އުތުރު ތިލަފަޅު ތަރައްޤީކުރުމާ ގުޅޭގޮތުން އިންޑިއާއާއި ދިވެހިރާއްޖެއާ ދެމެދު ސޮއިކުރި އެއްބަސްވުންކަމަށް ބުނެވޭ އެއްބަސްވުމެއް ލީކުކޮށްލި މައްސަލާގައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ.
މިމައްސަލަ ހުށަހެޅީ އުތުރު ތިލަފަޅު އެއްބަސްވުމާ ގުޅޭގޮތުން ހަގީގަތާއި ޚިލާފްވާހަދައްކާ މީހުންނާއި ހަޤީގަތާ ޚިލާފު "ފޭކު" އެއްބަސްވުންތައް ލީކު ކުރަމުންދާ މީހުންނާއިމެދު ޤާނޫނީ ފިޔަވަޅުއެޅުމަށް ގޮވާލުމަށެވެ. މި މައްސަލަ މަޖިލީހަށް ހުށަހެޅުއްވީ ސަރުކާރު ހިންގާ މައި ޕާޓީއަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ އަލިފުށީ ދާއިރާގެ މެމްބަރު މުހައްމަދު ރަޝީދު ހުސެއިނެވެ. ޖަލްސާގައި ބައިވެރިވެވަޑައިގެންނެވި 38 މެމްބަރުން ވޯޓުން ކުއްލި މައްސަލަ ބަލައި ގަތުމަށް ފާސްވެ މިމައްސަލާގައި މަޖިލީހުގައި ބަޙުސްކޮށްފައިވެއެވެ.
މިމައްސަލާގައި ބުނެފައިވަނީ އުތުރު ތިލަފަޅު އެއްބަސްވުމަކީ 2013 ވަނަ އަހަރުން ފެށިގެން ނިމިދިޔަ ސަރުކާރުތަކުން މި އެއްބަސްވުން ހެދުމަށް މަސައްކަތްކޮށްފައިވާ އެއްބަސްވުމެއްކަމަށެވެ. އަދި 2016 ވަނަ އަހަރު އޭރުގެ ސަރުކާރުން އިންޑިޔާއަށް ކަނޑައަޅުއްވާފައި ހުންނަވާ ސަފީރު މި އެއްބަސްވުން ހަދާފައިވާކަމަށްވެސް މަޖިލީހަށް ހުށަހެޅި ކުއްލި މައްސަލާގައިވެއެވެ.
އަދި މިއެއްބަސްވުމަކީ ރާއްޖޭގެ މިނިވަންކަމާއި އިސްތިޤުލާލަށް އެއްވެސް އުނިކަމެއް ނާންނާނެގޮތަށް އެކުލަވާލާފައިވާ އެއްބަސްވުމެއްކަމަށާ، ކުރީގެ ސަރުކާރުން އެކުލަވާލި އެއްބަސްވުމަށް ބައެއް ބަދަލު ގެނެސް ޤައުމީ އިސްތިޤުލާލު ދެމެހެއްޓުމަށް ފިޔަވަޅުތަކެއް އަޅާފައިވާކަމަށްވެސް މިއަދު ހުށަހެޅި މައްސަލާގައި ވެއެވެ.
މިމައްސަލާގައި މަޖިލީހުގައި ވާހަކަ ދެއްކެވި އެމްޑީޕީއަށް ނިސްބަތްވެވަޑައިގަންނަވާ މެމްބަރުން ވަނީ "ފޭކް" އެއްބަސްވުމެއްކަމަށް ބުނާ އެއްބަސްވުން ލީކުކޮށްލި ކުރީގެ ހޯމް މިނިސްޓަރ ޢުމަރު ނަޞީރަށް ވަރަށްބޮޑަށް ފާޑުވިދާޅުވެ އޭނާ ހައްޔަރުކުރުމަށްވެސް ގޮވާލައްވާފައެވެ. އަދި އުތުރު ތިލަފަޅުގެ އެއްބަސްވުން ދިފާޢުކޮށް ވާހަކަދައްކަވާފައެވެ. އުތުރުތިލަފަޅުގެ އެއްބަސްވުމުގައިވާ މައުލޫމާތު ކަމަށްބުނެ މީޑިއާގައި ފެތުރެމުންދާ ވާހަކަތައް ދޮގުކުރައްވައި އިއްޔެ ޑިފެންސް މިނިސްޓްރީންވެސް ވަނީ ބަޔާނެއް ނެރުއްވާފައެވެ.
އެހެންނަމަވެސް އެއްބަސްވުން ލީކުކޮށްލި ޢުމަރު ނަޞީރު ވިދާޅުވެފައިވަނީ އެއީ ޞައްޙަ އެއްބަސްވުމެއްކަމަށާ، އެއީ ދިވެހި ސަރުކާރާއި އިންޑިއާއާ ދެމެދު ސޮއިކުރި ރަސްމީ އެއްބަސްވުމުގެ ސްކޭން ކޮޕީއެއްކަމަށެވެ. އެއްބަސްވުމާގުޅޭ ވަރަށްގިނަ މަޢުލޫމާތު ލިބިވަޑައިގެންފައިވާކަމަށާ، އަދިވެސް އިތުރު މަޢުލޫމާތުތައް ލީކުކުރައްވާނެކަމަށްވެސް ޢުމަރު ވިދާޅުވެފައިވެއެވެ. ލީކުކޮށްފައިވާ އެއްބަސްވުމުގައި ވާ މަޢުލޫމާތުތަކަށް ބަލާއިރު އިންޑިއާގެ ސިފައިން ހަތިޔާރާއެކު އުތުރު ތިލަފަޅުގައި ދިގު މުއްދަތަކަށް ޤާއިމުވެ ތިބުމަށް ވަނީ އެއްބަސްވެފައެވެ. އަދި އެމުއްދަތުގައި އެސަރަޙައްދަށް ރާއްޖޭގެ އިމިގްރޭޝަންގެ ބާރުވެސް ނުހިނގާނެކަމަށް ބުނެފައިވެއެވެ.
ލީކުވީ ފޭކް އެއްބަސްވުމެއްކަމަށާ، އެއީ ހަޤީގަތެއްނެތް ވާހަކަތަކެއްކަމަށް ސަރުކާރުން ވިދާޅުވާތީ، ނޫސްވެރިންނާއި އިދިކޮޅު ސިޔާސީ ފަރާތްތަކާއި އެނޫންވެސް ބައެއް މީހުންދަނީ އުތުރު ތިލަފަޅުގެ އަސްލު އެއްބަސްވުން ހާމަކުރައްވައި އުފެދިފައިވާ ޝައްކުތައް ފިލުވައިދެއްވުމަށް ސަރުކާރަށް ގޮވާލަމުންނެވެ. އެހެންނަމަވެސް މިހާތަނަށް މި އެއްބަސްވުން ހާމަކުރައްވާކަށް ސަރުކާރުން އެއްބަސްވެވަޑައެއް ނުގަންނަވައެވެ.
