2 ލަނޑު 1 ލަނޑުން ޑެންމާކް ބަލިކުރުމަށް ފަހު އިންގްލަންޑް ޔޫރޯ 2020 ގެ ފައިނަލަށް ހިނގައްޖެއެވެ.
ރޭ މެނަދަމު ކުޅުނު ސެމީ ފައިނަލް މެޗުގައި ފުރަތަމަ ހާފުގެ ކުޅުން ފެށިގެން ދިޔައީ ހަމަހަމަ ކުޅުމަކާއެކުގައެވެ. ދެ ޓީމުންގެ ބޯޅަ ހިފަހައްޓައިގެން ހަމަލާތައް އުފައްދަން މަސައްކަތް ކުރަމުން ދިޔައެވެ. ފުރަތަމަވެސް ބެލެވިފައި އޮތީ އިންގްލަންޑް މޮޅުވާނޭ ކަމުގައެވެ. ސަބަބަކީ ރެކޯޑުތަކަށް ބަލާއިރު ޑެންމާކަށްވުރެ އިންގްލަންޑް މާ މޮޅުވުމެވެ. ވުމާއެކު ޑެންމާކް ކުޅެމުން ގެންދިޔައީ މޮޅު ޓީމަކާއެކު ކުޅެން އެންމެ ރަނގަޅު ގޮތަށް ކަމުގައި ރޭގެ މެޗު ދިރާސާކުރި ތަޖުރިބާކާރުން ވަނީ ބުނެފައެވެ. އަނެއްކޮޅުން އިންގްލަންޑް ކުޅެމުން ގެންދިޔައީ ދެރަނުވާން ވަރަށް ބޮޑަށް ބަލައިގެންނެވެ. މެދުތެރެއާއި ފަހަތަށް ބާރުބޮޑޫ ވިޔަނުދީ ވާނޭ ގޮތް ބަލައިގެންނެވެ.
މެޗުގެ ފުރަތަމަ ލަނޑު ޖަހާފައި ވަނީ ޑެންމާކުންނެވެ. އެއީ 30 ވަނަ މިނިޓުގައި ލިބުނު ހިލޭ ޖެހުމަކުން ޑެމްސްގާޑް ފޮނުވައިލީ ވަރަށް ރީތި ބޯޅައެކެވެ. އޭނާ ވަރަށް ބާރަށް ޖެހި ބޯޅަ ދިޔައީ އިންގްލަންޑްގެ ދިފާއީ ފާޜުގެ މަތުންނެވެ. ގޯލްކީޕަރަށް އެ ބޯޅަ ފެނުނީ ފާރު ހުރަސް ކުރިތަނާއެވެ. ވުމާއެކު ޑައިވް ކުރުމުގައި ފަޅި ސިކުންތެއްހާއިރު ލަސްވީއެވެ. މިއީ މި މުބާރާތުގައި މިހައިތަނަށް ޖެހި އެންމެ ރީތި އެއް ލަނޑެވެ. އަދި ހިލޭ ޖެހުމަކުން ޖެހި އެންމެ މޮޅު އެއް ލަނޑުވެސް މެއެވެ.
ޑެންމާކުން ލަނޑު ޖެހުމުން އިންގްލަންޑްގެ ކުޅުން ވަރުގަދަ ކުރިއެވެ. ހަލުވިކަމާއެކު ކުރިއަށް އަރައި ހަމަލާތައް އުފައްދަމުން ގެންދިޔައީ ހިފަހައްޓަން އުނދަގޫވާ ވަރަށެވެ. ނަތީޖާއަކީ ޑެންމާކް ލަނޑެއް ޖެހިތާ 9 މިނިޓު ފަހުން، މެޗުގެ 39 ވަނަ މިނިޓުގައި އިންގްލަންޑް ލަނޑެއް ޖެހުމެވެ. އެކަމަކު މި ލަނޑަކީ ބައިކޮޅަށް ޖެހި ލަނޑެއް ކަމަށް ވަނީ ނިންމައިފައެވެ. ބޯޅަ ގޯލު ތެރެއަށް ވަނީ ޑެންމާކްގެ ކެޕްޓަން ސިމޯން ކިއޭގެ އަރިކަށީގައި ޖެހިފައެވެ.
ފުރަތަމަ ހާފު ނިމުނީ ދެ ޓީމު 1 ލަނޑު 1 ލަނޑުން އެއްވަރުވެފައި އޮވެގެންނެވެ.
ދެވަނަ ހާފުގެ ކުޅުންވެސް ފެނުނީ ދާދި ހަމަހަމަ ގޮތަކަށެވެ. ޑެންމާކް ހިތްވަރު ލާފައި ހަމަލާއަށް އަރަމުން ދިޔައެވެ. އިންގްލަންޑުންވެސް ދިފާއު ވަރުގަދަކޮށް ބާއްވައިގެން ދޭތެރެދޭތެރެއިން ހަމަލާއަށް އަރަމުން ގެންދިޔައެވެ. އެކަމަކު ދެވަނަ ހާފު ނިމިޮގެން ދިޔައީ ދެ ޓީމުންކުރެ ޓީމަކަށް ލަނޑެއް ނުޖެހިއެވެ.
90 މިނިޓުގެ ކުޅުމުގައި ލަނޑެއް ނުޖެހުމުގެ ސަބަބުން 15 މިނިޓޓުގެ ދެ ހާފު ކުޅުނެވެ. އިތުރު ގަޑީގެ ފުރަތަމަ ހާފުގައި އިންގަލަންޑުން ލަނޑެއް ޖެހީ ލިބުނު ޕެނަލްޓީއެއްގައި ކެޕްޓަން ހަރީ ކޭންއެވެ. އެއީ މެޗުގެ 104 ވަނަ މިނިޓުގައެވެ. އޭނާ ފޮނުވާލު ބޯޅަ ޑެންމާކްގެ ގޯލްކީޕަރުި މަތަކުރިއެވެ. އެހެންނަމަވެސް ނަސީބު ދިމާޚުރި ގޮތުން އޭނާ މަތަކުރި ބޯޅް ނުކުތީ ސީދާ ހަރީ ކޭންއާ ދިމާއަށެވެ. އޭނާ ފަސޭހަ ކަމާއެކު އެ ބޯޅަ ގޯލުގެ ތެރެއަށް ފޮނުވާލިއެވެ. މި ޕެނަލްޓީއަކީ ރަނގަޅަށް ދެވުނު ޕެނަލްޓީއެއް ކަމަށް މެޗު ދިރާސާ ކުރަމުން ދިޔަ ތަޖުރިބާކާރުން ދަނީ ބުނަމުންނެވެ.
ޔޫރޯ 2020 ގެ ފައިނަލް މެޗު އޮންނާނީ އަންނަ އާދީއްތަ ދުވަހުގެރޭ މެންދަމު 12 ޖަހާއިރުއެވެ. ބައްދަލު ކުރާނީ އިޓަލީއާއި އިންގްލަންޑެވެ.
