ފަލަސްޠީނުގެ ރައީސު މަޙްމޫދު ޢައްބާސް އެމެރިކާގެ ޔަހޫދީންގެ ޖަމްއިއްޔާ، އެމެރިކަން ޖުވިޝް ކޮންގްރެސް،ގެ ރައީސު އަދި އެމެރިކާގެ މަހުޖަނު ރޮން ލައުޑާއާ ބައްދަލުކުރައްވައިފިއެވެ.
މިބައްދަލުވުން ބޭއްވުުނު ކަން ހާމަކުރެއްވީ ފަލަސްޠީނުގެ ސިވިލް އެފެއާޒް މިނިސްޓަރު ޙުސައިނު އައްޝައިޚް ކުރެއްވި ޓުވީޓެއްގައެވެ. އޭނާގެ ޓުވީޓުގައި ވިދާޅުވެފައިވާ ގޮތުގައި ރައީސު ޢައްބާސް ވަނީ ރާމަﷲ ގައި ހުންނަ ޕެެލެސްޓައިން ނޭޝަނަލް އޮތޯރިޓީގެ މައި މަރުކަޒުގައި އެމެރިކާގެ ވިޔަފާރިވެރިޔާ، އަދި އެމެރިކަން ޖުވިޝް ކޮންގްރެސްގެ ރައީސު ރޮން ލައުޑާއާ ބައްދަލުކުރައްވާފައެވެ.
އިސްރާއީލުގެ ބެންޖަމިން ނަތަންޔާހޫއާއި އެމެރިކާގެ ރައީސު ޑޮނާލްޑް ޓްރަމްޕްއާ ގާތް ގުޅެމެއް އޮންނަ ލައުޑާ ފަލަސްޠީނަށް އައިސް ރައީސު ޢައްބާސާ ބައްދަލުކުރުމީ އެމެރިކާގެ ސުލްހައިގެ މަޝްރޫއަށް ފަލަސްޠީނުގެ ތާއީދުހޯދުމަށް ކުރާ މަސައްކަތެއް ކަމުގައި ވަރަށް ބޮޑަށް ބެެލެވެއެެވެ.
ފަލަސްޠީނު މަސްދަރަކުން ބައެެއް އަރަބި ނޫސްތަކަށް މައުލޫމާތު ދީފައިވާ ގޮތުގައި ފަލަސްޠީނު-އިސްރާއީލުގެ މަޝްވަރާތައް އަލުން ފަށާނެ ގޮތަކާއި، ފަލަސްޠީނުގައި ބާއްވަން ހަމަޖެހިވާ އިންތިޚާާބާ ބެހޭގޮތުން ވާހަކަ ދެކެވުނެވެ. އެ މަސްދަރުން ހާމަކުރި ގޮތުގައި ފަލަސްޠީނުގެ ރައީސު ވަނީ ފަލަސްޠީނު ނިންމުމަކީ އެއްވެސް ސިޔާސީ ފިކުރަކާއި ގުޅިފައި ނުވާ މިިނިވަން ނިންމުމެެކެވެ.
ޢައްބާސް ވަނީ 2021 ވަނަ އަހަރު ބާއްްވާ ސުލްހައިގެ ކޮންފަރެންސެއްގައި ބައިވެރިވެވަޑައިގަންނަވަން އެއްބަސްވެވަޑައިގެންފައެވެ. އެހެންނަމަވެސް، ރައީސު ޓްރަަމްޕްގެ މެދުއިރުމަތީ ސުލައިގެ ޕްލޭން ގަަބޫލުފުޅުކުރެއްވުމަށް ތަކުރާރުކޮށް ދެކޮޅުހައްދަވާފައެވެ.
ފާއިތުވި ސެޕްޓެންބަރު މަހުގެ 15 ވަނަ ދުވަހު ވައިޓް ހައުސްގައި އޮތް އިސްރާއީލު ބަހްރޭން އަދި ޔޫއޭއީއެކު ސުލްހައިގެ އެއްބަސްވުމުގައި ސޮއިކުރުމުގެ ރަސްމިއްޔާތުގައިވެސް ބައިވެރިވި ލައުޑާ ވަނީ މީގެ އެއް އަހަރު ކުރިން ނިއުޔޯކުގައި ރައީސު މަޙްމޫދު ޢައްބާސާ ބައްދަަލުކޮށްފައެވެ.
ލައުޑާ ޢައްބާސާ ބައްދަލުުރިއިރު ރައީސު ޓްރަމްޕްެގެ ސިޓީފުޅެއް ގެނެސްފައިވާ ނުވާކަން ފަލަސްޠީނުގެ މަސްދަރުކަތުން ވަނީ ޔަގީންކޮށްދީފައެވެ.
