3 ލަނޑު 2 ލަނޑުން އިންގްލަންޑް ބަލިކުރުމަށް ފަހު ޔޫރޯ 2020 ގެ ޗެމްޕިއަންކަން އިޓަލީން ހޯދައިފިއެވެ. ރޭ ކުޅުނު މެޗުގެ ފުރިހަމަ ވަގުތު ހަމަވީއިރުވެސް އަދި އިތުރު ގަޑީގެ ވަގުތު ކުޅެ ނިމުނުއިރުވެސް 1 ލަނޑު ލަނޑުން ދެ ޓީމު އެއްވަރު ވެފައި އޮތުމުގެ ސަބަބުން މެޗުގެ ނަތީޖާ ނެރުނީ ޕެނަލްޓީ ޖަހައިގެންނެވެ.
މެޗުގެ ފެށިގެން 2 މިނިޓު ވީތަނާ އިންގްލަންޑުން ލަނޑެއް ޖަހައިފިއެވެ. އެއީ ހަރީ ޓްރިޕިއަރ ނަގައިދިން ހުރަހަކުން ޝޯ ޖެހި ލަނޑެކެވެ. ޝޯ ވާތްފަރާތުން އިޓަލީގެ އޭރިއާ ތެރެއަށް ވަދެގެން އައި އިރު އޭނާ މާކު ކުރާނޭ އެއްވެސް މީހަކު ނެތެވެ. އޭނާ އަތުން އިޝާރާތް ކޮށްލުމާއެކު ޓްރިޕިއަރ ސީދާ އޭނާޔާ ދިމާއަށް ބޯޅަ ފޮނުވައިލިއެވެ. އޭނާ ފަސޭހަކަމާއެކު ގޯލުގެ ތެރެއަށް ބޯޅަ ފޮނުވައިލީއިރު އޭނާ މާކު ކުރަން ޖެހޭ ދިފާއީ ކުޅުންތެރިން ތިބީ އޭނާއަށް ވުރެ ކުރީގައެވެ.
އިންގްލަންޑުން ލަނޑު ޖެހުމާއެކު އިޓަލީން ބޯޅަ ކޮންޓްރޯލުކޮށްގެން ކުޅެން ފެއްޓިއެވެ. އިންގްލަންޑުން ބޮޑަށް ސަމާލުކަން ދިނީ ދިފާއަށެވެ. އިޓަލީން ކުޅުނު ނަމަވެސް ގިނަ ވަގުތު ހޭދަ ކުރީ އިންގްލަންޑްގެ އޭރިއާ ތެރޭގައި ބޯޅަ ގެންގުޅޭށެވެ. ގޯލަށް އަމާޒުކޮށް ބޯޅައެއް ފޮނުވައިލާން މާ ބޮޑު މަސައްކަތެއް ނުކުރެއެވެ. އިޓަލީން އިންގްލަންޑްގެ ގޯލަށް ފުރަތަމަ ހާފުގައި ދިން އެއްވެސް ހަމަލާއަކީ މާ ނުރައްކާޓަރި ހަމަލާއެއް ނޫނެވެ. އިންގްލަންޑްގެ ދިފާއު ފޫއަޅުވައިފައި ސީދާ އޭރިއާ ތެރެއަށް ވަދެގަންނާން އިޓަލީން ކުރި މަސައްކަތް ކާމިޔާބު ވެފައި ވަނީ ދެތިން ފަހަރުއެވެ.
ދެވަނަ ހާފުގެ ކުޅުން ފެށުމާއެކު އިޓަލީން ތަންކޮޅެއް ހަމަލާތައް ގިނަ ކުރެވޭތޯ މަސައްކަތް ފެށިއެވެ. އިންގްލަންޑުން ދިފާއަށް ކުޅެމުން އަނެއްކާވެސް ލަނޑެއް ޖެހޭތޯ ކުރިއަށް އަރަން ދެފަހަރަކު މަސައްކަތް ކުރިއެވެ. އެކަމަކު އިޓަލީގެ ޕްރެޝަރު ބޮޑުވަމުން ދިއުމުގެ ސަބަބުން އަނެއްކާވެސް ފަހަތަށް ޖެހެން މަޖުބޫރުވީއެވެ.
އިޓަލީގެ ލަނޑު ޖަހާފައި ވަނީ މެޗުގެ 66 ވަނަ މިނިޓުގައި ބޮނުއްޗީއެވެ. މިއީ ކޯނަރަކުން ލިބުނު ފުރުސަތެއްގައި އޭނާ ޖެހި ލަނޑެކެވެ.
އިޓަލީން ލަނޑެއް ޖެހުމާއެކު އިންގްލަންޑުން ތަންކޮޅެއް ގިނައިން ހަމަލާއަށް އެރޭތޯ އުޅުނެވެ. އެހެންނަމަވެސް މެޗުގެ ކުރީ ބައެކޭ އެއްގޮތަށް އިޓަލީގެ ހަމަލާތައް އަވަސް ކަމުން މާ ގިނައިން ކުރިއަށް އެރޭ ގޮތެއް ނުވެއެވެ. ދެން އިންގްލަންޑުން މަސައްކަތް ކުރީ ދޭތެރެއަކުން ދިގު ބޯޅައެއް ކުރިއަށް ވައްޓާލުމަށް ފަހު ކައުންޓަރ އެޓޭކެއްގައި ލަނޑެއް ޖަހާށެވެ.
އެއްވަރުވުމުގެ ސަބަބުން ޕެނަލްޓީ ޖަހައިގެން އިޓަލީ މެޗު ކާމިޔާބު ކުރީ 3 ލަނޑު 2 ލަނޑުންނެވެ. މެޗުން މޮޅުވާން އިންގްލަންޑަށް ޕެނަލްޓީން ލިބުނު ފުރުސަތުވެސް ކާމިޔާބު ނުކުރެވުމުގެ ސަބަބުން ބޮޑު ބައިނަލްއަގުވާމީ މުބާރާތެއްގައި ތަށި ހޯދަން އިންގްލަންޑުން ކުރި މަސައްކަތް އަނެއްކާވެސް ނާކާބިޔާބުވީއެވެ. މިއީ އިންގްލަންޑް ޔޫރޯ މުބާރާތެއްގެ ފައިނަލުގައި ކުޅުނު ފުރަތަމަ ފަހަރެވެ.
މިއީ އިޓަލީން ޔޫރަޕްގެ ޗެމްޕިއަންކަން ހޯދި ދެވަނަ ފަހަރެވެ. އިޓަލީއަށް ފުރަތަމަ ޔޫރަޕްގެ ޗެމްޕިއަންކަން ލިބުނީ 1968 ވަނަ އަހަރުއެވެ.
މި މުބާރާތުގެ އެންމެ މޮޅު ކުޅުންތެރިއަކަށް ހޮވުނީ އިޓަލީގެ ގޯލްކީޕަރެވެ.
