ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ މައްޗަށް ދައުލަތުން އުފުލާފައިވާ 2 ދަޢުވާއެއްގެ އަޑުއެހުމެއް މާދަމާއަށް ކްރިމިނަލް ކޯޓުގައި ތާވަލްކޮށްފިއެވެ.
މާދަމާއަށް ތާވަލްކޮށްފައިވަނީ މަނީ ލޯންޑަރިންނާއި ރިޝްވަތު ގަބޫލުކުރުމުގެ ތުހުމަތުގައި ރައީސް ޔާމީންގެ މައްޗަށް ދައުލަތުން ދަޢުވާކުރާ ދެމައްސަލައެއްގެ އަޑުއެހުމެކެވެ. މިއަޑުއެހުން ތާވަލްކޮށްފައިވަނީ މާދަމާ ހެނދުނު 9:00އަށެވެ. މިއީ ރައީސް ޔާމީން މިދަޢުވާތަކަށް ޖަވާބުދާރީވުމަށް ބާއްވާ އަޑުއެހުމެކެވެ.
ރައީސް ޔާމީންގެ މައްޗަށް އުފުލާފައިވާ މި ދަޢުލާތަކުގެ ތެރެއިން މަނީ ލޯންޑްރިންގއާއި ރިޝްވަތު ޤަބޫލުކުރުމުގެ ކުށުގެ ދައުވާއަކީ ރ.ފުއްގިރީގައި ރިސޯޓެއް ތަރައްގީކުރަން އެރަށް ކުއްޔަށް ދޫކުރުމުގެ މުޢާމަލާތުގައި އެމަނިކުފާނު މަޤާމުގެ ނުފޫޒު ބޭނުން ކުރައްވައިގެން 1.1 މިލިއަން ޑޮލަރު ހޯއްދަވައި ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް ބޭނުންކޮށް އެ ފައިސާ ލޯންޑަކުރުމަށް ފަށަލަކޮށްފައިވާކަމަށް ތުހުމަތުކޮށް ކުރާ ދަޢުވާއެކެވެ.
މިމައްސަލައިގައި މއ.ކުރިކީލަހިޔާ އަހްމަދު ކްރިކް ރިޒާއާއި ސަން ކޮންސްޓްރަކްޝަނާއި ސަން އިންވެސްޓްމެންޓްގެ މައްޗަށްވެސް ދައުވާ އުފުލާފައިވެއެވެ.
