ޤާނޫނޫ އަސާސީ އިޞްލާހު ކުރުމަށް ޕީޕީއެމްޕީއެންސީ އިން ހުރަސް އަޅާކަމަށް ރައްޔިތުންގެ މަޖިލީހުގެ ރައީސާއި މަޖިލީހުގެ އެމްޑީޕީ މެމްބަރުން ތުޙުމަތު ކުރައްވައިފިއެވެ.
މިގޮތަށް މަޖިލީހުގެ ރައީސާއި މެމްބަރުން ތުޙުމަތު ކުރައްވައިފައި ވަނީ މިއަދު ގެ މަޖިލީހުގައި މުޅި މަޖިލީހުގެ ކޮމެޓީން ޤާނޫނު އަސާސީ އިޞްލާޙު ކުރުމުގެ ބިލަށް ގެނައި އިޞްލާޙު މަޖިލީހުގެ ތަޅުންމުން ފާސްކުރުމަށް މައިނޯރިޓީ ލީޑަރ އެއްބަސްވެވަޑައި ނުގެންނެނެވުމުންނެވެ. މަޖިލިހުގެ މައިނޯރިޓީ ލީޑަރ އޭދަފުށީ ދާއިރާ މެންބަރު އަޙްމަދު ސަލީމް އެއްބަސްވެވަޑައިގެންނެވީ ޤާނޫނު އަސާސީ އިޞްލާޙުކުރުމުގެ މަސައްކަތް މަޖިލީހުގެ ޤަވާޢިދުގައި ބުނާ އާންމު އުޞޫލުން ކުރިއަށް ގެންދެވުމަށެވެ.
މަޖިލިހުގެ ޤަވާޢިދުގައި ބުނަނީ މަޖިލިހުގެ ކޮމިޓީއަކުން ފާސްކުރާ ރިޕޯޓާކާ ގުޅޭ ގޮތުން މަޖިލިހުގައި ބަހުސްކުރެވޭނީ އެރިޕޯޓެއް ފާސްކޮށް، މެންބަރުންނާ ހަމައަށް ފޮނުވާތާ ތިން ދުވަސް ފަހުން ކަމަށެވެ. އެނޫން ގޮތަކަށް ޢަމަލުކުރެވޭނީ މަޖިލިހުގެ މެޖޯރިޓީ ލީޑަރާއި މައިނޯރިޓީ ލީޑަރު އެއްބަސްވެވަޑައިގަތުމުން ކަމަށެވެ.
މުޅި މަޖިލީހުގެ ކޮމެޓީން ޤާނޫނޫ އަސާސީއަށް އިޞްލާޙު ގެނައުމުގެ ބިލް ފާސްކުރެއްވީ ރޭ ބޭއްވި މަޖިލީހުގެ ޖަލްސާގައެވެ. މަޖިލީހުގެ ރައީސް ނިންމެވީ މިއަދުގެ ޖަލްސާގައި އެބިލް މަޖިލީހުގެ ތަޅުމުން ފާސްކުރެއްވުމަށެވެ. ނަމަވެސް މަޖިލީހުގެ ރައީސާއި އެމްޑީޕީގެ މެމްބަރުން ބޭނުންވި ގޮތަށް މިއަދުގެ ޖަލްސާގައި ޤާނޫނު އަސާސީއަށް އިޞްލާޙު ގެނައުމުގެ ބިލަށް ވޯޓަށް ނޭހުނީ މައިނޯރިޓީ ލީޑަރ އެކަމަށް އެއްބަސްވެ ވަޑައި ނުގެންނެވުމުންނެވެ.
މިމައްސަލައި ގައި އެމްޑީޕީ ގެ މެމްބަރުން ވަނީ ޕީޕީއެމް ޕީއެންސީ މެމްބަރުނަނަށް ވަރަށް ބޮޑަށް ފާޑު ވިދާޅުވެފައެވެ. މަޖިލީހުގެ މަސައްކަތަށް ހައިޖެކްކޮށް ހުރަސް އެޅުމުގެ ފުރިޞަތު އެއްވެސް މެމްބަރަކަށް ދީގެން ނުވާނެކަމަށް މިމައްސަލައިގައި ވާހަކަ ދައްކަވަމުން އައްޑޫ މަރަދޫ ދާއިރާގެ މެމްބަރ އިބްރާޙީމް ޝަރީފް ވިދާޅުވިއެވެ. މަޖިލީހުގައި އެމްޑީޕީއަށް ލިބިފައިވާ މެޖޯރޓީ ބޭނުންކޮށްގެން ޤަވާއިދުގައި އެކަމަށް ހުރަސް އެޅޭ މާއްދާތައް ސަސްޕެންޑްކޮށް ގެން ވިޔަސް ޤާނޫނު އަސާސީ އިޞްލާޙު ކުރުމުގެ މަސައްކަތް އަވަސް ކުރެއްވުމަށް އޭނާ ގޮވާލެއްވިއެވެ.
މިއަދުގެ ޖަލްސާ ނިންމާލައްވަމުން މަޖިލީހުގެ ރައީސް ވިދާޅުވީ ޤާނޫނު އަސާސީ އަށް ހުށަހެޅިފައިވާ އިޞްލާޙު ފާސްކުރެއްވުމަށް އަންނަ ހޯމަދުވަހުގެ ރޭ 11 ޖަހާއިރު މަޖިލީހުގެ ޖަލްސާއެއް ބާއްވާނެކަމަށެވެ.
