ކޮވިޑް- 19 ޖެހިވަޑައިގެންފައިވާ އިނގިރޭސި ބޮޑުވަޒީރު ބޮރިސް ޖޮންސަންގެ ހާލުކޮޅު އިތުރަށް ގޯސްވުމާ ގުޅިގެން އޭނާ އައިސީޔޫއަށް ބަދަލުކޮށްފިއެވެ. 11 ދުވަސްކުރިއްސުރެ ކޮވިޑް- 19 އަށް ފަރުވާ ހޯއްދަވަމުން ގެންދެވި ޖޮންސަންގެ ހާލުކޮޅު ރަނގަޅުވަމުން ނުދާތީ އޭނާ ހޮސްޕިޓަލުގައި އެޑްމިޓްކޮށްފައި ވަނީ އިއްޔެރޭގެ ވަގުތެއްގައެވެ.
އިނގިރޭސި ސަރުކާރުގެ ފަރާތުން ވާހަކަދެއްކެވި ބޭފުޅަކު ކުރިން ވިދާޅުވީ ޖޮންސަންގެ ޓެސްޓްތަކެއް ހެދުމަށް ފަހު އޭނާ އޮންނެވީ "އޮބްޒަވޭޝަންގައި" ކަމަށެވެ. އަދި އޭނާ ވެންޓިލޭޓަރަށް ލާފައި ނުވާކަމަށެެވެ. އެހެންނަމަވެސް،ފަހުން ސަރުކާރުގެ ތަރުޖަމާނު ވިދާޅުވި ގޮތުގައި ބޮޑުވަޒީރު މިހާރު ވަނީ އައިސީޔޫއަށް ބަދަލުކުރެވިފައެވެ.
"މިއަދު ހަވީރުވެގެން އައިއިރު ބޮޑުވަޒީރު ހާލުކޮޅު ވަނީ އިތުރަށް ގޮސްފައި، އެހެންކަމުން، އޭނާގެ މެޑިކަލް ޓީމުގެ ލަފާގެ މަތިން، އޭނާ ވަނީ ހޮސްޕިޓަލުގެ އައިސީޔޫއަށް ބަދަލުކުރެވިފައި. ބޮޑުވަޒީރު ވަނީ، ބޭނުން ޖެހޭ ހާލަތްތަކުގައި އޭނާގެ ފަރާތްޕުޅުން ސަރުކާރު ހިންގެވުން ފަސްޓް ސެކްރެޓަރީ އޮފް ސްޓޭޓް (ބޮޑުވަޒީރުގެ ނާއިބު) ގެ މަގާމުގައި ހުންނެވި ފްރިން ސެކްރެޓަރީ (ޚާރިޖީ ވަޒީރު) ޑޮމިނިކް ރާބްއާ ހަވާލުކުރައްވާފައި." ސަރުކާރުގެ ތަރުޖަމާނު ވިދާޅުވިއެވެ.
ލަންޑަނުގެ ސެންޓް ތޯމަސް ހޮސްޕިޓަލުގައި ފަރުވާ ހޯއްދަަވަމުން ގެންދަވާ އުމުރުފުޅުން 55 އަހަރުގެ ބޮރިސް ޖޮންސަންއަކީ ކޮވިޑް- 19 އަަށް ފަރުވާހޯއްދަވަމުން ގެންދަވާއިރު، އިނގިރޭސިވިލާތް ވެސް ދަނީ މިބައްޔާ ހަނގުރާމަކުރަމުންނެވެ. އެ ގައުމުގައި މި ބަލި ޖެހިފައިވާ މީހުންގެ އަދަދު 50 ހާހަށްވުރެ ގިނަވެފައި ވާއިރު، މި ބަލީގައި 5 ހާހަށްވުރެ ގިނަ މީހުން ވަނީ މަރުވެެފައެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް- 19 ދުނިޔޭގެ 1.3 މިލިއަނަށްވުރެ ގިނަ މީހުންނަށް ޖެހިފައިވާއިރު، މި ބަލީގައި މަރުވި މީހުންގެ އަދަދު 74 ހާހަށްވުރެ ގިނައެވެ.
ކޮވިޑް- 19 ޖައްސާ ވައިރަސް، ނޮވެލް ކޮރޯނާ ވައިރަހާ ދެކޮޅަށް ދުނިޔެއިން ކުރާ ހަނގުރާމަ ވަރުގަދަކުރަމުން ދާއިރު، މި ވައިރަހާ މެދު ބަހުސްކުރުމަށް އދ. ގެ ސަލާމަތީ މަޖިލީހުގެ ޖަލްސާއެއް ބުރާސްފަތި ދުވަހު ބާއްވަން ވަނީ ނިންމާފައެެވެ. އދ. ގެ ފަރާތުން ވާހަކަދެއްކެވި ބޭފުޅަކު ވިދާޅުވި ގޮތުގައި މި ޖަލްސާ އޮންނާނީ ބުރާސްފަތި ދުވަހު ހަވީރު 3 ޖަހާއިރު (ރާއްޖޭ ގަޑިން ބުރާސްފަތި ދުވަހުގެ ރޭ މެންދަމު 12 ޖަހާއިރު) އެވެ. އަދި ބެލެވޭ ގޮތުގައި މި ޖަލްސާ ވާނީ ސިއްރު ޖަލްސާއަކަށެވެ.
