މާލޭ ރައްޔިތުންނަށް ގޯތި ދޫކުރުމުގެ މަޝްރޫޢަށް ކުރިމަތިލާން މިއަހަރުގެ ޖޫން މަހު ހުޅުވާލާނެ ކަމަށް ސަރުކާރުން ވިދާޅުވެއްޖެއެވެ.
މިއީ މާލޭގެ ރައްޔިތުންގެ ބޯހިޔާވަހިކަން ކަށަވަރުކުރުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ޢިއުލާންކުރައްވާފައިވާ ގޯތިދޫކުރުމުގެ މަޝްރޫޢުއެކެވެ.
ހައުސިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހި ކަމުގެ މައްސަލައަށް ހައްލު ހޯދާދެއްވުމަށް ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ.
މިއަހަރުގެ ރިޔާސީ ބަޔާން އިއްވަވަމުން ރައީސް ސާލިހު ވިދާޅުވެފައިވަނީ ބޯހިޔާވަހިކަމުގެ މައްސަލައަށް ޙައްލެއް ގެނައުމަށް މާލެއަތޮޅު ގިރާވަރު ފަޅު ހިއްކައިގެން މާލޭ ރައްޔިތުންނަށް 2000 ގޯތި ދޫކުރުމުގެ މަޝްރޫޢެއް ފައްޓަވާނެ ކަމަށެވެ. އަދި ހުޅުމާލެއިން 1000 ގޯތި ދޫކުރުމަށް ވެސް ހަމަޖެހިފައިވާ ކަމަށް އެމަނިކުފާނު ވިދާޅުވިއެވެ.
މީގެއިތުރުން ރައީސް ސާލިހު ވިދާޅުވީ ހުޅުމާލޭގައި ކުރިއަށްދާ ހައުސިންގ މަޝްރޫޢުގެ ދަށުން މާލޭގެ ރައްޔިތުންނަށް 5000 ހައުސިންގ ޔުނިޓު ހަމަޖެއްސުމަށް ނިންމަވާ އިތުރު 2000 ހައުސިންގ ޔުނިޓުގެ މަސައްކަތް ފެއްޓެވުމަށް ނިންމަވާފައިވާ ކަމަށެވެ.
ރާއްޖޭގެ ގިނަ ރަށްރަށަށް ވެސް ދިމާވެފައިވާ އިޖުތިމާޢީ އެންމެ ބޮޑު މައްސަލައަކީ އެކަށީގެންވާ ބޯހިޔާވަހިކަމެއް ނެތުން ކަމަށްވާއިރު، އާބާދީ ބޮޑެތި ރަށްރަށުގައި އަންނަނީ ތޮށްޖެހުން އިތުރުވަމުންނެވެ.
