ދޮގު ޚަބަރާއި ދޮގު މަޢުލޫމާތަކީ ، އިންސާނާއަށް އަދި އިންސާނާ ދިރިއުޅޭ މުޖުތަމަޢަށް ، ވަރަށް ނުރައްކައުތެރި އެއްޗެކެވެ. ދޮގުހެދުމަކީ ، އިސްލާމްދީނުގައި ޙަރާމް ކުރައްވާފައިވާ ކަމެކެވެ. ބޮޑުވެގެންވާ ފާފައެކެވެ. ދޮގަކީ ހަދާލަން ވަރަށް ފަސޭހަ އެއްޗެކެވެ. އަދި ތަނެއް ފަސާދަކުރަން ބޭނުންކުރެވޭނެ އެންމެ ވަރުގަދަ ހަތިޔާރެވެ. ޒަމާން ގެނެސްދީފައިމިވާ ޙާލަތަކީ ، ދޮގާނުލައި ދިރިނުއުޅެވޭނެ ، ދޮގުން ސަލާމަތްނުވެވޭނެފަދަ ޙާލަތެކެވެ. ތެދުހަދަނީ ކާކުކަން ނޭނގޭފަދަ ޙާލަތެކެވެ. ތެދާއި ދޮގު ވަކިކުރުމުގައި އިންސާނާއަށް އޮޅުން އަރައި ، ގޮތެއް ނިންމަން އުނދަގޫ ދުވަސްވަރެކެވެ. މިހާރަކަށް އައިސް ވަރަށްގިނަމީހުން ބުނެއުޅެއެވެ. " ސިޔާސީ މީހަކު ތެދެއް ނުހަދާނެއެވެ". އެހެންނަމަވެސް އެންމެ ގިނަބަޔަކަށް ޤަބޫލުކުރެވެނީ ސިޔާސީމީހުން ހަދާ ދޮގެވެ.
ދޮގު މަޢުލޫމާތަކީ ، އެމީހަކު ބޭނުންވާ މަޤްޞަދެއް ޙާޞިލްކުރުމަށްޓަކައި ، ރައްޔިތުންގެ ވިސްނުމާއި ފިކުރު ވަކިގޮތަކަށް އަނބުރައިލުމަށްޓަކައި ބޭނުންކުރާ އުކުޅެކެވެ. ރަނގަޅުކަމެއް ގޯސްކަމެއްގެ ގޮތުގައި ސިފަކުރުމަށް ނިކަން ރީތިކޮށް ، ބުހުތާން ދޮގެއް ހަދާލާނެއެވެ. ކަމެއް އޮންނަގޮތް ސާފުކޮށްދިނުމުގައި އެކަން ސާފުކޮށްދޭމީހާ ބޭނުންވާ ގޮތަކަށް ބަށްޓަންކޮށްގެން ތެދު ، ދޮގަށް ބަދަލުކޮށްލާނެއެވެ. އަޑުއަހާމީހާއަށް ، އެވަނީ ކީއްކަންވެސް ވިސްނާލަން ބޭނުންނުވާނެ މިންވަރަށް ރީތިކޮށް ދޮގު ހަދާނެއެވެ. ކަނޑައެޅިގެން ފެންނަންހުންނަ މަންޒަރު އޭގެ އަޞްލުންބޭރުވާގޮތަށް ސިފަކޮށްދޭނެއެވެ. ޙަޤީޤީ މަންޒަރު ބަދަލުކޮށްލާނެއެވެ. އެ މަންޒަރުބަލަން ، އަދި އަޑުއަހަންތިބޭމީހުން ، ދޮގުހަދާމީހާއަށް އިޙްތިރާމްކުރުމަށް ކޮޅަށްތެދުވެ ، ހިނިއައިސްތިބެ ، އަތަށް ތަދުވާވަރަށް ، އަތްތިލަބަޑިޖަހައި ސަނާކިޔާވަރަށް އޮމާންކަންމަތީ ދޮގުހަދަމުން ގެންދާނެއެވެ. ވަކީލުންނަކީވެސް ދޮގުހެދުމަށް ކުޅަދާނަ ބަޔެކެވެ. އެމީހެއްގެ މުވައްކިލުގެ ޙަޤީޤަތް ފައުޅުވެ ، ދޮގު ފަޅާއަރަންދެން ވަކާލާތުކޮށް ދޮގުހަދަމުން ގެންދާނެއެވެ. ދިފާޢީ ވަކީލަށް އެދޮގު ، ތެދެއްކަން ސާބިތުނުކުރެވި ތެދަށް ބަދަލުނުކުރެވޭ ޙާލަތެއްގައި ތެދު ، ދޮގުގެ ގޮތުގައި އޮވެ އެކަމެއްނިމިގެންދާނެއެވެ.
