މާދަމާ ސިވިލް ސާވިސްގެ އިދާރާތައް ހުޅުވާލާއިރު، އިދާރަތައް ވަނީ ނިއު ނޯމަލް އަށް ވަރަށް ބޮޑަށް ތައްޔާރުވެފައި ކަމަށް ސިވިލް ސަރވިސް ކޮމިޝަންގެ ރައީސް ޑރ. ޢަލީ ޝަމީމް ވިދާޅުވެއްޖެއެވެ. ޑރ. ޝަމީމް ވިދާޅުވީ މާދަމާއިން ފެށިގެން ކޯވިޑް-19ގެ އާ ހާލަތު ނުވަތަ ނިއު ނޯމަލްގައި ސިވިލް ސާރވިސްގެ އިދާރާތައް ހިންގުމާ، އިދާރާތަކުގައި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކާ، މުއައްޒަފުން އަމަލުކުރަންޖެހޭ ގޮތް ބަޔާންކުރާ އުސޫލެއް އާއްމުކުރެވިފައިވާ ކަމަށެވެ. ޑރ. ޝަމީމް ވިދާޅުވިގޮތުގައި މި އުސޫލު ފުރަތަމަ އާއްމުކުރެވުނީ ޖޫން މަހުގެ 23 ވަނަ ދުވަހުއެވެ، ނަމަވެސް މިހިންގާ ޖުލައި މަހުގެ ދެވަނަ ދުވަހު އެ އުސޫލަށް ފުރަތަމަ އިސްލާހު ގެނެވިފައިވާ ކަމަށް އަލީ ޝަމީމް ވިދާޅުވިއެވެ.
ހަ ސަފްހާގެ މައްޗަށް އެކުލެވިގެންވާ އުސޫލުގައި އިދާރާތަކުން އަމަލުކުރަންވީ ކަންކަން ފަސްބަޔަކަށް ބަހާލެވިފައިވެއެވެ، އެގޮތުން އައު އާއްމު ހާލަތުގައި އިދާރާތައް ހުޅުވާލައިގެން އާއްމުންނަށް ޚިދުމަތް ދިނުމުގައި އަމަލުކުރަންޖެހޭ ގޮތް ނުވަތަ އަޅަންޖެހޭ ފިޔވަޅުތަކާއި، މުއައްޒަފުން އަމަލުކުރަންޖެހޭ ގޮތްތަކާއި، ޚިދުމަތް ހޯދުމަށް ދާ ފަރާތްތަކާ މެދު އިދާރާތަކުން އަމަލުކުރަންޖޭ ގޮތާއި، ކޯވިޑް-19ގެ ރޯގާ ފެނިފައިނުވާ ނުވަތަ ޚާއްސަ ހާލަތެއް ގެނެވިފައި ނުވާ ރަށްރަށުގައި ހުރި ސިވިލް ސާވިސްގެ އިދާރާތަކުން އަމަލުކުރަންވީ ގޮތާއި، އަދި ފަސްވަނަ ބަޔަކީ އެހެނިހެން ކަމަށް ޑރ. އަލީ ޝަމީމް ވިދާޅުވިއެވެ.
އަލީ ޝަމީމް ވިދާޅުވީ އެޗްޕީއޭއިން ކޯވިޑް-19ގެ ރޯގާ އާ ގުޅިގެން ހާލަތަށް ބަލައި ތައާރަފްކުރަމުންދާ އެކި ބަދަލުތައް އުސޫލުތަކުގެ ތެރެއަށް ގެނެވޭނެ ކަމަށެވެ. އަދި މި އުސޫލުތައް މިހާރު ސިވިލް ސާވިސްގެ އިދާރާގެ މަސްއޫލުވެރިން ކަމުގައިވާ ޕާމަނަންޓް ސެކެޓްރީންނާއި ވަގުތީ ސެކެޓްރީ ޖެނެރަލުންނާ އެކުގައި މަޝްވަރާތައް ކުރެވިފައިވާ ކަމަށެވެ. ސިވިލް ސާވިސް ކޮމިޝަންގެ ވެބްސައިޓުގައި އުސޫޅު މިހާރު ޝާއިއުކުރެވިފައިވާ ކަމަށް އަލީ ޝަމީމް ވިދާޅުވިއެވެ. އަދި އުސޫލަށް ގެނެވޭ ބަދަލުތައް ފަސޭހައިން ބަލާލެވޭނެ ކަމަސް ވެސް ވިދާޅުވިއެވެ.
އަލީ ޝަމީމް ވިދާޅުވީ ސިވިލް ސާވިސްގެ އިދާރާއަކުން ކޮމިޝަނުން ފާސްކޮށްފައިވާ އުސޫލުގެ އިތުރަށް އެ އިދާރާއެއްގެ މަސައްކަތްކުރަންޖެހޭ ހާލަތަށް ބަލައި ނުވަތަ މުއައްޒަފުން އަދާކުރަންޖެހޭ މަސްއޫލިއްޔަތުތަކަށް ބަލައި އިތުރުކަންކަން ހިމެނިގެންދާނެ ކަމަށެވެ. އޮފީހުން ބޭރުގައި ނުވަތަ ފީލްޑްގައި މަސައްކަތްކުރަން ޖެހޭ ގޮތެއްގެ މަތިން ފިޔަވަޅުތައް އިތުރުކުރެވޭނެ ކަމަށް ވިދާޅުވިއެވެ.
މީގެ އިތުރަށް ސިވިލް ސާވިސް ކޮމިޝަންގައި މިހާރު ހޮޓްލައިނެއް ގާއިމުކުރެވިފައިވާ ކަމަށް ޑރ. އަލީ ޝަމީމް ވިދާޅުވިއެވެ. ހޮޓްލައިން ނަންބަރަކީ 7799280 އެވެ. މި ހޮޓްލައިނުން ދުވާލާއި ރޭގަނޑު މައުލޫމާތު ފޯރުކޮށްދެމުންދާނެ ކަމަށް ވިދާޅުވިއެވެ. އަދި އިދާރީ ގޮތުން ސާފުނުވާ މައުލޫމާތު މަސްއޫލުވެރިން ނުވަތަ ވަގުތީ ސެކެޓްރީ ޖެނެރަލުންނާއި ގުޅުމުން ލިބޭނެކަމަށް ޝަމީމް ވިދާޅުވިއެވެ. އަދި އެފަރާތްތަކަށް ފޯރުކޮށްނުދެވޭ މައުލޫމާތު ކޮމިޝަނުން ލިބޭނެކަމަށް ވިދާޅުވިއެވެ.
