ޖަލުތަކުގައި ބަންދުކޮށްފައި ތިބި ގައިދީންނަށްވެސް ކޯވިޑް އިން ދިފާޢުވުމަށް ޖަހާ ވެކްސިން، ޖެހުމަށްވެސް ނިންމާފައިވާކަން ހެލްތް އިމަރޖެންސީ އޮޕަރޭޝަން ސެންޓަރު (އެޗްއީއޯސީ)އިން ހާމަކޮށްފިއެވެ.
އެސެންޓަރުގައި ބޭއްވި ނޫސްވެރިންގެ ބައްދަލުވުމުގައި ތަރުޖަމާނު ޑރ.ފާޠިމަތު ނަޒްލާ ވިދާޅުވެފައިވަނީ ޖަލުތަކުގައި ވެކްސިން ޖެހުމުގެ އިންތިޒާމްތައް މިހާރު ހަމަޖައްސަމުންދާކަމަށެވެ. އަދި ޖަލަށްގޮސް ޤައިދީންނަށް ވެކްސިން ޖަހާނެ އެސެންޓަރުގެ ޓީމްތައް ތަމްރީންކުރުމުގެ މަސައްކަތްވެސް މިހާރު ވަނީ ނިންމާފައިކަމަށް އޭނާ ވިދާޅުވިއެވެ.
ރާއްޖޭގައި ކޮވިޑް-19ގެ ޙާލަތު ވަރަށްބޮޑަށް ގޯސްވެފައިވާއިރު، ވެކްސިން ޖެހުމުގެ ކަންކަން ދަނީ ކުރިއަށެވެ. އެގޮތުން އަތޮޅުތަކާއި މާލޭގައި އެތައް ސެންޓަރަކުން ވެކްސިން ދެމުންދެއެވެ. މާލޭގައި މޮބައިލް ޓީމުތަކެއްވެސް ވެކްސިން ޖެހުމުގައި ޙަރަކާތްތެރިވަމުން ދެއެވެ.