ދޮގަކީ ، އައްޔަށްވުރެ ބާރަށް ދަތުރުކޮށް ، ކޯވިޑަށްވުރެ ފަސޭހައިން ފެތުރި ، ކަނޑީގެ މިޔަޔަށްވުރެ ތޫނު އެއްޗެކެވެ. ދޮގުހަދާމީހާ ، ދޮގެއް ހަދާނީ ، ފިސާރިފަރުވާތެރިކަމާއެކު ، އެދޮގެއްރާވައި ، އަޑުއަހާމީހުންގެ ހިތާކުޅެލެވޭނެ އެންމެ މޮޅެތިގޮތްތަކަށް ވިސްނައިގެންނެވެ. އަޑުއަހާމީހުންގެ ހިތުގެ އެންމެ ހިމަނާރާ ކުޅެލެވިގެން ، އެމީހުންގެ ކަނބޮޑުވުންތަކަށް ޖަވާބުލިބިގެން ، އެމީހުންގެ ހިތަށް ތަޞައްލީ ލިބޭގޮތަށެވެ. އަޑުއަހާމީހުންގެ މޫނުމައްޗަށް ހިނިތުންވުން ގެނެސްދެވޭނެ ގޮތަކަށެވެ. އެމީހުންނަށް ހެޔޮއެދޭ މީހަކަށްވެހުރެގެންނެވެ. ދޮގުހަދާމީހާގެ ދޮގު އެއީ ، ތެދުކަން ސާބިތުކޮށްދެވޭނެ ހުރިހައި އުކުޅެއް ބޭނުންކުރާނެއެވެ. އެއްދޮގު އަނެއްދޮގާ ގުޅުވައި އެއީ ތެދުކަން ސާބިތުކޮށްދޭނެއެވެ. އަދި ދޮގެއްހަދައިފިނަމަ މަތިމައްޗަށް ހަތްދޮގު ނުހަދާ ސަލާމަތެއް ނުވާނެއެވެ.
ދޮގުވެރިޔެއްގެ ލަފަޔާއި އިރުޝާދަށް ތަބާނުވުމަށާއި ، ދޮގުވެރިޔާގެ އަޑު ނޭހުމަށް ، މާތްވެގެންވާ އިސްލާމްދީނުގައި ވަރަށްބޮޑަށް ބާރުއަޅުއްވާފައި ވެއެވެ. ކޮންމެ މީހެއްކަމުގައިވިޔަސް ، ޚިޔާނާތުން ފޯވެ ، މަކަރާއި ޙީލަތުން ދުނިޔެހޯދާފައިތިބޭ މީހުންނަށް ތެދެއް ހެދުމަކީ ، އުނދަގޫކަމަކަށް ވާނެއެވެ. ވެރިންކަމަށްވިޔަސް ، ސިޔާސީ މީހުންކަމަށްވިޔަސް ، ދީނީޢިލްމުވެރިންކަމަށްވިޔަސް ، އަދި ޖާހިލުންކަމުގައިވިޔަސް ، ކާފަރުންކަމުގައިވިޔަސް ، ދޮގުހަދާމީހުންނާއެކީ ނުއުޅުމަށް އިސްލާމްދީން ބާރުއަޅުއްވައެވެ. ދޮގުވެރިންނާއެކީ އުޅޭކަމަށްވަންޏާ ، އެއީ ކިތަންމެ ތެދުވެރިމީހެއްކަމަށްވިޔަސް ، ދުރުތިބީންނަށް ބެލޭނީ އެމީހަކީވެސް ދޮގުވެރިންގެ ތެރޭހިމެނޭ މީހެއްކަމުގައެވެ. އެފަދަމީހަކަށް ، މީސްތަކުން އިތުބާރެއް ނުކުރާނެއެވެ.
