ޔޫކްރެއިން 4 ލަނޑު 0 ލަނޑުން ބަލި ކުރުމަށް ފަހު އިންގްލަންޑް ޔޫރޯ 2020 ގެ ސެމީ ފައިނަލަށް ހިނގައްޖެއެވެ. މި މެޗަކީ އިންގްލަންޑް މިހައި ތަނަށް މި މުބާރާތުގައި ކުޅުނު ފަސޭހަ މެޗެވެ. އަދި ޔޫރަޕިއަން ޗެމްޕިއަންޝިޕެއްގައި އެންމެ ތަފާތު ބޮޑުކޮށް މޮޅުވީ މެޗުވެސްމެއެވެ.
އިންގްލަންޑްގެ ފުރަތަމަ ލަނޑު ޖަހާފައި ވަނީ މެޗުގެ 4 ވަނަ މިނިޓުގައި ކެޕްޓަމް ހަރީ ކޭންއެވެ. ދެވަނަ ލަނޑު ޖެހީ 46 ވަނަ މިނިޓުގައި މެގުވައަރއެވެ. ތިން ވަނަ ލަނޑު އަނެއްކާވެސް ޖެހީ 50 ވަނަ މިނިޓުގައި ހަރީ ކޭންއެވެ. ހަތަރު ވަނަ ލަނޑު ޖެހީ 63 ވަނަ މިނިޓުގައި ހެންޑަރސަންއެވެ.
މެޗުގައި ޔޫކްރެއިން އަކަށް މާ ރަނޅަކަށް ކުޅެވުނު ތަނެއް ނުފެނެއެވެ. ދޭތެރެދޭތެރެއިން އިންގްލަންޑްގެ އޭރިއާ ތެރެއަށް ވަން ނަމަވެސް ގޯލަށް ނުރައްކާޓެރިވާ ފަދަ ގޮތަކަށް ފޮނުވައިލެވުނީ އެންމެ ހަމަލާއެކެވެ. އެ ހަމަލާ ގޯލްކީޕަރު ދިފާއު ކުރީއެވެ.
އިންގްލަންޑުން ކުޅެމުން ގެންދިޔައީ ވަރަށް ވިސްނުންތެރިކަމާއެކު ބަލައިގެންނެވެ. ގިނަ ލަނޑު ޖަހަން އަބަދު ކުރިއަށް ކުޅުމުގެ ބަދަލުގައި ފަހަތަށް ފައިބައި ދިފާއު ކުރަމުން ދޭތެރެދޭތެރެއިން ހަމަލާއަށް އަހަރނމުން ގެންދިޔައީއެވެ.
ޔޫރޯ 2020 ގެ ސެމީ ފައިނަލުގެ ފުރަތަމަ މެޗު އޮންނާނީ 6 ޖުލައި 2021 ވާ އަންގާރަ ދުވަހުގެ ރޭ 12.00 ގައެވެ. ބައްދަލު ކުރާނީ އިޓްލީއާއި ސްޕެއިނެވެ. ދެވަނަ މެޗު އޮންނާނީ 7 ޖުލައި 2021 ވާ ބުދަދުވަހުގެ ރޭ 12.00 ގައެވެ. ބައްދަލު ކުރާނީ އިންގްލަންޑާއި ޑެންމާކެވެ.
