ހިޔާ ފްލެޓްތަކުގެ ފިނިޝިންގ މަސައްކަތް ނިންމައިދޭން ފައިސާ ނަގާ މަސައްކަތް ނުނިންމި ކުންފުނިތަކުގެ މައްސަލައަށް ބަހުސްކުރަން ފާހެއްނުވިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް އިދިކޮޅު ޕީއެންސީގެ ޕީޖީ ލީޑަރު، މަޑުއްވަރީ ދާއިރާގެ މަޖިލިސް މެންބަރު އާދަމް ޝަރީފް މި މައްސަލަ ހުށަހެޅުއްވުމުން މި މައްސަލައަށް މަޖިލިސް ތަޅުމުގައި ބަހުސްކުރަން ފެނޭތޯ ވަނީ ވޯޓަށް އައްސަވާފައެވެ.
މި ވޯޓުގައި އެ މައްސަލައަށް ބަހުސްކުރަން ފެންނަކަމަށް އެންމެ ހަ މެންބަރުން ވޯޓު ދެއްވިއިރު، ބަހުސް ކުރަން ނުފެންނަ ކަމަށް 29 މެންބަރުން ވަނީ ވޯޓު ދެއްވާފައެވެ. ބަހުސްކުރަން ފާސްކުރަން ބޭނުންވަނީ 18 ވޯޓެވެ.
މިއަދުގެ ޖަލްސާގައި ތިއްބެވި 41 މެންބަރުންނެވެ.
މެމްބަރު އާދަމް ޝަރީފް ވިދާޅުވީ ކުރީގެ ރައީސް ޔާމީންގެ ވެރިކަމުގައި ފެއްޓެވި، ބޯހިޔާވަހިކަމުގެ މަޝްރޫއުގެ ދަށުން އިމާރާތް ކޮށްފައިވާ ހިޔާ ފްލެޓްތަކުގައި ތިންމަސްދުވަހުގެތެރޭގައި ދިރިއުޅޭން ފެއްޓުމަށް އެންގުމުން ފްލެޓް ލުބުނު މީހުން ދަރަންޏަށާއި އެހެނިހެން ގޮތްގޮތަށް، ފައިސާ އާއި ތަކެތި ނެގި ކަމަށެވެ.
އެއަށްފަހު ފިނިޝިން މަސައްކަތް ނިންމައިދިނުމަށް އެދުނު ބައެއް ކުންފުނިތަކަށް ފައިސާ އާއި ތަކެތި ދިން ނަމަވެސް އެފަރާތްތަކުން މަސައްކަތް ކޮށްނުދީ، ފައިސާއަށް ހިޔާނާތްތެރިވުމުގެ ސަބަބުން ފޫ ނުބެއްދޭވަރުގެ ގެއްލުމާއި ދަތިތަކާއި އުނދަގޫތައް ފްލެޓް ލިބުނު ފަރާތްތަކަށް ކުރިަތިވެފައިވާކަމަށްވެސް ވިދާޅުވިއެވެ.
އޭގެ އިތުރުން ފިނިޝިން މަސައްކަތްކުރާ ކުންފުނިތަކުގެ ނަމުގައި ބައެއް ފަރާތްތަކުން ފައިސާ ހޯދައި ފްލެޓް ލިިބުނު މީހުންނަށް އޮޅުވާލުމާއި މަކަރުގެދުން އިތުރުވަމުންދާކަމަށްވެސް ޝަރީފް ވިދާޅުވިއެވެ.
އެހެންކަމުން ފްލެޓްތަކުގެ ފިނިޝިން މަސައްކަތް ނިންމުމަށް ކަމަށްބުނެ ފައިސާނެގި ބައެއް ކުންފުނިތަކުން މަސައްކަތް ނުކޮށް، އަދި އެކަމަށް ނެގި ފައިސާ އަނބުރާ ނުދޭ މައްސަލަ އާއި ކުންފުނިތަކުގެ ނަމުގައި ބައެއް ފަރާތްތަކުން ފައިސާ ހޯދައި މީހުންނަށް އޮޅުވާލައި މަކަރުހަދާ މައްސަލަ ސަރުކާރުގެ ސަމާލުކަމަށް ގެނައުމަށް ހުށަހަޅާ ކަމަށް ޝަރީފް ވިދާޅުވިއެވެ.