ދޮގުހެދުމަކީ ، މުޅި އިންސާނިއްޔަތާ ޚިލާފު ޢަމަލެކެވެ. އެއީ އެތައްގޮތަކުން ، މުޖްތަމަޢު ފަސާދަވެ ދޭދޭފަރުދުންގެ މެދުގައި މަޞްލަޙަތު ގެއްލި ، ގުޅުންކެނޑި ބައިބައިވުން އުފެދިގެންދާ ބޮޑުވެގެންވާ ފާފައެކެވެ. އިންސާނާ ދުނިޔެއަށް ފޮނުއްވައި ، ދުނިޔޭގައި އުޅުމަށް ، އެއިންސާނާ ޚަލްޤުކުރެއްވި މަތިވެރި އިލާހު ކޯފާވެވޮޑިގެންވާ ، ދީނާޚިލާފު ޢަމަލެކެވެ. ހަތްއުޑުމަތިން ބާވައިލެއްވި ﷲ ގެ ކަލާމްފުޅު ، ކީރިތި ޤުރުއާނުގައި އިންޒާރުގެ ބަސްވަޙީކުރައްވައި ، އެއާދުރުވުމަށް އިންޒާރުގެ ބަސްވަޙީކުރައްވާފައިވާ ބޮޑުފާފައެވެ. ކީރިތި ރަސޫލާ މުޙައްމަދު ޞައްލަﷲ ޢަލައިހިވަސައްލަމަގެ ޙަދީސްފުޅުތަކުން އެކަމުގެ ނުބައިކަން ބަޔާންކޮށްދެއްވާފައިވާ ، ހުތުރުވެގެންވާ ޢަމަލެކެވެ. މުއުމިނެއްކަމުގައިވެހުރެ ، މުއުމިނަކު ދޮގެއް ނުހަދާނެއެވެ. ދޮގުހެދުމަކީ ޝައިތާނާގެ ޢަމަލެކެވެ.
ކީރިތި ޤުރުއާނުގެ އައްތައުބާ ސޫރަތުގެ 119 ވަނައާޔަތުގައި ﷲ ވަޙީކުރައްވާފައި ވެއެވެ. " އޭ އީމާންވެއްޖެ މީސްތަކުންނޭވެ ! ތިޔަބައިމީހުން ، ﷲ އަށް ތަޤުވާވެރިވާށެވެ ! އަދި ތެދުވެރިންނާއެކުގައި ތިޔަބައިމީހުންވާށެވެ ! " ﷲ ގެ މަގުގައި އީމާންވެތިބި މީހުންނަށް މިއާޔަތުގައި ، ﷲ އަންގަވާފައި އެވަނީ ، އެކަލާނގެއަށް ތަޤްވާވެރިވުމަށެވެ. އެކަލާނގެ އަންގަވާފައިވާ ގޮތަށް ހެޔޮ ޢަމަލުކުރުމަށެވެ. އަދިހަމަ އެއާއެކު ، ތެދުވެރިންނާއކުގައި ދިރިއުޅުމަށެވެ. ދޮގުހަދާ ފާސިދުންނާއެކުގައި ނުވެ ، އެމީހުންނާ ދުރުހެލި ވުމަށެވެ. އެއީ ރަޙުމަތުންފުރިގެންވާ ، ﷲ ގެ އަމުރުފުޅެވެ. އެއަމުރުފުޅަށް ފުރަގަސްދީ ، ދޮގުވެރި ފާސިދުންނާ ބައިވެރިވެ ، އެމީހުންނަށް ތާއީދުކޮށް ، އެފަދަ ކެހުވެރިންނާއެކުގައިވާ މީހުންނަށް ، ﷲ ގެ ޢަޒާބު ކަށަވަރު ވެގެން ވެއެވެ.
