ނ. މަނަދޫން ކޮވިޑަށް ޕޮޒިޓިވްވި މީހާގެ ކޮންޓެކްޓުންގެ ޢަދަދު 26 އަށް އަރައިފައިވާ ކަމަށް މަނަދޫގައި ހުންނަ ނ. އަތޮޅު ހޮސްޕިޓަލުން ވިދާޅުވެއްޖެއެވެ.
ނ. އަތޮޅު ހޮސްޕިޓަލުގެ މެނޭޖަރު އިސްމާއިލް ޝަފީޤް "އާފަތިސް" އަށް މަޢުލޫމާތު ދެއްވަމުން ވުދާޅުވީ ، މަނަދޫ ކޭސްގެ ކޮންޓެކްޓުންގެ ގޮތުގައި އިއްޔެ ފާހަގަ ކުރެވިފައިވާ 11 މީހުންގެ އިތުރުން ފަނަރަ މީހަކު ކޮންޓެކްޓުންގެ ގޮތުގައި ފާހަގަ ކުރެވިފައިވާކަމަށެވެ. އޭގެ ތެރޭގައި ހައިރިސްކު ތިން މީހަކުވެސް ހިމެނޭކަމަށެވެ. އެއީ ޢުމުރުން ދުވަސްވީ ދެ މީހަކާއި ކުޑަކުއްޖަކެވެ. މި އެންމެންތިބީ ކަރަންޓީން ކުރެވިފައވެ. އެއްވެސް މީހެއްގެ އަލާމާތެއް އަދި ނުފެންނަކަށް ހޮސްޕިޓަލު މެނޭޖަރ ފާހަގަ ކުރެއްވިއެވެ.
މަނަދޫއިން ކޮވިޑަށް ޕޮޒިޓިވް ވެފައިވަނީ ފުރަބަންދު ކަރަންޓީންގައި ހުރި މީހެކެވެ. ފުރަބަންދު ކަރަންޓީން ފުރިހަމަ ކުރުމަށްފަހު ކޮވިޑަށް ޓެސްޓްކުރުމަށް ސާމްޕަލް ނެގުމަށްފަހު ނަތީޖާ ލިބުމުގެ ކުރިން އޭނާ ވަނީ މީހުންގެ ތެރެއަށް ނުކުމެފައެވެ. ނަތީޖާ ދޭން ބެލި އިރު، އޭނާ ހުރީ ދޯންޏެއްގައި މަހަށް ނިކުމެ ކަމަށްވެއެވެ. އޭނާ މަހަށް ނިކުމެ އުޅުނު ދޯނީގައި ތިބު މީހުންވެސް ވަނީ ކަރަންޓީންކޮށްފައެވެ.
ފުރަބަންދު ކަރަންޓީން އުޞޫލާ އެއް ގޮތަށް، ނަތީޖާ ލިބެންދެން މަޑުކުރުމަށް ނ. އަތޮޅު ހޮސްޕިޓަލުގެ މެނޭޖަރ ޝަފީޤް އިލްތިމާސް ކުރެއްވިއެވެ. ނަތީޖާ ނުލިބެނިސް ނުކުތުމަކީ ނުވަތަ އެހެން ބަޔަކާ ކޮންޓެކްޓް ވުމަކީ އެމީހާގެ ސަބަބުން އެތައްބަޔަކު ނުރައްކަލުގެ ތެރެއަށް ދާނެކަމެއްކަމަށް އޭނާ ފާހަގަ ކުރެއްވިއެވެ.
މިދިޔަ އޯގަސްޓް މަސްތެރޭގައި ވެސް 2705 މީހަކު ފުރަބަންދު ކަރަންޓީނަށް އެކި ރަށްރަށަށް ގޮސްފައި ވާއިރު 121 މީހަކު ވަނީ ކޮވިޑަށް ޕޮޒިޓިވް ވެފައެވެ. ނަމަވެސް އެމީހުން ފުރަބަންދު ކަރަންޓީންގެ އުޞޫލާ އެއްގޮތަށް ޢަމަލު ކޮށްފައިވާތީ އިތުރު ބަޔަކަށް ބަލި ނުޖެހި އެމީހުން ބަލިން ރަނގަޅުވެގެން ދިޔަ ކަން އެޗްއީއޯސީގެ ތަރުޖަމާނު ޑރ ނަޒްލާ ރަފީޤް ފާހަގަ ކުރެއްވިއެވެ. ނަމަވެސް ގައިޑްލައިންތަކާ ޚިލާފުވެގެން މިހާރަކަށް އައިސް ކޮންޓެކްޓުންގެ ތެރެއިން ބައެއް މީހުން ޕޮޒިޓިވްވާކަން ފާހަގަ ކުރެއްވިއެވެ.
