އިސްލާމީ ޝަރީޢަތުގައިވާގޮތަށް ޢަމަލުތައް ބަހައްޓައިފިނަމަ އަންހެނުންގެ ޙައްޤުތައް ގެއްލިގެން ނުދާނެ ކަމަށާއި އަންހެނުންގެ ޙައްޤުތައް އެންމެ ބޮޑަށް ރައްކާތެރިކުރެވިފައިވަނީ އިސްލާމް ދީނުގައިކަމަށް މިއަދުގެ ހުކުރު ޚުތުބާގައި ވިދާޅުވެއްޖެއެވެ. މިއަދުގެ ޚުތުބާ ޚާއްޞަ ކުރައްވައިފައި ވަނީ އިސްލާމްދީނުގައި އަންހެނުންނަށް ދީފައިވާ ރައްކާތެރިކަމުގެ މައްޗަށެވެ.
އަންހެނުންނަށް އިސްލާމްދީނުގައި ދީފައިވާ ރައްކާތެރިކަން ބަޔާންވެ އަންގަވައިފައިވާ މާތް ﷲ ސުބުޙާނަހޫ ވަޠަޢާލާގެ ވަހީބަސްފުޅުތަކާއި ކީރިތި ރަސޫލާ ޞައްލަﷲ ޢަލައިހިވައްސަލަމަގެ ޙަދީސް ބަސްފުޅުތައްވެސް މިއަދުގެ ޚުތުބާގައި ވަނީ ހިމަނުއްވައިފައެވެ. ޚުތުބާގައި ގޮވާލައްވައިފައި ވަނީ އެ އާޔަތްތަކާއި ޙަދީސް ބަސްފުޅުތަކުގައި އަންގަވައިފައިވާ ގޮތުގައި ހިފަހަށްޓައިގެން ކުރިއަށް ދިއުމުން ރަނގަޅު މުޖްތަމަޢެއް ބިނާ ކުރެވޭނެކަމުގެ ކަށަވަރުކަން އޮތުމާއެކު އެ ގޮތުގައި ހިފަހައްޓާށެވެ. އެހެން ހަދައިފިނަމަ އަންހެނުންނަށް ލިބޭ ގެވެށި އަނިޔާތައްވެސް ހުއްޓޭނެކަމަށެވެ. އެއީ އިޖްތިމާޢީ ގޮތުންނާއި ޢާއިލީ ގޮތުން ލިބޭއަނިޔާއަކަށް ވިއަސް އެކަންކަން ހުއްޓުވޭނީ އިސްލާމީ ޝަރީޢަތުގައިވާ ގޮތަށް ޢަމަލުތައް ބަހަށްޓައިގެން ކަމަށް ޚުތުބާގައި ފާހަގަ ކުރެއްވިއެވެ.
އަންހެނުންނަށް ޖިސްމާނީ ގޮތުންނާއި ނަފްސާނީގޮތުން ލިބިދާނެ ހުރިހާ ގެއްލުމަކުން ރައްކާތެރިކުރުމަށް އެޅޭނެ ހުރިހާ ފިޔަވަޅެއް ވަނީ އިސްލާމްދީނުގައި އަޅުއްވައިފައި ކަމާށާއި އަދި އެކަންކަމަށް ރައްކާތެރިވުމަށް އަމުރުކުރައްވައިފައިވާކަމަށް ޚުތުބާގައި ވަނީ ހާމަކުރައްވައިފައެވެ.
"މުސްލިމު އަޚުންނޭވެ! މުޖުތަމަޢުގެ ދުޅަހެޔޮކަމާއި އަމާންކަން ދެމެހެއްޓުމަށް އިސްލާމީ ޝަރީޢަތުގައި ކަނޑައަޅައިފައިވާ މިންތަކާއި އިންތަކުގައި ހިފަހައްޓަން ޖެހެއެވެ. އެހެން މީހުންނާއި ތިމާ ސަލާމަތްކުރުމަށްޓަކައެވެ. މިކަމަކީ ވަކި ބަޔަކު ކުރުމަށް އައިސްފައިވާ ކަންކަމެއް ނޫނެވެ." ޚުތުބާގައި ވެއެވެ.
