އިންޓަރނެޓާ ނުލައި ލޯކަލް ކަނެކްޓިވިޓީ ބޭނުންކޮށްގެން ދަރިވަރުން ގޭގައި ތިއްބަސް ކިޔަވައިދެވިދާނެކަމަށް އުރީދޫ އިން ވިދާޅުވެއްޖެއެވެ.
ކުޑަކުދިން ބައިވެރިކޮށްގެން ހިންގާ ސައިބަރ ކްރައިމްތައް ކޮންޓްރޯލް ކުރުމަށް އޮތް ގޮތްތަކާ ބެހޭގޮތުން، ރައްޔިތުންގެ މަޖިލީހުގެ ވާހަކަ ދައްކަވަމުން އުރީދޫގެ އޮފިޝަލަކު ވިދާޅުވީ ކުދިންނަށް އޮންލައިންކޮށް ކިޔަވައި ދިނުމުގައިވެސް ގެންގުޅެން ޖެހޭނީ ކޮންޓްރޯލް ގޮތްތަކެއް ކަމަށެވެ. އެގޮތުން ކޮވިޑާ ގުޅިގެން އުރީދޫއިން ދަރިވަރުންނަށާއީ ޓީޗަރުންނަށް "ޖީބީ" ދޫކުރެއްވިކަން ފާހަގަކުރައްވައި، ވިދާޅުވީ ދަރިވަރުންނަށް ދޫކޮށްފައިވާނީ ކޮންޓްރޯލް އިންޓަރނެޓެއްކަމަށެވެ. އެއިން ބޭނުންކުރެވޭނީ ކުދިން ކިޔެވުމަށްޓަކައި ކޮންމެހެން ބޭނުންވާނެ ގޫގްލް ކްލާސްރޫމްފަދަ އެއްޗެހި ކަމަށެވެ. ކޮންކޮންމެ އެއްޗަކަށް ނުވަދެވޭނެކަމަށެވެ.
"އަޅުގަނޑުމެން އޭރުވެސް މިނިސްޓަރަށް ދެންނެވިން އޯޕަންކޮށް ދީފިއްޔާ ކުދިން އެއިން އެހެންކަންކަން ކުރާނެއޭ. އަޅުގަނޑަށް ހީވަނީ ކުރިއަށް އޮތް ތަނުގައިވެސް ކޮންޓްރޯލް އެންވަރަމަންޓެއްކަން ނޭނގެ ގެންގުޅެންވީ. އިޝްތިހާރު އެއްޗެހި އައީމާ ނޭނގިވެސް ކުދިންނަށް އެބަވަދެވޭ އިންޓަރނެޓަށް." އުރީދޫގެ އޮފިޝަލަކު ވިދާޅުވިއެވެ.
ލޯކަލް ކަނެކްޓިވިޓީއަކީ އެގޮތުން ބޭނުން ކުރެވިދާނެ ރަނގަޅު ވަޞީލަތެއްކަމަށް އުރީދޫ އިން ފާހަގަ ކުރެއްވިއެވެ. ޓެލެކޮމިޔުނިކޭޝަނާ ގުޅިގެން ލޯކަލް ކަނެކްޓިވީ ޚިދުމަތް ދިންކަމަށް ވެސް އުރީދޫއިން ވިދާޅުވިއެވެ. ލޯކަލް ކަނެކްޓިވިޓީ އަކީ އިންޓަރނެޓް ނޫންކަމަށާއި އެހެންކަމުން އިންޓަރނެޓް ނުލައިވެސް ކިޔެވިދާނެ ކަން ފާހަގަ ކުރައްވައި އެންމެ ރަނގަޅު ގޮތަކަށްވެސް ވާނީ އިންޓަރެނޓަށް ނުގޮސް ކިޔެވުން ކަމަށް ވެސް ފާހަގަ ކުރެއްވިއެވެ.
ބައްދަލުވުމުގައި ބައިވެރިވި އިންޓަރނެޓްގެ ޚިދުމަތް ދޭ ފަރާތްތަކުގެ ތެރެއިން އުރީދޫއާއި އާރްއޯއެލްއިންވެސް ވިދާޅުވީ އިންޓަރނެޓަކީ ޚިދުމަތް ފޯރުކޮށްދޭ ފަރާތްތަކުގެ ފުލް ކޮންޓްރޯލް އޮންނަ އެއްޗެއް ނޫން ކަމަށެވެ. ފޭސްބުކް އިންސްޓަގްރާމް ފަދަ އެއްޗެހީގެ ކޮންޓްރޯލްވެސް އެއީ އެޚިދުމަތްދޭ ފަރާތްތަކަށް އޮންނަ ކޮންޓްރޯލެއްކަން ފާހަގަ ކުރެއްވިއެވެ. އެހެން ކަމުން އެންމެ މުހިންމީ ހޭލުންތެރިކޮށް ބޭނުންކުރާ ގޮތް ކޮންޓްރޯލް ކުރުވުން ކަން ފާހަގަ ކުރެއްވިއެވެ.
