މި ރަމަޟާން މަހު ތަރުކާރީ އާއި މޭވާ ލިބުމުގައި ދަތިތަކެއް ނެތް ކަމަށް ވިޔަފާރިވެރިން ބުނެފިއެވެ.
ކޮންމެ އަހަރެއްގެ ވެސް ރޯދަ މަހަކީ ކާބޯތަކެތީގެ އަގު އިންތިހާއަށް އުފުލޭ މަހަކަށްވާ އިރު، މިއަހަރުގެ ރޯދަ މަސް މިއަދު ފެށުނު އިރު، އަގު އެންމެ މަތީގައި ހުރީ ލުނބޮލުގެއެވެ.
ލުނބޯ ކިލޯއެއް މިއަދު މެންދުރާ ހަމައަށް 150 އަށް އަރާފައިވާއިރު، ވިޔަފާރިވެރިން ބުނީ ލުނބޮލަކީ ވައިގެ މަގުން ރާއްޖެ އެތެރެކުރާ އެއްޗަކަށްވާތީ ލިބުން ދަތިވެފައިވާ ކަމަށެވެ. އެހެންކަމުން މާލޭގެ ބާޒާރުގައި މިވަގުތު ލުނބޯ ލިބެންހުރީ ވަރަށް މަދު ފިހާރައެއްގައެވެ.
"ޢާންމުކޮށް އަހަރުމެން ލުނބޯ ގެންނަނީ ވިއެޓްނާމުން. ލަފާމިކުރަނީ އަންނަ ހަފުތާފައި ލުނބޯ އިތުރަށް ލިބޭނެކަމަށް. އޭރުން އަގު ދަށްވާނެ. ދެން ބަލަމާދޯ ލުނބޯ ކިލޯއެއް 50 ނޫނީ 60 އަށް އަންނަހަފުތާގައި ލިބޭނެކަމަށް." ވިޔަފާރިވެރިއަކު ބުންޏެވެ.
ވިޔަފާރިވެރިން ބުނީ ލުނބޮލުގެ އަގު މިހެންވިޔަސް ތަރުކާރީ އާއި މޭވާގެ ބާވަތްތަކުގެ އަގު މައްޗަށް ދާނެކަމަށް ނުބެލެވޭ ކަމަށެވެ. އެއީ އެތަކެތީގެ ރަނގަޅު ސްޓޮކެއް ލިބިފައިވާތީ ކަމަށް ވެސް ބުންޏެވެ.
ޚާއްސަކޮށް ރޯދަމަހު ތަކެތީގެ އަގުތައް އެއް ހަމައެއްގައި ހިފެހެއްޓުމަށް ސަރުކާރުން ވެސް އަންނަނީ ގިނަ މަސައްކަތްތަކެއް ކުރަމުންނެވެ.
އެގޮތުން ފިޔާ، ބިސް އަދި އަލުވި އަގުތައް އެއް ހަމައެއްގައި ހިފެހެއްޓުމަށް އެސްޓީއޯއިން މިތަކެތި ހުސްނުވެ ލިބޭނޭ އިންތިޒާމު ވަނީ ހަމަޖައްސާފައެވެ. އަދި މުދާ ހިފައިގެން ރާއްޖެއަށް އަންނަ ބޯޓުފަހަރުތައް ކްލިއަރ ކުރުމަށް ފަސޭހަ އިންތިޒާމްތަކެއް އެމްޕީއެލުން ވެސް ވަނީ ހަމަޖައްސާފައެވެ.
