ކްރިމިނަލް ކޯޓުގެ ގާޒީ ޙަސަން ނަޖީބު މަގާމުން ވަކިކުރަން ރައްޔިތުންގެ މަޖިލީހަށް ހުށަހަޅަން ޖުޑީޝަލް ކޮމިޝަނުން ނިންމައިފިއެވެ. މި މައްސަލަ ނިންމީ 1 ޖުލައި 2020 ގައި ބޭއްވި ބައްދަލުވުމުގައެވެ. މިކަން ހާމަކޮށްފައިވަނީ މިއަދު ޖޭއެސްސީން ނެރުނު ނޫސްބަޔާނަކުންނެވެ.
ޙަސަން ނަޖީބުގެ ތިން މައްސަލައެއް ޖޭއެސްސީން ވަނީ ފާހަގަ ކޮށްފައެވެ.
ފުރަތޔަމަ މައްސަލައަކީ 2017 ވަނަ އަހަރުގެ ލޯކަލް ކައުންސިލް އިނަތިޚާބުގައި ގއ. އަތޮޅު ކައުންސިލްގެ ވިލިނގިލީ ދާއިރާއަށް ކުރިމަތިލީ ކެންޑިޑޭޓަކަށް ތާއީދު ހޯއްދެވުމަށް މަސައްކަތް ކުރެއްވުމާއި، އެ ކެންޑިޑޭޓު ނިސްބަތްވާ ޕާޓީއަށް މީހަކު ލައްވައި ސޮއިކުރުވުމުގައި ބައިވެރިވެވަޑައިގަތުމާއި، އެ ކެންޑިޑޭޓާ ވާދަ ކުރި އެހެން ކެންޑިޑޭޓެއްގެ ކެންޑިޑަސީ ބާތިލު ކުރެއްވުމަށް މަސައްކަތް ކުރެއްވުމެވެ.
ދެވަނަ މައްސަލައަކީ 2018 ވަނަ އަހަރުގެ ރިޔާސީ އިންތިޚާބުގައި ވާދަކުރެއްވި ކެންޑިޑޭޓަކަށް ތާއީދު ހޯދުމުގެ ގޮތުން ބައްދަލުވުމެއް ބާއްވަވައި އެ ބައްދަލުވުމުގައި ވާހަކަފުޅު ދެއްކެވުމެވެ.
ތިންވަނަ މައްސަލައަކީ ތަހުގީގީ އެއްވެސް އިދާރާއަކުން އެދިފައި ނުވަނީސް ޖިނާޢީ އަދުލުގެ ނިޒާމުގެ އަސާސްތަކާ ޚިލާފަށް ދެމީހަކު ހައްޔަރުކުރަން ޙަސަން ނަޖީބު އަމިއްލަފުޅަށް ކޯޓު އަމުރެއް ނެރުއްވުމެވެ.
ޖޭއެސްސީން ނިންމައިފައި ވަނީ ޙަސަން ނަޖީބުގެ މި އަމަލުފުޅުތަކަކީ ފަންދިޔާރުންގެ ސުލޫކީ މިންގަނޑާ ޚިލާފަށް ކުރައްވައިފައިވާ އަމަލުފުޅުތަކަކަށް ވާތީ އޭނާ މަގާމުން ދުރުކުރަން ރައްޔިތުންގެ މަޖިލީހަށް ހުށަހަޅާށެވެ.