ކީރިތި ޤުރުއާނުގެ އައްނަޙުލު ސޫރަތުގެ މޫރިތި އާޔަތްތަކުން ، 105 ވަނަ އާޔަތަށް ބަލައިލަމާތޯއެވެ ؟. އެއާޔަތުގައި ﷲ ވަޙީ ކުރައްވާފައިވެއެވެ. " ދޮގުހަދާކަން ކަށަވަރީ ، ﷲ ގެ އާޔަތްތަކަށް އީމާންނުވާ މީހުންނެވެ. އަދި އެއުރެންނީ ހަމަ ، ދޮގުވެރިންނެވެ. " ކީރިތި ޤުރުއާނުގައި ﷲ ބަސްވަޙީކުރައްވައި ، އަންގަވައިފައިވާ އާޔަތްތަކަކީ ، އިންސާނާ ދުނިޔޭގައި ދިރިއުޅޭއިރު ޢަމަލުތައް ބަހައްޓަންވީ ގޮތެވެ. އިންސާނާ ދުނިޔެއަށް ފޮނުއްވީ ، ހިތުހުރިގޮތަކަށް ދުނިޔޭގައި އުޅެފައި އެކަލާނގެ ޙަޟުރަތަށް އެނބުރި ދާކަށްނޫނެވެ. އިންސާނާ ޚަލްޤުކުރައްވައި މިދުނިޔެމައްޗަށް ފޮނުއްވަނީ ، ދުނިޔޭގައި އުޅެންވީ ގޮތާއި ނޫޅެންވީގޮތްތައް އަންގަވާފައެވެ. ކުރަންވީ ކަންތަކާއި ނުކުރަންވީ ކަންތައްވެސް އަންގަވާފައެވެ. ފޮތްތައް ބާވައިލައްވައި ، ރަސޫލުން ފޮނުއްވައިގެންނެވެ. ނަޙުލު ސޫރަތުގެ 105 ވަނަ އާޔަތުގައި ، ﷲ އަންގަވާފައި އެވަނީ ، ދޮގުހަދާކަން ކަށަވަރީ ، އެކަލާނގެ އަންގަވާފައިވާ ގޮތްތަކަށް އީމާންނުވާ އަދި ﷲ ގެ އަމުރުފުޅުތަކަށް ކިޔަމަންނުވާ މީހުންކަމުގައެވެ. އެހެންކަމުން އެއަމުރުފުޅުތަކަށް ކިޔަމަންނުވާ މީހުންނަށް ﷲ ގެ ކޯފާ ޙައްޤުވެގެން ވެއެވެ. ކިތަންމެ " ހިޔާބޮޑު " ގަހެއްގައި ލެނގިގެން ހުއްޓަސް ، ﷲ ގެ ކޯފާޔަކުން ސަލާމަތެއް ނުވެވޭނެއެވެ. ކިތަންމެ ބޮޑު ސިޔާސީމީހެއްގެ ފަސްބައިގާ އެލިގެން އޮތަސް ، ﷲ މިންވަރުކުރައްވާ ކޯފާޔަކުން ސަލާމަތެއް ނުލިބޭނެއެވެ.
ކީރިތި ޤުރުއާނުގެ މޫރިތި ސޫރަތްތަކުގެ ތެރެއިން ، އަލްޙުޖުރާތު ސޫރަތުގެ ހަވަނަ އާޔަތުގައި ﷲ ވަޙީކުރައްވާފައި ވެއެވެ. " އޭ އީމާންވެއްޖެ މީސްތަކުންނޭވެ ! ތިޔަބައިމީހުންގެ ގާތަށް ފާސިޤަކު ، ޚަބަރަކައިގެން އަތުވެއްޖެނަމަ ، އޭގެ ދޮގުތެދުބަލައި ، ޙަޤީޤަތް ހޯދާށެވެ ! (އެއީ) ނޭނގިތިބެ ، ތިޔަބައިމީހުންނަށް ، ބަޔަކަށް ގެއްލުން ދެވިދާނެތީއެވެ. ފަހެ ، އެހެން ވެއްޖެނަމަ ، ތިޔަބައިމީހުންކުރި ކަންތަކުގެ މައްޗަށް ، ހިތާމަކުރާބަޔަކު ކަމުގައި ތިޔަބައިމީހުން ވެދާނެތެވެ. "
