"އިންޑިއާ އައުޓް" ސްޓޭމްޕް ޖަހައިފައި އޮތުމުން ޕްރޮގްރެސިވް ކޯލިޝަނަށް ދަރުސް ބާއްވަން ހުއްދަ ނުދިން ކަމަށް އެ ކޯލިޝަނުން ބުނެފިއެވެ.
ޕީއެންސީގެ ނައިބު ރައީސް އިބްރާހިމް ޝުޖާޢު ވިދާޅުވީ ސިޔާސީ ޕާޓީތަކަށް ދަރުސްތައް ދެވޭނެކަމަށް އިސްލާމިކް މިނިސްޓްރީން އިއުލާންކުރުމުން ޕީޕީއެމް/ޕީއެންސީގެ ފަރާތުން އެކަމަށް އެދިފައިވާނެ ކަމަށެވެ. އަދި ދަރުސް ދޭން ބޭނުންވަނީ ކިންގް ސަލްމާން މިސްކިތުގައި ކަމަށެވެ.
" މިނިސްޓްރީ އޮފް އިސްލާމިކް އެފެއާޒަށް އަޅުގަނޑުމެން ސިޓީއަކުން ދެންނެވިން، ކިންގް ސަލްމާން މިސްކިތުގައި މި ޕާޓީގެ ފަރާތުން ދީނީ ދަރުސް ޕްރޮގްރާމެއް ހިންގުމަށް ބޭނުންވާ ކަމަށް، އިއްޔެ ސިޓީގައި އެދިފައިވާނީ ބުރާސްފަތި ދުވަހުގެ ރޭ ބޭއްވާ ގޮތަށް. އެކަމަމަކު އެ ސިޓީގަ ވަކި ސްޓޭމްޕެއް ޖަހައިފައި އިނީމާ އެ ހުއްދަ ނުލިބުނީ." ޝުޖާޢު ވިދާޅުވިއެވެ.
މީގެ އިތުރުން ސަލްމާން މިސްކިތް މިހާރު ދެވެން ނެތް ކަމަށާއި ސިޔާސީ ޕާޓީތަކަށް ދަރުސް ދިނުމުގެ ހުއްދަ މިހާރު ނުދެއްވާ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު ފަހުން ވިދާޅުވި ކަމަށް ވެސް ޝުޖާޢު ވިދާޅުވިއެވެ.
އަދާލަތު ޕާޓީއަށް އެކަނި އެ ފުރުސަތު ދެއްވާތީ ވަރަށް ބޮޑަށް ފާޑުވިދާޅުވެ އެކަމުގެ ޝަކުވާ މިނިސްޓަރަށް ކުރުމުން، މިހާރު އަދާލަތު ޕާޓީއަށް ވެސް ދަރުސް ނުބޭއްވުމަށް އަންގާފައިވާނެ ކަމަށް މިނިސްޓަރު ވިދާޅުވެފައިވާ ކަމަށް ޝުޖާއު ވަނީ ވިދާޅުވެފައެވެ.
