މަގުމަތީގައި އާންމުން ކުނިތައް ބަހައްޓަނީ ވެމްކޯގެ ޚިދުމަތްތައް ހުންނަ ގޮތުން ޢާންމުންނަށް ދަތިވުމުން ކަމަށް މާލޭ ސިޓީގެ މޭޔަރ ޑރ. މުޙައްމަދު މުއިއްޒު ވިދާޅުވެއްޖެއެވެ.
މޭޔަރ ވިދާޅުވީ މާލޭގެ އެކި ގެތަކުން ހަލާކުވެފައި ހުރި ސޯފާތަކާއި ފަރުނީޗަރު ފަދަ ތަކެތި ބަހައްޓާފައި ހުންނަކަން ފާހަގަވާ ކަމަށެވެ. އަދި އެކަން އެހެންވަނީ އެ ކޯޕަރޭޝަނުން (ވެމްކޯ) ދޭ ޚިދުމަތްތަކުގެ އަގުތައް ބޮޑުވުމުން ކަމަށް ވެސް މޭޔަރ ވިދާޅުވިއެވެ.
"ނަމަވެސް މިފަދަ އެއްވެސް ސަބަބަކާ ހެދި މަގުމަތީގައި މިފަދައިން ކުނިބުނި ބެހެއްޓުން ހުއްދައެއް ނޫން. މަގުތައް ސާފުތާހިރުކޮށް ބޭއްވުމަކީ އެންމެންގެ ފަރާތުން އެންމެނަށް ކޮށްދޭ ކަމެއްގެ ގޮތުގައި ދެކެންވާނެ." މުއިއްޒު ވިދާޅުވިއެވެ.
މާލޭ މަގުމަތީގައި ހުންނަ ކުނި ނުނަގާތީ ބައެއް އާންމުން ކަންބޮޑުވުން ފާޅުކުރަމުން އަންނަ މި ދުވަސްވަރު މާލޭ ސިޓީ މޭޔަރ ވިދާޅުވީ މާލޭގެ މަގުމައްޗަށް ނެރޭ ހުރިހާ ކުންޏަކީ ކައުންސިލުން އުކާލަން ޖެހޭނެ ތަކެތި ކަމަށް ދެކި، އެ ތަކެތި މަގުމައްޗަށް ނެރުމަކީ ރަނގަޅު ގޮތެއް ނޫން ކަމަށެވެ.
އެހެންނަމަވެސް ކައުންސިލްގެ ގާބިލްކަން ހުރި މިންވަރަކުން މަގުމަތީގައި ހުންނަ ކުނިބުނި ނަގައި، މާލޭގެ މަގުތައް ސާފުކުރުމުގެ މަސައްކަތް ކުރަމުންދާނެ ކަމުގެ ޔަގީންކަން މޭޔަރ ވަނީ ދެއްވާފައެވެ.
ކުނި އަޅާނެ އެއްޗެއް މަގުމަތީ ބެހެއްޓުމުން އެއަށް އަޅާދޭނަން. ކުނި ބަލާ އެއްގޮތަކަށްވެސް ގެއަށް ވަދެގެންނުވާނެ. ސިއްހީގޮތުން ރައްކާތެރި ކަމަކަށްނުވާތީ ދުނިޔޭގެ އެއްވެސް ގައުމެއްގައި ކުނިނަގާމީހުން ގެއަށް ވައްދާ ގޮތަށް ހަޖެހިފައި ނޮއޮވޭ.