މިހާރުގެ ޅަ ޖީލަކީ އިންޓަރނެޓްގެ ތެރެއަށް އުފަންވެ އޭގެތެރޭގައި އުޅުމަށް އާދަވެފައިވާ ކުދިން ކަމަށް ވުމުން އޭގެ ނުފޫޒު ކުދިންނަށް ވަރަށް ބޮޑަށް ކޮށްފައިވާކަން ޚިދުމަތް ދޭ ފަރާތްތަކުން ފާހަގަ ކުރިއެވެ. ޚިދުމަތް މެދު ކެނޑުމުން ކޯލް ސެންޓަރަށް ވަރަށް ގިނަފަހަރަށް ކުޑަކުދިން ގުޅާކަމަށް ވެސް އުރީދޫއާއި އާރްއޯއެލްއިން ވެސް ވިދާޅުވިއެވެ. ބޮޑު މީހަކު ނެތްތޯ ސުވާލު ކޮށްލުމުން މަންމަ އަކަށް ނޭނގޭނޭ ބުނާ ފަހަރުވެސް އަންނަކަން ފާހަގަ ކުރެއްވިއެވެ. އުރީދޫއާއި އާރުއޯއެލްއިންވެސް ވިދާޅުވީ ޚިދުމަތް ދިނުމުގައި 18 އަހަރުން ދަށުގެ ކުއްޖަކަށް އެއްވެސް ޕެކޭޖެއް ނުވިއްކާ ކަމަށެވެ. ކުޑަކުދިން އެ ބޭނުން ކުރަނީ ބޮޑެތި މީހުންނަށް ދޫކުރާ ޕެކޭޖްތައް ކަމަށެވެ. އަދި އެޕޭކޭޖްތަކުގައި ޕޭރެންޓަލް ކޮންޓްރޯލް ފީޗަރތައް ވެސް ހުންނާނެ ކަމަށެވެ. ނަމަވެސް އެކޮންޓްރޯލް ކުރެވޭނީ ބަލެނިވެރިން އެޚިދުމަތުގެ ބޭނުން ހިފިއްޔާ ކަމަށެވެ. އެކަމަށްވެސް ބެލެނިވެރިން ހޭލުންތެރިކުރަން ޖެހޭ ކަމަށްވެސް އުރީދޫ އާއި އާރުއޯއެލް އިންވެސް ވިދާޅުވިއެވެ.
އިއްޔެގެ ބައްދަލުވުމުގައި ހިއުމަންރައިޓްސް އެނޑް ޖެންޑަރ ކޮމެޓީގެ މުޤައްރިރު ހިންނަވަރު ދާއިރާގެ މެމްބަރ ޖީހާން މަޙްމޫދު ވިދާޅުވީ، އިންޓަރނެޓާ ނުލައި ކިޔަވައިދޭވޭނެ ގޮތެއް އޮތްނަމަ އެގޮތަކަށް ރާއްޖޭގައި ކިޔަވައި ދިނުން ވަރަށް މުހިންމު ކަމަށެވެ.
އިންޓަރނެޓް މެދުވެރިކޮށް ކުޑަކުދިންގެ ނާޖާއިޒު ފައިދާ ނެގުމުގެ މައްސަލަ އިތުރުވެ އެކަމުގެ ކަންބޮޑުވުން ހިއުމަންރައިޓްސް އެންޑް ޖެންޑަރ ކޮމެޓީގެ އިއްޔެގެ ބައްދަލުވުމުގައި ކަމާ ގުޅޭ މުއައްސަސާތަކުން ވެސް ވަނީ ފާހަގަ ކޮށްފައެވެ. އެކަން ޙައްލުކުރުމަށް ކުރެވިދާނެ ކަންކަމާ ގުޅޭ ގޮތުންވެސް މުއައްސަސާތަކުގެ މެދުގައި ވަނީ މަޝްވަރާކުރައްވައިފައެވެ.
(ނުނިމޭ)
