މުޖްތަމައުގައި ނަފުރަތު އުފެއްދުމަށާއި ބޮސްނިޔާ ހެރްޒެގޮވީނާގައި ހިންގާާފައިވާ ޖަރީމާތައް ޝަރަފުވެރި އަމަލުތަކެއްގެ ގޮތުގައި ދެއްކުމަށް ސާބިޔާގައްޔާއި، ބޮސްނިޔާގެ ސާބު ސަރަހައްދުގައި ދައްކަމުންނާ ވާހަކަތަކާމެދު އެކުވެރި ދައުލަތްތަކުގެ ޖަމްއިއްޔާ (އދ.) އިން ކަންބޮޑުވުން ފާޅުކޮށްފިއެވެ.
މި ޖަނަވަރީ މަހުގެ 9 ވަނަ ދުވަހު ބޮސްނިޔާގެ ސާބުން ވަނީ 1992 ވަނަ އަހަރު އެމީހުން އިއުލާންކުރި 'ރިޕަބްލިކާ ސާބްސްކާ' ގެ "ގައުމީ ދުވަސް" ކުލަގަދަ ގޮތެއްގައި ފާހަަގަކޮށްފައެވެ. މިއީ ފާހަގަކުރުން މަނާކޮށްފައިވާ ދުވަހެކެވެ. ބޮސްނިޔާގެ ސާބުން ދިރިއުޅޭ ސަރަހައްދު ބޮސްނިޔާއިން "މިނިވަންވި" ކަމަށް އިއުލާންކުރުމަށް ފަހު އެގައުމުގައި ހިނގި ލާއިންސާނީ އަދި ރަހުމްކުޑަ ހަނގުރާމައިގައި ލައްކައަކަށްވުރެ ގިނަ މީހުން މަރުވިއެވެ.
އދ. ގެ އިންސާނީ ހައްގުތަކާ ބެހޭ އޮފީހުގެ ތަރުޖަމާނު ލިޒް ތުރޮސެލް ވަނީ އަނިޔާވެރި ޖަރީމާތައް ޝަރަފުވެރި އަަަމަލުގެ ގޮތުގައި ދެއްކުމަށާއި، ކުށް ސާބިތުވެފައިވާ ހަނގުރާމައިގެ މުޖުރިމުން މާތްބަޔަަކަށް ހެދުމަށާއި، މުޖުތަަމައުގެ ވަކި ބަޔަކަށް އަމާޒުކޮށް ނަފުރަތު އުފައްދާ ވާހަކަދެއްކުމަށާއި، އަދި ބައެެއް ފަހަރު، ސީދާގޮތުގައި އެމީހުންނަށް ހަމަލާދިނުމަށް ހިތްވަރުދިނުމަށް ވަކި ފަރުދުންެެގެ ބަޔަކު ކުރާ މަސައްކަތާމެދު އދ.ން "ނިހާޔަތަށް ކަންބޮޑުވާކަން" ހާމަކުރައްވާފައެެވެ.
އޭނާ އިތުރަށް ވިދާޅުވިގޮތުގައި ބޮސްނިޔާގެ ސާބުން ބޭއްވި ހިނގާލުމުގެ ބައިވެރިން ވަނީ ކުށް ސާބިތުވެ ޖަލަށްލާފައިވާ ހަނގުރާމައިގެ މުޖްރިމު ރަޓްކޯ މްލާޑިޗްގެ ނަން ގޮވައި، ކުރީގެ ޔޫގޯސްލާވިޔާގެ ބައެއް ސަރަހައްދުތައް ހިފުމަށް ގޮވާލައި، މިސްކިތެއްގެ ކައިރީގައި ބަޑިޖަހާފައެވެ.
ހަނގުރާމައިގެ ޖަރީމާތަކުގެ ޝިކާރައަކަށްވި އާއިލާތަކުގެ ޖަމްއިއްޔާގެ ފަރާތުން ޚަަބަރުފަތުރާ ވަސީލަތްތަކަށް މައުލޫމާތުދެމުން ބުނެފައި ވަނީ ރެޑް ސްޓާ ބެލްގްރޭޑް ފުޓްބޯޅަ ކްލަބަށް ތާއީދުުކުރާ މީހުން ފާއިތުވި ހޮނިހިރު ދުވަހު ބޭއްވި ހަވާއެރުވުމުގެ ހަރަކާތެއްގައި ހަނގުރާމައިގެ މުޖްރިމު މްލާޑިޗްެގެ ބޮޑު ފޮޓޯއެއް އިމާރާތެއްގަައި ޖަހާފައެވެ.
އިންޓަނޭޝަނަލް ކްރިމިނަލް ޓްރައިބިއުނަލް ފޯ ދަ ފޯމާ ޔޫގޯސްލާވިޔާ (އައިސީޓީވައި) އިން ވަނީ 10 މައްސަލައެއްގައި މްލާޑިޗް އުމުރަށް ޖަލަށްލުމަށް 2017 ވަނަ އަހަރު ހުކުމްކޮށްފައެވެ. އޭަނާގެ މައްޗަށް ސާބިތުވި މައްސަލަތަކުގެ ތެރޭގައި ބޮސްނިޔާ ހެރްޒެގޮވީނާގެ ވެރިރަަށް ސަރަޔޭވޯ ހިސާރުކުރުމާއި، ސްރެބްރެނިޗާގައި މުސްލިމުންނާ ދެކޮޅަށް ގަތުލު އާއްމު ހިންގުން ހިމެނެއެވެ. މި ގަތުލު އާއްމުގައި އެރަށުގެ މުސްލިމް ފިރިހެނުންނާއި، ފިރިހެން ކުދިންގެ 8372 މީހުން ބަޑިޖަހަައި މަރާލައި ވަޅުގަނޑުތަކަށް އަޅާލާފައި ވެއެވެ.
އޮފީސް އޮފް ދަ ޔުނައިޓެޑް ނޭޝަންސް ހައި ކޮމިޝަނާ ފޯ ހިއުމަން ރައިޓްސް (އޯއެޗްސީއެޗްއާރް) އިން ވަނީ ނަފުރަތު އުފެއްދުމުގެ އަމަލުތައް ނުހުއްޓުވި ކުރިއަށް ދިއުމަކީ "މުޖުތަމައުގެ ބައެއްގެ ތެރޭގައި އަމާންކަން ނެތުރުމުގެ ބިރާއި، ބިރުވެރިކަން އުފެދުމަށް މަގުފަހިވާނެކަމެކެވެ. އަދި އެކަމުގެ ސަބަބުން ސުލްހަ ގާއިމުކޮށް، އިތުބާރު އުފެއްދުމަށް ހުރަސްއެޅިގެން ދާނެއެވެ.
