ފެނަކަ ޢާއިލީ ޤުރްއާން މުބާރާތުގެ ޒޯން 1ގެ މުބާރާތް ފަށައިފިއެވެ.
މިއީ ފެނަކަ ކޯޕަރޭޝަންގެ މުވައްޒިފުންގެ ޢާއިލާތަކުގެ މެމްބަރުންނަށް އަމާޒުކޮށްގެން އެކުންފުނިން ބާއްވާ މުބާރާތެކެވެ.
ފެނަކަ ރެކްރިއޭސަން ކުލަބުން އިންތިޒާމް ކޮށްގެން ރަމަޟާންމަހުގައި ބާއްވާ " ފެނަކަ އާއިލީ ޤުރުއާން މުބާރާތް 1443 " ގެ ޒޯން 1 ގައި ހިމެނެނީ ށ. އަތޮޅާއި ނ އަތޮޅެވެ. މިހާރު ފެށިގެން ކުރިޔަށްދާ ޒޯން 1 ގެ މުބާރާތް ކުރިޔަށްދަނީ ށ މިލަންދޫގައެވެ.
193 ބައިވެރިންނާއެކު ޒޯން 1 ގެ މުބާރާތް ފަށާފައިވާއިރު، މި މުބާރާތަށް އިންސާފުވެރިކޮށްދެއްވާނީ އިސްލާމިކް ޔުނިވަރސިޓީގެ ތިން ލެކްޗަރަރ އިންނެވެ. މިއީ މި މުބާރާތް ބާއްވާ ފަސްވަނަ އަހަރެވެ.
ބަލައިގެން އަދި ނުބަލައި ކިޔެވުމުގެ ގޮފި ހިމަނާފައިވާ މި މުބާރާތުގައި ކޮންމެ އުމުރުފުރާއަކުން ގަދަ ތިނެއް ހޮވައި، މުބާރާތުން އެއްވަނަ އަށް 15،000 ރުފިޔާ، ދެވަނަ އަށް 10،000 ރުފިޔާ އަދި ތިންވަނަ އަށް 5،000 ރުފިޔާ ވަނީ ކަނޑައަޅާފައެވެ.
ފެނަކައިން ބުނީ މި މުބާރާތް ފެނަކަ އިން ޚިދުމަތް ފޯރުކޮށްދެމުންދާ ހަތަރު ސަރަހައްދެއްގައި މި މުބާރާތް ބާއްވާނެ ކަމަށެވެ.
މި މުބާރާތަކީ ފެނަކަ މުވައްޒަފުންނާއި މުވައްޒަފުންގެ ޢާއިލާތަކުގެ ހިތްތަކުގައި ކީރިތި ޤުރުއާން ކިޔެވުމުގެ ލޯބިޖައްސައި ޤުރުއާން ކިޔެވުމުގެ ފަންނު ދިރުވާ ޢާލާކޮށް ފެތުރުމުގެ މަޤުޞަދުގައި ބާއްވާ މުބާރާތެކެވެ. އަދި އެ ކުންފުނީގެ މުވައްޒަފުންގެ ޢާއިލާތަކުގެ މެދުގައި ގުޅުން ބަދަހި ކުރުމާއި އެ މުވައްޒަފުންގެ މެދުގައި އެކުވެރިކަން އާލާކުރުމަކީ ވެސް މި މުބާރާތް ބޭއްވުމުގެ މަޤުޞަދެކެވެ.
މިއީ މި މުބާރާތް ކުރިޔަށް ގެންދާ 5 ވަނަ އަހަރެވެ. މި މުބާރާތް ފުރަތަމަ ކުރިޔަށް ގެންގޮސްފައިވަނީ 2019 ވަނަ އަހަރުއެވެ. އަދި 2021 ގައި ރާއްޖޭގައި ހަލުވިކަމާއި އެކު ކޮވިޑް ފެތުރެމުން ދިޔުމާއި އެކު އެއަހަރު މުބާރާތް ބޭއްވޭ ގޮތެއް ވަނީ ނުވެފައެވެ.
