އަލަށް ހެދުނު ބްރޭކަރާއިއެކު ޖުމްލަ 323 ސްޕީޑް ބްރޭކަރު ގެ ދަވާދު އާކޮށް 103 ރޭމްޕް ވަނީ ހެދިފައި ކަމަށް މާލޭ ސިޓީ ކައުންސިލުން ބުނެފިއެވެ.
އެކަން މާލޭ ސިޓީ ކައުންސިލުން ހާމަކުރީ އެ ކައުންސިލުގެ ޢާންމު ޚިދުމަތްތަކާއިބެހޭ މަސައްކަތްތަކާއި ހަވާލުވެ ހުންނެވި ކައުންސިލަރު އާދަމް ރަމީޒް ކުރެއްވި ޓްވީޓެއްގައެވެ.
އެ ޓްވީޓުގައި އޭނާ ވިދާޅުވީ ސްޕީޑް ބްރޭކަރުތަކުގައި ދަވާދު އާކުރުމުގެ މަސައްކަތުގެ ތެރެއިން އަލަށް ހެދުނު ސްޕީޑް ބްރޭކަރު ހިމަނައިގެން 323 ސްޕީޑް ބްރޭކަރުގައި ދަވާދު އާކޮށް ނިމިފައިވާ ކަމަށެވެ.
ޚާއްސަ އެހީއަށް ބޭނުންވާ ފަރާތްތަކަށް ރޭމްޕް ހެދުމުގެ މަސައްކަތްތައް ވެސް ކުރެވެމުން އަންނަކަމަށް މާލޭ ސިޓީ ކައުންސިލުން ވަނީ ބުނެފައެވެ.
އެގޮތުން އެ ކައުންސިލުގެ ހަތަރުވަނަ ދައުރު ފެށުނުފަހުން މިހައިތަނަށް މުޅިން އަލަށް 103 ރޭމްޕް ހަދާފައިވާ ކަމަށް ވެސް ސިޓީ ކައުންސިލުން ބުނެފައިވެއެވެ.
މިއީ ބުރަ މަސައްކަތްތަކެއް ނަމަވެސް މުވައްޒަފުންގެ ހިތްވަރާއި އެކު ރޯދައިގެ ކުރިން މިކަން ނިންމާލެވުމަކީ ލިބުނު ވަރަށްބޮޑު ހިތްހަމަ ޖެހުމެއްކަމަށް އާދަމް ރަމީޒް ވިދާޅުވިއެވެ.
