އާސްޓްރާޒެެނެކާއާއި އިންޑިޔާގެ ސީރަމް އިންސްޓިއުޓާ ދެމެދު ވެފައިވާ އެއްބަސްވުމުގެ ދަށުން އިންޑިޔާގައި އުފައްދާ އޮކްސްފޯޑް-އާސްޓްރާޒެނެކާގެ ކޮވިޑް-19 ވެކްސިން، 'ކޮވިޝީލްޑް' އެކްސްޕޯޓްކުރުން އިންޑިޔާއިން މެދުކަނޑާލައިފިއެެެވެ.
އިންޑިޔާގެ ފޮރިން މިނިސްޓްރީގެ މަސްދަރަކާ ހަވާލާދީ ބައިނަލްއަގުވާމީ ޚާބަރުފަތުރާ ބައެއް ވަސީލަތްތަކުން ބުނެފައިވާ ގޮތުގައި، އިންޑިޔާގައި ކޮވިޑް-19 ގެ ހާލަތު ގޯސްވެ ޕޮޒިޓިވްވާ މީހުން އިތުރުވަމުން ދާތީ ކުރިއަށް އޮތް ދުވަސްތަކުގައި އިންޑިޔާއަށް ވެކްސިން ބޭނުންވާ ވަރު ވަރަށް ބޮޑުތަން އިތުރުވެެގެން ދާނެއެވެ. އެހެންކަމުން، އިންޑިޔާއަށް ބޭނުންވާ ވަރަށް ވެކްސިން ނުލިބިދާނެތީ މިފިޔަވަޅު އެޅީއެވެ.
އޮފިޝަލުން "ވަގުތީ ފިޔަވަޅެއް"ގެ ގޮތުގައި ސިފަކޮށްފައިވާ މިފިޔަވަޅުގެ އެޕްރީލް މަސް ނިމެންދެން ކުރިއަށް ދާނެކަމަށް ބެލެވެއެވެ.
މިފިޔަވަޅުގެ ސަބަބުން އެންމެ ބޮޑު އަސަރެއް ކުރާނެކަމަށް ބެލެވެނީ ފަގީރު އަދި މެދުފަންތީގެ ގައުމުތަކަށް ވެކްސިން ލިބޭނެކަން ކަށަވަރުކުރުމަށް ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) އިސް ނަގައިގެން ހިންގާ ކޮވެކްސް ޕްރޮގްރާމުގައި ބައިވެރިވެފައިވާ 190 ގައުމަށެވެ.
ދުނިޔޭގައި ވެކްސިން އުފައްދާ އެންމެ ބޮޑު ކުންފުނި، ސީރަމް އިންސްޓިޓިއުޓް އޮފް އިންޑިޔާއި ބްރެޒީލާއި، އިނގިރޭސިވިލާތާއި، ސައޫދީ އަރަބިއްޔާއާއި، މޮރޮކޯ (މަޣުރިބު) ފަދަ ބައެއް ގައުމުތަކަށް ފޮނުވަން ތައްޔާރުކޮށްފައިވާ ވެކްސިން ޝިޕްމަންޓްތައް ވެސް މިހާރު ވަނީ ނުފޮނުވަން ނިންމާފައެވެ.
އިންޑިޔާއިން މިހާތަނަށް 76 ގައުމަކަށް 60 މިލިއަން ޑޯޒްގެ ވެކްސިން އެކްސްޕޯޓްކޮށްފައެވެ.
ވެކްސިން އެކްސްޕޯޓްކުރަން އިންޑިޔާއިން ނިންމިއިރު އިންޑިޔާގައި ކޮވިޑް-19 އަށް ޕޮޒިޓިވްވާ މީހުން ވަނީ ވަރަށް ބޮޑަށް އިތުރުވެފައެވެ. އިއްޔެއަކީ މިއަހަރު އިންޑިޔާގައި އެންމެ ގިނަ މީހުން ޕޮޒިޓިވްވި ދުވަހެވެ. އިއްޔެ 47 ހާސް މީހުން ޕޮޒިޓިވްވެ 275 މީހުން މަރުވެފައި ވެއެވެ.
އެހެންކަމުން، އިންޑިޔާ ސަރުކާރުން ނިންމާފައި ވަނީ އަންނަ އެޕްރީލް މަހުން ފެށިގެން އުމުރުން 45 އަަހަރުން މަތީގެ އެންމެންނަށް ވެކްސިން ޖެހުމުގެ ޕްރޮގްރާމެއް ފަށާށެވެ.
ސީރަމް އިންސްޓިޓިއުޓުން ކުރިން ބުނެފައިވާ ގޮތުގައި މިއަހަރު ތެރޭގައި އެތަނުން އެއްބިލިއަން ޑޯޒްގެ ވެކްސިން އުފައްދާނެއެވެ.
އިންޑިޔާއިން 16 ޖަނަވަރީގައި ފެށި ވެކްސިން ޖެހުމުގެ ޕްރޮގްރާމުގެ ދަށުން މިހާތަނަށް ވެކްސިން ޖަހާފައި ވަނީ 47 މިިލިއަން މީހުންނަށެވެ. ސަރުކާރުގެ އަމާޒަކީ ކުރިއަށް އޮތް 7 މަސްދުވަހުގެ ތެރޭގައި 600 މިލިއަން ޑޯޒް ވެކްސިން ޖެހުމެވެ.