މަތީގައި ބަޔާންވެގެންވާ އާޔަތަކީ ، ރާއްޖޭގެ މިއަދުގެ ޙާލަތަށްބަލާއިރު ، ކޮންމެ މީހަކުވެސް ވިސްނައި ފިކުރުކޮށްލަން މަޖުބޫރުވާފަދަ އާޔަތެކެވެ. އެއީ ﷲ ގެ އަމުރުފުޅެކެވެ. ޚަބަރު ހިފައިގެން އަންނަނީ ތެދުވެރިއެއްކަން ނުވަތަ ދޮގުވެރި ފާސިޤެއްކަން ދެނެގަނެވޭވަރަށްވުރެ ރާއްޖޭގެ މީސްމީޑިއާގެ ޙާލަތު ގޯހެވެ. ދެޓީވީއަކުން އެއްޚަބަރެއް އެއްގޮތަކަށް ނުކިޔައެވެ. ދެނޫހަކުން އެއްޚަބަރެއް އެއްގޮތަކަށް ނުލިޔެއެވެ. ސިޔާސީކޯޅުމުގެ ތެރޭގައި ، ދޭދޭ ފަރުދުންގެ މެދުގައި ޚިލާފު އުފެދި ބައިބައިވެފައިވާ މިދުވަސްވަރު އެއްބަޔަކު ބަލަނީ ވަކިނޫހެކެވެ. އެއްބަޔަކު އަޑުއަހަނީ ވަކިޓީވީއެކެވެ. އެކިމީހުންނަށް ތާއީދުކުރެވެނީ އެކި ނޫހަށެވެ. އެކިމީހުން ބަލައި އަޑުއަހަން ބޭނުންވަނީ ވަކިޓީވީއެކެވެ. އެކިމީހުން ބަލައި އަޑުއަހާ ނޫހާއި ޓީވީން އެކިޔަނީ އަދި ލިޔަނީ ޙަޤީޤަތްކަމަށް ޤަބޫލުކޮށްގެންނެވެ. އެހެން ޓީވީއަކުން ނުވަތަ ނޫހަކުން ގެނެސްދެނީ ދޮގު ޚަބަރެވެ. މިހިސާބުން އިންސާނާ އެހުންނަނީ ފިކުރުގެ ނުވަތަ ނަފްސުގެ އަޅަކަށްވެފައެވެ. އޭނާ ޤަބޫލުކުރާ އަޑުނޫން އެހެންއަޑެއް އަހަން ބޭނުމެއް ނުވެއެވެ. އޭނާ ޤަބޫލުކުރާ މީހަކު ދައްކަނީ ދޮގުވާހަކަ ކަމަށްވިޔަސް ، އެއަޑު ނޫނީ އަހާކަށް ބޭނުމެއްނުވެއެވެ.
ދޮގުވެރިން ދޮގުހަދަނީ ، އޭނާގެ އަމިއްލަ ފައިދާއެއް ޙާޞިލްކުރުމަށެވެ. އަމިއްލަ ބޭނުމެއް ފުއްދުމަށެވެ. ދޮގަކީ ، އިންސާނިއްޔަތާ ޚިލާފު ޢަމަލެކެވެ. ދޮގުވެރިންނާއި މުނާފިޤުންނާބެހޭގޮތުން ، ކީރިތި ޤުރުއާނުގައި އެތައް އާޔަތެއްބާވައިލައްވައި ، ބޮޑުވެގެންވާ އެފާފައިގެ މައްޗަށް ، އިންސާނާއަށް ވަނީ އިންޒާރު ދެއްވާފައެވެ. ދޮގާއި މަކަރާ ޙީލަތާ އަދި ޚިޔާނާތުގެ މައްޗަށް ، ކައުއއިތުރު ރަސޫލާ ، މުޙައްމަދު ޞައްލަﷲ ޢަލައިހި ވަސައްލަމަގެ ޙަދީސްފުޅުތައް ވަރަށް ގިނައެވެ. އެކަންކަމާ ދުރުހެލިވުމަށް ދެއްވާފައިވާ ނަޞޭޙަތާއި އިރުޝާދުތައް އެހައި ގިނައެވެ. އެހެންނަމަވެސް ، މިޒަމާނުގައި އެހުރިހައި ސިފައެއްހުރިމީހެއްނޫނީ މީހަކަށް ނުވެއެވެ. އެއިން ސިފައެއް ނެތިއްޔާ މީހުންނަކަށް ކަމަކު ނުދެއެވެ. ތާއީދުކުރާމީހުން މަދެވެ. ޕޯޑިއަމްތަކަށް އަރައި ، ހެއްދެވިހައި ދޮގެއްހަދައި އޮޅުވާލައިގެން މީސްތަކުންގެ ސިކުނޑިއާ ކުޅެލެވޭ މީހަކީ ، ސިޔާސީގޮތުން އެންމެ ބާރުގަދަ އަދި އެންމެ ކަމުދާ މީހުންނަށް ވެދެއެވެ. ދޮގާ ، މަކަރާއި ޙީލަތްހަދާ ޚިޔާނާތްތެރިންނަކީ ، އެތައްބަޔަކު ، ގުދުވެ ގުދުވެފައި ، އިޙްތިރާމްކުރާ މީހުންނަށް ވެދެއެވެ. ނަޟާޙަތްތެރިކަން ކުޑަވާ ވަރަކަށް ، އެމީހަކީ މީސްތަކުންގެ މެދުގައި މަޤްބޫލުމީހަކަށް ވެއެވެ.
