިވާގޮތަށް ފުރިހަމައަށް ތަބާވުމަކީ، މެދުނުކެޑި އަޅުކަމުގައި ދެމިހުރުން ކަށަވަރުކޮށްދޭ ކަމެއް ކަމުގައެވެ. އަދި އެއީ، އެ ކަމަށް اللَّهُ އާއި އެކަލާނގެ ރަސޫލާ صَلَّى اللَّهُ عَلَيهِ وَسَلَّمَ އިރްޝާދުދެއްވައި، މަގުދައްކަވާފައިވާ ކަމެއްކަމުގައެވެ. އެކަން ފުރިހަމަވުންވަނީ، މުސްލިމަކު ކުރާ ކޮންމެކަމެއް އޭނާކުރަނީ، އިސްލާމް ދީނުގައި އަންގަވާފައިވާގޮތަށް، އަދި ހަމައެކަނި اللَّهُގެ ރުހިވޮޑިގަތުން އެދިގެން ކަމަށްވާނަމައެވެ.
މުސްލިމެއްގެ ނިދުމާއި، ނިދިންހޭލުމާއި، ފާޚާނާއަށްވަނުމާއި، ނުކުތުމާއި، ލޯގަނޑުން ބެލުމާއި، އަންނައުނުލުމާއި، ކެއުންބުއިމާއި، ގެއިންނުކުތުމާއި، ގެއަށްވަނުމާއި، މަގުހިނގުމާއި، މީހުންނާ ވާހަކަދައްކައި މުޢާމަލާކުރުމާއި، ބަލިމީހުންނާއި އެހެން މީސްމީހުންނަށް ޒިޔާރަތްކުރުމާއި، ދެމަފިރިކަމުގެ ގުޅުންހިންގުމާއި، މިހެންގޮސް މީހެއްގެ ދިރިއުޅުމާ ގުޅުންހުރި ކޮންމެކަމެއްގައި ޢަލުކުރާނެ ގޮތް އިސްލާމްދީނުގައި އަންގަވާފައި ވުމާއެކު، ދީނުގައި އަންގަވާފައިވާގޮތަށް ތިމާގެ ޢަމަލުތައް ސީދާކުރާނަމަ، އެފަދަ ދިރިއުޅުމަކީ މެދުނުކެނޑި އަޅުކަމުގައި ދެމިހުރެވޭނެ ކަމެއްކަންވަނީ އިސްލާމްދީނުގައި ކަށަވަރުކޮށްދެއްވާފައެވެ.