ޖާހިލިއްޔަ ޒަމާނުގައި ފިރިމީހާ މަރުވުމުން ފިރިމީހާގެ އާއިލާއަށް ވާރުތަވާ މުދަލެއްގެ ގޮތުގައި އަންހެނުންވިކަން ޚުތުބާގައި ފާހަގަ ކުރެއްވިއެވެ. އަދި ފިރި މަރުވެފައިވާ އަންހެނާއަށް އެހެން ކައިވެންޏެއް ކުރުމުގެ ހުއްދަވެސް ނުލިބޭކަމަށާއި ނަމަވެސް އިސްލާމްދީން އައުމަށްފަހު އެކަންކަން ބަދަލުވެގެން ދިޔަކަން ފާހަގަ ކުރެއްވިއެވެ. އަންހެން މީހާގެ ހުރިހާ ޙައްޤުތަކެއް ރައްކާތެރި ކުރެވިގެން ދިޔައީ އިސްލާމި ޝަރީޢަތް އައުމަށް ފަހުގައި ކަމަށް ވެސް ފާހަގަ ކުރެއްވިއެވެ.
ޖާހިލިއްޔަ ޒަމާނުގައި އަންހެނުނަށް ވާރުތަ މުދަލުން އެއެވެސް އެޗެއް ނުލިބޭކަން ފާހަގަކުރައްވައި އިސްލާމްދީން އައުމަށްފަހު ފިރިހެނުން ފަދައިން އަންހެނުންގެ ޙައްޤުތަކުގެ ތެރޭގައި މުދާ މިލްކްކުރުންވެސް ހިމެނިގެން ދިޔަކަން ޚުޠުބާގައި ބުނެފައިވެއެވެ.
ކައިވެންޏަކީ އަންހެންކުއްޖާގެ ހަޔާތުގައި އެންމެ މުހިންމު އެއް ނިންމުންކަން ފާހަގަ ކުރައްވައި އެކަމުގައި ވެސް އިސްލާމްދީނުގައި އަންހެންކުއްޖާއަށް ވަރަށް ބޮޑަށް އިޚްތިޔާރު ދެއްވައިފައިވާ ކަމަށްވެސް ޚުތުބާގައި ފާހަގަ ކުރެއްވިއެވެ. އެކުދިން ރުހޭ މީހަކާ ކައިވެނި ކުރުމުގެ ޙައްޤު އިސްލާމްދީނުގައި ދީފައިވާކަން ވަނީ ފާހަގަ ކުރައްވައުފައެވެ. ހަމައެކަނި މައިންބަފައިން ރުހޭމީހަކާ މަޖްބޫރުން ކައިވެނި ކުރުވުން ހުއްދަވެގެން ނުވާކަމަށް ވެސް ފާހަގަ ކުރެއްވިއެވެ. ފިރިމީހާއަށް ވެސް އަނބިމިހާއަށް އަނިޔާވެރިވުން އިސްލާމްދީނުގައި ވަނި ނަހީކުރައްވައިފައިކަން ފާހަގަ ކުރެއްވިއެވެ.
"އިސްލާމްދީނުގައި އަންހެން ކުދިން ދުނިޔޭގައި އުޅުމުގެ ޙައްޤު ދެއްވިއެވެ. ފިރިހެން ކުދިންނާ ތަފާތު ކުރުމެއް ނެތިއެވެ. އިސްލާމްދީނުގައި ތަޢުލިމާއި ތަރުބިއްޔަތު ދިނުމާއި އޯގާތެރިވުމުގައި އަންހެން ފިރިހެން ތަފާތެއް ނުކުރެއެވެ. ފިރިހެންދަރިންނަށް އޯގާތެރިވާ ފަދައިން އަންހެން ދަރިންނަށް ވެސް އޯގާތެރިވާން ޖެހެއެވެ. ތަޢުލިމާއި ތަރުބިއްޔަތު ދޭންޖެހެއެވެ." ޚުތުބާގައި ވިދާޅުވިއެވެ.
