ރާއްޖޭގެ ބައެއް ސިޔާސީ ޕާޓީތަކުގެ އެތެރޭގެ އިންތިޚާބުތަކުގެ ތެރެއަށް ބޭރުގެ ބައެއް ޤައުމުތަކުން ކަޅު ފައިސާ ހޭދަކޮށް އެމީހުންގެ ނުފޫޒުގަދަކޮށްފައިވާކަމަށާ، އޭގެ ސަބަބުން ރާއްޖޭގެ ޤައުމީ ސަލާމަތާއި މިނިވަންކަމަށް ބުރޫ އަރާފައިވާކަމަށް ކުރީގެ ހޯމް މިނިސްޓަރ ޢުމަރު ނަޞީރު ވިދާޅުވެއްޖެއެވެ.
ދިވެހި ނެޝަނަލް އެކްޝަން (ޑީއެންއޭ)ގެ ނަމުގައި މިރޭ އިފްތިތާޙުކުރި ޤައުމީ ޙަރަކާތުގެ ފުރަތަމަ ޖަލްސާގައި ވާހަކަފުޅުދައްކަވަމުން ޢުމަރު ނަޞީރުވަނީ ވެރިކަންކުރާ މައި ޕާޓީ އެމްޑީޕީއާއި މިހާރުގެ ސަރުކާރަށް އިޝާރާތްކުރައްވައި ބޮޑެތި ފާޑުކިއުންތަކެއް އަމާޒުކުރައްވާފައެވެ. ރާއްޖޭގެ މިނިވަންކަން ގެއްލޭ މިންވަރަށް މިހާރު ރާއްޖޭގައި ބޭރުގެ ނުފޫޒާއި ބާރު އޮތްކަމަށާ، ބައެއް ޤައުމުތަކުގެ ސިފައިން ރާއްޖޭގެ އެކި ކަންކޮޅުތަކުގައި ޤާއިމުވެ އެބަތިބިކަމަށް ޢުމަރުވަނީ ތުހުމަތުކުރައްވާފައެވެ. އަލަށް އެކުލަވާލި ޤައުމީ ޙަރަކާތަކީ މިކަންކަމުން ޤައުމު ސަލާމަތްކޮށް މިނިވަންކަމަށް މަސައްކަތްކުރާނެ ބައެއްކަމަށް ޢުމަރު ވިދާޅުވިއެވެ.
ރާއްޖޭގެ މަލްޓިޕާޓީ ނިޒާމާއި، ޕާޓީތަކަށް އަދި ސިޔާސީ ލީޑަރުންނަށް ފާޑުވިދަޅުވެ ވާހަކަފުޅުދައްކަވަމުން ޢުމަރު ވިދާޅުވީ އެކިއެކި ސިޔާސީ ލީޑަރުން ވެރިކަމަށްވަޑައިގެން އެކި ކުލައިގެ ޕާޓީތަކުން ގައުމު ހިންގައިފި ކަމަށާ އެހެންނަމަވެސް މިހާތަނަށް އައިއިރު ރާއްޖެއަށް ދިމާވެފައިވާ ބޮޑެތި މައްސަލަތަކަށް ޙައްލެއް ގެނެވިފައި ނުވާކަމަށެވެ. އެހެންކަމުން ޓެސްޓްކުރެވިފައިވާ ސިޔާސީ ލިޑަރުންޏާމެދު ދެން އިތުރަށް ކުރާނެ އުންމީދެއް ނެތްކަމަށް ޢުމަރު ވިދާޅުވިއެވެ. ދިވެހި ނެޝަނަލް އެކްޝަން އަކީ ގައުމު އިސްލާހު ކުރުމަށް އެކުލަވާލި "ޑްރީމް ޓީމެއް"ގެ ގޮތުގައި ޢުމަރު ސިފަކުރެއްވިއެވެ.
" މިއަދު ދިވެހިން އިންތިޒާރުކުރަނީ ތަޢުލީމާއި ތަޖުރިބާ ހުރި، ތެދުވެރި، އިޚްލާސްތެރި، ހަރުދަނާ ޓީމެއް ފެންނާނެ ދުވަހަކަށް. މި ދައުލަތް އަލުން ތަރުތީބުކޮށްދޭނެ އާ ބަޔަކަށް، އާ ހަރަކާތަކަށް، ޤައުމީ ޙަރަކާތަކަށް ދިވެހި ވަޠަން ދިވެހިންނަށް އަނބުރައި ހޯދައިދޭނެ ޙަރަކާތަކަށް. މިސަބަބުތަކަށްޓަކައި ސިޔާސީ ގޮތުންނާއި ތަޢުލީމީ ގޮތުންނާއި ހަރުދަނާކަމުގެގޮތުން ޤާބިލް، އެތައްބަޔަކު ޖަމާވެ ، ޑްރީމް ޓީމެއް އެކުލަވާލައި ، މިރާއްޖެ މުޅިން އާ މިސްރާބަކަށް ގެންދިއުމަށްޓަކައި، ދިވެހި ޤައުމީ ޙަރަކާތުގެ ނަމުގައި މުޅިން އާ ޙަރަކާތެއް އުފެއްދުމުގެ މަސައްކަތް އަޅުގަނޑުމެން އެތައްބަޔަކު ގުޅިގެން ފަށައިފިން." ޢުމަރު ނަޞީރު މިރޭ ވިދާޅުވިއެވެ.
ޢުމަރު ވިދާޅުވީ ރާއްޖޭގައި އާ ޤާނޫނު އަސާސީއަކާއެކު، ޚިޔާލު ފާޅުކުރުމުގެ މިނިވަންކަންފަދަ އަސާސީ އެތައް ހައްޤެއް ލިބިދިން ގިނަ ޕާޓީ އެކުލެވޭ ނިޒާމެއް އުދުމުން ރައްޔިތުން ކުރި އެއްވެސް އުންމީދެއް ޙާސިލް ނުވިކަމަށެވެ. އޭގެބަދަލުގައި ސިޔާސީ މަސައްކަތަކީ ހެޔޮލަފާ ރަނގަޅު މީހުން ކައިރިވާން ފަސްޖެހޭ ކަމަކަށް މިހާރު ވެއްޖެކަމަށާ، މިހާރު ސިޔާސީ މަސައްކަތްތައް ހާއްސަވެފައިވަނީ ވައްކަން ކުރާމީހުންނާއި ނުކިޔަވާތިބި ތަންދޮރު ނުދަންނަ މީހުންނަށްކަމަށެވެ. ރާއްޖޭގައި މިނިޒާމު ޤާއިމުކުރިތާ 16 އަހަރުވީ އިރު ރައްޔިތުންވަނީ ޕާޓީ ނުޒާމުމަތިން ފޫހިވެފައިކަމަށް ޢުމަރު ވިދާޅުވިއެވެ.
ޢުަމރު ވިދާޅުވީ މިޙާރު ކުރަންޖެހިފައިވާ ޤައުމީ މި މަސައްކަތަކީ، ގޯޅިގޯޅި ކަންމަތީގައި، ޓްވިޓާގައާއި ފޭސްބުކްގައި ވާހަކަދައްކައިގެން ކުރެވޭވަރަށްވުރެ ބޮޑު މަސައްކަތެއްކަމަށެވެ. ނިކުންނަން ޖެހޭނީ ސީދާ ސިޔާސީ ރޭހަކަށް ކަމަށެވެ.
