ކޮވިޑް- 19 ފަތުރާ ނޮވެލް ކޮރޯނާ ވައިރަސް (ސާރސް ކޮވް-2) ބޭރުވާ ނޭވާއިންވެސް ފެތުރުމުގެ ފުރުސަތު އެބައޮތް ކަމުގައި އެމެރިކާގެ ތަޖުރިބާކާރުންގެ ޕެނަަލަކުން ވައިޓްހައުސްގެ ސައިންސް އެޑްވައިޒަރ ކެލްވިން ޑްރޯގަަމަޔަރއަށް ފޮނުވި ރިޕޯޓެއްގައި ބުނެފިއެވެ.
'ބަލިމީހާ ބޭރުކުރާ ވައިގައި ހުންނަ ލޮލަށް ނުފެންނަ ޒައްރާތަކުންވެސް ސާރސް ކޮވް-2 (ކޮވިޑް- 19 ޖައްސާ ނޮވެލް ކޮރޯނާ ވައިރަސް) ފެތުރުމުގެ ފުރުސަތު އޮތްކަން މިހާރު ފެންނަން ހުރި ދިރާސާތަކުން ދައްކައެވެެ." އެމެރިކާގެ ނޭޝަނަލް އެކެޑަމީސް އޮފް ސައިންސަސް، އިންޖިނިއަރިންގ އެންޑް މެޑިސިންގައި އޮންނަ ސްޓޭންޑިންގ ކޮމިޓީ އޮން އިމާޖިންގ އިންފެކްޝަސް ޑިޒީސަސް އެންޑް ޓްވެންޓީ ފަސްޓް ސެންޗަރީ ހެލްތު ތުރެޓްސްގެ ޗެއާމަން ޑރ. ހާވީ ފިނެބާގް ފޮނުުއްވި މި ރިޕޯޓުގައި ވެއެވެ.
އެ ސިޓީގައި ކޮވިޑް- 19 އާ ގުޅޭގޮތުން ދާދި ފަހުން ކުރެވުނު ބައެއް ދިރާސާތަކަށް ވެސް އިޝާރާތްކޮށްފައި ވެއެވެ. އެ ގޮތުން ޔުނިވަސިޓީ އޮފް ނެބްރާސްކާ މެޑިކަލް ސެންޓަރުގައި ކުރި ދިރާސާއަކުން އެނގުނު ގޮތުގައި ކޮވިޑް- 19 ގެ ބަލިމީހުން ބައިތިއްބާފައި ތިބި އައިސޮލޭޝަން ކޮޓަރިތަކުގެ ވައިގެ ތެރެއިން ނޮވެލް ކޮރޯނާ ވައިރަސްގެ އާރްއެންއޭ ފެނިފައި ވެއެވެ. އަދި މި ބަލި ފުރަތަމަ ފެނުނު ވޫހާން ސިޓީގައި ކުރި ދިރާސާތަކުން ވެސް މިކަން އެނގިފައި ވެއެވެ.
މިހާތަނަށް ތަޖުރިބާކާރުން ބުނަމުން އައިސްފައި ވަނީ ކޮވިޑް- 19 ފެތުރެނީ، ކެއްސުމާއި، ކިނބިހި އެޅުމުން އިންސާނާގެ ހަށިގަޑުން ބޭރުންވާ ނިސްބަތުން ބޮޑު ދިޔަ ތިކިތަކާއެކުގައި ކަމަށެވެ. އަދި މިފަދަ ތިކިތައް ތަންތަނުގައި ހަރުލާފައި ހުއްޓާ އެތަންތަކުގައި އެހެން މީހުން އަތްލުމަށް ފަހު މޫނުގައި އަތްލުމުން ކަމަށެވެ. ނޭވާލާއިރު އަދި ވާހަކަދައްކާއިރު ބޭރުވާ ކުދި ޒައްރާތަކުން ނުފެތުރޭ ކަމަށެވެ.
ތަޖުރިބާކާރުންގެ ރިޕޯޓުގައި އިތުރަށް ފާހަގަކޮށްފައިވާ ގޮތުގައި ބަލިމީހުން ތިބޭ އެނދުގެ ދެ މީޓަރަށް ވުރެ ދުރުން ވައިގެ ތެރެއިން ކޮރޯނާ ވައިރަސް އަސަރު ފެނިފައި ވެއެެވެ. އެހެންކަމުން، ބަަލިން ރައްކާތެރިވާން ދެ މީޓަރުގެ 'ސޯޝަލް ޑިސްޓޭންސް' ބެހެއްޓުމުން އެކަމުގެ ޔަގީންކަން ނުލިބޭކަން ރިޕޯޓުގައި ފާހަގަކޮށްފައި ވެއެވެ.
ބަލިމީހާގެ ގައިން ބަލީގެ އެއްވެސް އަލާމާތެއް ފެނުމުގެ ކުރިން ކޮރޯނާ ވައިރަސް އެހާ ހަލުވިކޮށް ފެތުރޭ ސަބަބަކީ އެ ވައިރަސް އިންސާނާގެ ހަށިގަނޑުން ބޭރުކުރާ ވަޔާއެކު ވައިގެ ތެރޭގައި ހަރުލާފައި ހުރުމުން ކަމަށް މިހާރު ގަބޫލުކުރެވޭ ކަމުގައި، މި ސިޓީއާ ގުޅިގެން އެމެރިކާގެ ސައިންސްނިއުސް މަޖައްލާގައި ވެސް ފާހަގަކޮށްފައި ވެއެވެ.
ޑރ. ފިނެބާގް ލިއުއްވި މި ސިޓީއަކީ ވައިޓްހައުސްގެ އެދުމުގެ މަތިން މި އެޕްރީލް މަހުގެ ފުރަތަމަ ދުވަހު ފޮނުއްވި ރިޕޯޓެކެވެ.
އެޕްރީލް މަހުގެ 3 ވަނަ ދުވަހާ ހަމައަށް އައި އިރު އެއް މިލިއަނަށް ވުރެ ގިނަ މީހުން ވަނީ ކޮވިޑް- 19 އަށް ޕޮޒިޓިވް ވެފައެވެ. މި އަދަދުގެ ހަތަރުބައިކުޅަ އެއްބައި ތިބީ އެމެރިކާގައެވެ. އަދި މި ބަލީގައި މަރުވެފައިވާ މީހުންގެ އަދަދު ވަނީ 50 ހާހަށްވުރެ މަތިވެފައެވެ.
