ކޯވިޑް-19 ގެ ދިވެހިރާއްޖޭގެ ހާލަތަށް ބަލާއިރު ދިވެހިރާއްޖެ މިހާރު މި އޮތީ އެންމެ ވަރުގަދަ ރާޅުގެ ތެރޭގައި ކަމަށް ޑރ. ނަޒްލާ ރަފީޤް ވިދާޅުވެއްޖެއެވެ. މިއަދު ކުރައްވައިފައިވާ ޓުވީޓުގައި ނަޒްލާ ވިދާޅުވެފައިވާ ގޮތުގައިބަލި ޖެހިގެން ހަސްފަތާލުގައި ބާއްވާ މީހުންގެ އަދަދު ވަނީ ސަމާލުވާން ޖެހޭ ދަރަޖައަށް އިތުރު ވެފައެވެ. އޭނާ ވިދާޅުވާ ގޮތުގައި މިހާރު ބާކީ ހުރީ މަދު އެނދެކެވެ. ގައުމު އޮތީ ނުރައްކާތެރި ހާލަތެއްގައެވެ.
ޓުވީޓުގައި ނަޒްލާ އެދިވަޑައިގެންފައި ވަނީ ބަލި ކޮންޓުރޯލު ކުރުމަށްޓަކައި އެޗްޕީއޭއާއި ކަމާ ބެހޭ އިދާރާތަކުން ކުރާ މަސައްކަތުގައި ރައްޔިޮތުން އެއްބާރުލުން ދެއްވާށެވެ. އޭނާ ފާހަގަ ކުރައްވާފައިވާ ގޮތުގައި ބަލި ޖެހޭ އަދަދު މަދު ކުރުމަކީ ވަރަށް ކުޑަ ކަމަކުން ކުރެވޭން އޮތް އާދައިގެ ކަމެކެވެ. ރައްކާތެރިކަމާއެކު ތިބުމަށްޓަކައި އޭނާ ފަސް ކަމެއް ފާހަގަ ކުރައްވައިފައި ވެއެވެ. އެއީ ސައިބޯނި ލައިގެން ގިނަގިނައިން އަތް ދޮވުމާއި، މާސްކު އަޅައިގެން އުޅުމާއި، ބޭރަށް ނުކުމެ ނުވަތަ ތަންތަނަށް ވަދެ ނިކުމެ އުޅުމުގައި ތިން ފޫޓުގެ ގައިދުރުކަމެއް ހިފެހެއްޓުމާއި، ގިނަ މީހުން އެއްތަނަކަށް ބޮނޑިވެގެން ނޫޅުމާއި، ވީވަރަކުން ގޭގައި މަޑުކުރުމެވެ.
