އދ.ގެ އިންސާނީ ހައްގުތަކާ ބެހޭ ކައުންސިލް، ޔުނައިޓެޑް ނޭޝަންސް ހިއުމަން ރައިޓްސް ކައުންސިލް (ޔޫއެެންއެޗްއާރްސީ) އިން ދާދި ފަހުން ސްރީލަންކާއާ ދެކޮޅަށް ފާސްކުރި ގަރާރަކީ، ގައުމު ކުރިއަރަން ނޭދޭ "އެތެރޭގެ އަދި ބޭރުގެ ބާރުތަކެއް"ގެ ކަމެއް ކަމަށާއި، ސްރީލަންކާ ޔޫއެންއެޗްއާރްސީގެ ފިއްތުންތަކަށް ބޯނުލަނބާނެ ކަމަށް ރައީސު ގޮތާބޭ ރާޖަޕަކްސާ ވިދާޅުވެއްޖެއެވެ.
ޔޫއެންއެޗްއާރްސީން ވަނީ ސްރީލަންކާގެ އިންސާނީ ހައްގުތަކުގެ ރިކޯޑާ ގުޅޭގޮތުން މި މާރިޗު މަހުގެ 23 ވަނަ ދުވަހު ގަރާރެއް ފާސްކޮށްފައެވެ. ލިބަރޭޝަން ޓައިގާސް އޮފް ޓެމިލް އީލާމް (އެލްޓީޓީ)އާ ދެކޮޅަށް ސްރީލަންކާއިން ކުރި ތިރީހަކަށް އަަަހަރުގެ ހަނގުރާމައިގައި ސަރުކާރު ސިފައިން ހިންގާފައިވާކަމަށް ބުނާ އިންސާނީ ހައްގުތަކާ ޚިލާފު އަމަލުތަކު ހެކި ބަަލައި ހޯދައި އެއްކުރުމުގެ ބާރު މިގަރާރުން ޔޫއެންއެޗްއާރްސީއަށް ލިބިދެއެވެ.
"އަހަރުމެން ދުވަހަކުވެސް (އެފަދަ) ފިއްތުންތަކަށް (ޔޫއެންއެޗްއާރްސީގެ ގަރާރަށް) ބޯނުލަނބާނަން. އަހަރުމެންނަކީ މިނިވަން ގައުމެއް. އިންޑިޔާ ކަނޑުގައި ހިނގާ ބޮޑެތި ބާރުތަކުގެ ވާދަވެރިކަމުގެ ޝިކާރައަކަށް އަަހަރުމެން ނުވާނަން." ޔޫއެންއެޗްއާރްސީގެ ގަރާރާ ގުޅޭގޮތުން ފުރަތަމަ ފަހަރަށް ވާހަކަފުޅުދައްކަވަމުން ރައީސު ގޮތާބޭ ރާޖަޕަކްސާ ވިދާޅުވިއެވެ.
ދެކުނުގައި އޮން މާތަރަ އަވަށުގައި އޮތް ބައްދަލުވުމުގައި ވާހަކަފުޅުދައްކަވަމުން އޭނާ ފާހަގަކުރެއްވި ގޮތުގައި އެ ގަރާރު ފާސްކުރުމަކީ އޭނާގެ ސަރުކާރުގެ ކުރިއެރުން ފެނި އެކަން ތަހައްމަލްނުވާ "އެެތެރެއާއި ބޭރުގެ ބާރުތަކަކުން" ކުރި ކަމެކެވެ.
ރައީސު ރާޖަޕަކްސާ ސިފަކުރެއްވި ގޮތުގައި 2015 ވަނަ އަހަރު އދ.ން ފާސްކުރި އިންސާނީ ހައްގުތަކާ ބެހޭ ގަރާރު ކުރީގެ ރައީސު މައިތުރިޕާލާ ސިރިސޭނާގެ ސަރުކާރުން ސްޕޮންސާކުރުމަކީ ގައުމަށް ވީ ޚިޔާނާތެކެވެ.
'ޕްރޮމޯޓިންގް ރިކޮންސިލިއޭޝަން، އެކައުންޓެބިލިޓީ އެންޑް ހިއުމަން ރައިޓްސް އިން ސްރީލަންކާ" ގެ ނަމުގައި ޔޫއެންއެޗްއާރްސީގެ 46 ވަނަ ސެޝަނަށް އެ ކައުންސިލްގެ 'ކޯގްރޫޕް އޮން ސްރީލަންކާ (މި ގްރޫޕުގައި ހިމެނެނީ އިނގިރޭސިވިލާތް، ކެނެޑާ، ޖަރުމަނު، މަލާވީ، މޮންޓެނީގްރޯ އަދި ނޯތު މެސެޑޯނިޔާ) އިން ހުށަހެޅި ގަރާރަށް ތާއީދުކޮށް ވޯޓު ދިނީ އެ ކައުންސިލްގެ މެންބަރު 47 ގައުމުގެ ތެރޭން 22 ގައުމެވެ. މި ސަރަހައްދުގެ ގައުމުތައް ކަަމަށްވާ ބަންްގްލާދޭޝްއާއި ޕާކިސްތާނުގެ އިތުރުން ޗައިނާ އަދި ރަޝިޔާ ހިމެނެނީ ގަރާރާ ދެކޮޅަށް ވޯޓު ދިން 11 ގައުމުގެ ތެރޭގައެވެ. 14 ގައުމެއް ވޯޓުގައި ބައިވެރިވެފައި ނުވެއެވެ. މި ގައުމުތަކުގެ ތެރޭގައި އިންޑިޔާ، ނޭޕާލް، ޖަޕާން އަދި އިންޑޮނޭޝިޔާ ހިމެނެއެވެ.
ދާޚިލީ ހަނގުރާމައިގައިން ހިންގާފައިވާ ކަމަށް ބުނާ އިންސާނީ ހައްުގުތަކާ ޚިލާފު އަމަލުތަކާ ގުޅޭ އަވަސް، ފުރިހަމަ، ވަކިފަރާތަކަށް ނުޖެހޭ ތަހުގީގެއް ސްރީލަންކާ ސަރުކާރުން ހިންގުމަށް މިގަރާރުގައި ގޮވާލާފައި ވެއެވެ.
ސްރީލަންކާ ސަރުކާރުގެ ހިިސާބުތައް ދައްކާ ގޮތުގައި 1983 އިން 2009 އަށް ދެމިގެންދިޔަ މި ހަނގުރާމައިގައި 20 ހާސް މީހުން ވަނީ ވީނުވީއެއް ނޭނގި ގެއްލިފައެވެ. ތަމަޅައިން ބުނާ ގޮތުގައި ގެއްލިފައިވާ މީހުންގެ އަދަދު ލައްކައަކަށް އަރައެވެ.