އިންސާނާއަށް ބުއްދި ދެއްވައި އެހެންހުރިހައި މަޚުލޫޤުންނަށްވުރެ މާތްކުރެއްވިއެވެ. ވިސްނައި ފިކުރުކޮށް ރަނގަޅާއި ނުބައި ދެނެގަނެވޭވަރަށް ބުއްދި އާއި ވިސްނުން ދެއްވިއެވެ. ޖަނަވާރުންނާއި އިންސާނުންގެ ތަފާތަކީ އެއީއެވެ. ވިސްނައި ފިކުރުކޮށް ، ބުއްދީގެ ބޭނުންހިފައިގެން ރަނގަޅާއި ނުބައި ވަކިކޮށް ދެނެގަތުމުގެ ބާރު އިންސާނާއަށް ދެއްވިއެވެ. ޖަނަވާރުންނަކަށް އެފަދަ ރަޙުމަތެއް ނުލައްވައެވެ. އެހެނަސް ، ދުނިޔެ ބުރުއަޅައި ބަދަލުވެ ، ކަންކަން ފުރޮޅިގެންމިދާ ގޮތަށްބަލާއިރު ، އިންސާނުން މިވަގުތު މިވަނީ ޖަނަވާރުންނަށްވުރެވެސް ދަށުދަރަޖަޔަކަށް ވެއްޓިފައެވެ. އަމިއްލަ އެދުމުގެ ކުރިމަތީގައި ރަނގަޅާއި ނުބައެއް އޮޅުމަކުން ނުފިލައެވެ. ރުފިޔާކޮޅެއް ލިބިދާނެކަމުގެ އުއްމީދުގައި ، ނުވަތަ އެހެންވެސް ނާޖާއިޒް ފައިދާއެއް ލިބިދާނެކަމަށްބަލައި ، ނުވަތަ އެފަދަކަމެއް މާޒީގައި ޙާޞިލްކުރެވިފައި އޮތަތީ ، ރަނގަޅު ރަނގަޅުގެ ގޮތުގައި އަދި ގޯސް ގޯހުގެ ގޮތުގައި ބަލާކަށް އިންސާނާ ބޭނުމެއް ނުވެއެވެ. މުޅި އިންސާނިއްޔަތާޚިލާފު އެތައްކަމަކަށް ތަބާވަމުން ، ދުނިޔެ އާބާދުކުރަމުން ، އިންސާނާ އުޅުނުމަށް އަންގަވާފައިވާ މަގުތަކުން ކަސިޔާރުވެ ، ގެއްލި ހަލާކުވަމުން އެދަނީ ، އަޅެފަހެ ބުއްދިފިލައިގޮސްގެންތޯއެވެ ؟ ނޫނެކެވެ. އެއީ ބުއްދީގެ ބޭނުންހިފައިގެން ، ދުނިޔޭގެ ދަހިވެތިކަމުގައި ، އަމިއްލައެދުމުގެ ޝިކާރަޔަކަށްވެހުރެ ، ހަމަބުއްދީގައި އިންސާނާ ނިންމާ ނިންމުމެކެވެ. ދޮގާއި މަކަރުހަދައި ، ވަށްކަމާއި ޚިޔާނާތާ ޙީލަތުން ދެދުނިޔެއިން ގެއްލިގޮސްތިބޭމީހުންގެ ފަހަތުން ، އިންސާނާ ދުވެނަގަނީވެސް ، ހަމަ ބުއްދީގައެވެ. އެފަދަ މީހުންގެ ބަހަށް ހެއްލި ، އެބަޔަށް ވަދެ ، ރަނަގޅަށްތިބޭ ބަޔަކު ގޯސްކުރަނީވެސް ، ބުއްދިނެތިގެންނެއް ނޫނެވެ. ވަށްކަމާއި ޚިޔާނާތާ އަދި މަކަރާއި ޙީލަތް ހަދައިގެން ކުށްވެރިވެގެން ޝަރީޢަތަށް ގެންދެވޭމީހުން ، ސަލާމަތްކުރުމަށްޓަކައި ވަކާލާތުކޮށް ، އެމީހަކު އެކުޅަ ނުބައި ފާފައިން ސަލާމަތްކުރުމަށް ޙުއްޖަތް ދައްކައި ، ފަނޑިޔާރުގެއިން ނެރެ ސަލާމަތްކޮށްގެން އެގެންދަނީ ، އެކުށެއް އެމީހަކު ނުކުރާތީއެއްނޫނެވެ. އެކަން އެހެން އެދިމާވަނީ ، އެއެންމެންނަކީވެސް ދޮގުވެރިންކަމުގައި ވާތީއެވެ. ދެދުނިޔެއިން ގެއްލިގޮސްތިބޭ ބަޔަކަށް ހެވާއި ނުބައި ވަތްކެއްނުވާނެއެވެ. އެބައިމީހުންގެ މޫނުމަތީ އެނބުރޭނީ ރުފިޔާއެވެ.
