ކަޝްމީރުގެ މުސްލިމުންގެ ހައްގުގައި ވާހަކަފުޅުދައްކަވަމުން ގެންދެވި ޖޯ ބައިޑެން އެމެރިކާގެ ރައީސްކަމަށް އިންތިޚާބުވުމަކީ އިންޑިއާ ސަރުކާރަށް ކުރިމަތިވި ވަރަށް ބޮޑު ގޮންޖެހުމެކެވެ. އެހެނީ ބައިޑެން ވަނީ ރައީސްކަމަށް އިންތިޚާބުވެވަޑައިގަތުމުގެ ކުރިން އެތައް ފަހަރަކު ކަޝްމީރު ރައްޔިތުންގެ ހައްގުގައި ވާހަކަފުޅުދައްކަވާފައެވެ. ކަޝްމީރުގެ ރައްޔިތުންނަށް އިތުރު މިނިވަންކަން ދިނުމާ ގުޅޭގޮތުންނެވެ. ކަޝްމީރުގެ ރައްޔިތުންނަށް ބާރާއި އިޚުތިޔާރު ދިނުމާގުޅޭގޮތުންނެވެ.
ހައްދުފަހަނަޅާފައިވާ ހިންދޫންނަށް އަބަދުވެސް ތާއިދުކުރައްވާ ބޮޑު ވަޒީރު ނަރެންދުރަ މޯދީގެ ސަރުކާރުން ވަނީ ކަޝްމީރަށް އިންޑިއާގެ ގާނޫނުއަސާސީން ލިބިދީފައިވާ ޚާއްޞަ ހައިސިއްޔަތު ނިގުޅައިގަތުމަށްފަހު ކަޝްމީރު އިތުރަށް ބައިކޮށް ކަޝްމީރުގެ ރައްޔިތުންނަށް ލިބިދީފައިވާ ބާރުތައް ނައްތާލައްވާފައެވެ. އިންތިޚާބީ ރައީސް ބައިޑެން ވަނީ ކުރިންވެސް އޮތްގޮތަށް ކަޝްމީރުގެ ބާރުތައް އަލުން އިއާދަކުރުމަށް ގޮވާލައްވާފައެވެ. ކަން އެހެން އޮތުމުން ކަޝްމީރުގެ ރައްޔިތުން ދެކެނީ ބައިޑެންއަކީ އެމީހުންގެ އުއްމީދުތައް ހަގީގަތަކަށް ހައްދައިދެއްވާނޭ ރައީސެއްގެ ގޮތުގައެވެ.
ބައިޑެން ކެމްޕޭނަށް މަސައްކަތްކުރެއްވި ދުވަސްވަރު ބައިޑެން ވަނީ މުސްލިމުންނާއި އެމެރިކާއަށް ހިޖުރަކޮށްފައި ތިބި އެކި ގައުމުތަކުގެ މީސްމީހުންނާމެދު ހެއުކޮށް ހިއްތަވައި އިންސާފުން ކަންތައްކުރައްވާނޭކަމަށް ވައުދުވެވަޑައިގެންފައެވެ.
ބައިޑެންއަކީ އިންސާނީ ހައްގުތައް ހިމާޔަތްކުރައްވައި ރައްޔިތުންނަށް އިންސާނީ ހައްގުތައް ކަށަވަރުކޮށްދެއްވުމަށް މަސައްކަތްކުރައްވަމުންގެންދަވާ ބޭފުޅެކެވެ. މިޔަންމާގެ ސަރުކާރުން ރޮހިންޔާ މުސްލިމުން ގަތުލުކުރުމުގެ އިތުރަށް އެބައިމީހުންނަށް ދެމުންދާ އަނިޔާތަކާއި ޗައިނާގެ ޔަޣޫރު މުސްލިމުންނަށް ކުރިމަތިވަމުންދާ މަޖުބޫރީ ހާލަތުން އެބައިމީހުން މިންޖުކުރެއްވުމަށް އެދިވަޑައިގެން ބައިޑެން ވަނީ އަޑުއުފުއްލަވާފައެވެ.
ޖޯ ބައިޑެން 77އ ވަނީ ރައީސް ބަރަކް އޮބާމާގެ ދެ ދައުރުގައި ވެސް އެމެރިކާގެ ނައިބު ރައީސްކަމުގެ މަގާމު 8 އަހަރު ކުރައްވާފައެވެ.
ޖޯ ބައިޑެން ރައީސްކަމުގެ ހުވައި ކުރައްވައި އެމެރިކާގެ ރައީސްކަމާ ހަވާލުވެވަޑައިގަންނަވާނީ ޖެނުއަރީ މަހުގެ 20 ވަނަ ދުވަހުގައެވެ.
