މިޔަންމާގެ އަސްކަރީ އިންގިލާބުގައި އުވާލާފައިވާ ގާނޫނުހަދާ މަޖިލީހުގެ ގިނަ މެންބަރު ފިއްލަވައިގެން އުޅުއްވާއިރު، އެބޭފުޅުން ވަނީ ރައްޔިތުންްގެ ސަރުކާރެއްގެ ގޮތުގައި އެއްބައިވަންތަ ސަރުކާރެއް އެކުލަވާލައްވާފައެވެ. މި ސަރުކާރުގައި މަޖިިލީހުންގެ މެންބަރުންގެ އިތުރަށް، އަސްކަރީ ވެރިކަމާ ދެކޮޅަށް ކުރާ އިހުތިޖާޖުތަކުގެ ލީޑަރުންނާއި، މިޔަންމާގައި ބައިމަދު ނަސްލުތަކުގެ މަންދޫބުން ހިމެނެއެވެ.
ކުރީގެ ސްޓޭޓް ކައުސިލާ އާންގް ސަންގް ސޫ ޗީ 'ހުންގާނުގައި ހުންނަވައިގެން' އެކުލަވާލި ގައުމީ އެއްބައިވަންތަކަމުގެ ސަރުކާރުގެ މަގުސަަދަކީ އަސްކަރީ ސަރުކާރު ނިމުމަކަށް ގެނައުމެވެ.
ފާއިތުވި ފެބުރުވަރީ މަހުގެ ފުރަތަމަ ދުވަހު އަސްކަރީ އިންގިލާބުގައި ސޫ ޗީގެ ސަރުކާރު ވައްޓާލި ފަހުން މިޔަންމާ ވަނީ ހަަމަނުޖެހުމުގެ ތެރެއަށް ވެއްޓިފައެެވެ. ސޫ ޗީ ސަަރުކާރުގެ 5 އަހަރު ފުރި ބޭއްވި އާއްމު އިންތިޚާބުގައި އޭނާއަށް ތާއީދުކުރާ ފަރާތްތަކުން ހޯދި ބޮޑު ކާމިޔާބީއާއެކު އާ ސަރުކާރެއް އެކުލަވާލަން ތައްޔާރުވެފައި ވަނިކޮށް އަސްކަރިއްޔާއިން ވަނީ އިންތިޚާބު އޮޅުވާލާފައިވާ ކަމަށް ބުނެ އިންގިލާބަކުން ވެރިކަން އަތުލާފައެވެ.
ގައުމީ އެއްބައިވަންތަކަމުގެ 'ހިޔަނި' ސަރުކާރު އެކުލަވާލިކަން އިއުލާންކޮށްފައި ވަނީ އިދިކޮޅު ފަބްލިކް ވޮއިސް ޓެލެވިޒަންގެ ފޭސްބުކް ސަފުހާގައެވެ.
"ރައްޔިތުންގެ ސަރުކާރަށް މަރުހަބާ ކިއުއްވާ" އެ ސަފުހާގައި އާއްމުކޮށްފައިވާ ވީޑިޔޯ ބަޔާނެއްގައި ޑިމޮކްރެސީއަށް ތާއީދުކުރައްވާ ލީޑަރު މިން ކޯ ނައިންގް ވިދާޅުވެފައި ވެއެވެ.
"އަހަރުމެން މަސަައްކަތް މިކުރަނީ މިކަން (އަސްކަރީ އިންގިލާބު) މުލުން ލުހެލަން. އެެެހެންކަމުން އަހަރުމެން ބޮޑެތި ގުރުބާނީތަކެއް ވާން ޖެހޭނެ." އޭނާ ވިދާޅުވިއެވެ.
އާ ސަރުކާރުގައި ޚާރިޖީ ވަޒީރުކަން ކުރައްވާ ސާސާ ވިދާޅުވި ގޮތުގައި އެ ސަރުކާރުގެ އެންމެ ބޮޑު މަސައްކަތަކަށް ވާނީ ބައިނަލް އަގުވާމީ ގޮތުން އެ ސަރުކާރު ގަބޫލުކުރުމެވެ. ދުނިޔޭގެ ގައުމުތަކުން އަސްކަރީ ސަރުކާރު ބަލައިގެންފައި ނުވާތީ، މިކަން ކާމިޔާބުކުރެވޭނެ ކަމުގެ ވަރަށް ބޮޑު ޔަގީންކަމެއް ގައުމީ އެއްބައިވަންތަކަމުގެ ސަރުކާރުގެ ވެރިންނަށް އެބައޮތެވެ.
މިޔަންމާ އެ ޖަމާއަތު މެންބަރެއްގެ ގޮތުގައި ހިމެނޭ އެސޯސިއޭޝަން އޮފް ސައުތު އީސްޓް އޭޝިޔަން ނޭޝަންސް (އާސިޔާން) އިން ދަނީ މިޔަންމާގެ މައްސަލައަށް ސުލްހަވެރި ހޯދުމަށް މަސައްކަތްކުރަމުންނެވެ. މި މައްސަލައާމެދު ބަހުސުކުރުމަށް މި ޖަމާއަތުގެ ވެރިންގެ ބައްދަލުވުމެއް މި އެޕްރީލް މަހުގެ 24 ވަނަ ދުވަހު އިންޑޮނޭޝިޔާގައި ބޭއްވުމަށް ވަނީ ހަމަޖެހިފައެެވެ.