އެހެންނަމަވެސް ، އާޚިރަތްދުވަހުން ، އެމީހަކުކުޅަ ޢަމަލެއްގެ ޖަޒާލިބޭހިނދު ، ޢަޒާބުލިބޭ މީހުން ސަލާމަތްކުރުމަށް ، އެއްކަލަ ދޮގުވެރިޔާއަށް ކޮށްދެވޭނެ ހަމައެއްކަމެއްވެސް ނޯންނާނެއެވެ. ﷲ ގެ ރަޙުމަތަށް އެދުން ނޫން ދެވަނަ ގޮތެއް ނޯންނާނެއެވެ. އެހެނެއްކަމަކު ، ދުނިޔޭގައި އުޅުމުގައި ﷲ އެންގެވި މަގުން އެއްކިބާވެގެންހުރެ ، ﷲ ގެ ޙަޟުރަތަށް އެނބުރި ރުޖޫޢަ ކުރެވޭހިނދު ، ﷲ ގެ އަމުރުފުޅުތަކަށް ކިޔަމަންނުވުމުން އެލިބޭ ޖަޒާއަށް ކެތްނުކުރެވިގެން ، ދުނިޔޭގައި ވާގިދިން މީހުންނާދިމާއަށް އަތްދިއްކޮށްލެވޭހިނދު ، އެމީހަކާއި ޝައިތާނާ ތިބޭނީހޭށެވެ. އެއީ ޝައިތާނާއާއި އެއާ އެއްފަދަ އިންސާނުންގެ ބަހަށް ހެއްލި ، ދުނިޔެ ފަސާދަކޮށްފައިތިބޭ ބަޔަކަށް ، ތިމާގެ އަމިއްލަ ނަފުސަށްލިބޭ ޢަޒާބަށްވެސް ކެތެއް ނުކުރެވޭނެތެވެ.
ދޮގުހެދުމާއި މަކަރާއި ޚިޔާނާތާއި ފަސާދައިން ދުރުހެލިވާންޖެހެނީ މިސަބަބަށްޓަކައެވެ. ދުނިޔޭގައި އެކަންކަން ކުރެވިދާނެއެވެ. ދޮގުވާހަކަދައްކައި ، ދޮގުޚަބަރު ފެތުރިދާނެއެވެ. މަކަރާއި ޙީލަތްހަދައި ، ތިމާފަދަ އެހެން އިންސާނުނެގެ ސިކުނޑިއާ ކުޅެލެވިދާނެއެވެ. އެހެނަސް ، އާޚިރަތުގައި އެބައިމީހުންނަކީ ނިކަމެތިވެގެންވާނެ ބަޔެކެވެ. ވެރިކަމާއި ފައިސާއާ އަދި ބާރަކީ ، އާޚިރަތުގައި އެފަދަމީހުންނާ ދެކޮޅަށް ހެކިދޭ އެއްޗަކަށް ވާނެއެވެ. އެއިން އެއްވެސް އެއްޗަކީ މިދުނިޔެއިން ވަކިވެގެންދާ ހިނދު ސަންދޯކާއެކީ ގެންދެވޭނެ އެއްޗެއްނޫނެވެ. ދުނިޔެއިން އިންސާނާ ނުކުމެގެންދާނީ ، ވެރިކަމާއި ބާރާ އަދި ފައިސާއާ އާ މުދަލާ ހުރިހައި އެއްޗެއް ދޫކޮށްލާފައެވެ. ދުނިޔެއިން އޭނާއަށް ފައިދާއެއްލިބޭގޮތަށް ގެންދެވޭނެ ހަމައެކަނި އެއްޗަކީ އޭނާ ދުނިޔޭގައިހުރެ ކުޅަ ހެޔޮ ޢަމަލެކެވެ.
