ދަނޑުވެރީން އަތުން ގަންނާނެ ބާވަތްތަކާއި އަގުތައް ވަރަށް އަވަހަށް އިޢުލާން ކުރާންނަ: އެސްޓީއޯ
ރާއްޖޭގެ ދަނޑުވެރިން އުފައްދާ ތަކެތި އެމީހުން އަތުން ގަންނަން އެސްޓީއޯއިން ނިންމައި އެކަން މިއަދު އިއުލާން ކުރައްވައިފިއެވެ. މިއަދު ބޭއްވި ޕްރެސް ބްރީފިންއެއްގައި އެސްޓީއޯގެ މެނޭޖިންޑިރެކްޓަރ ޙުސައިން ޢަމްރު ވިދާޅުވީ ދަނޑުވެރިން އަތުން ގަންނާނެ ބާވަތްތަކާއި އަގުތައް ވަރަށް އަވަހަށް އަންގަވާނެ ކަމަށެވެ.
ޢަމްރު ވިދާޅުވީ ދަނޑުވެރިން އެމަސައްކަތުގައި ސީރިސީއަސް ނުވަނީ ނުވަތަ އުފައްދާ މިންވަރު އިތުރު ނުވަނީ އެއިން ލިބޭ އަމާދަނީ ކުޑަވެ އޭގެ އަގު ކުރިން އެނގިފައި ނުވާތީ ކަމަށެވެ. އެހެންނަމަވެސް އެސްޓީއޯއިން ގަންނާނީ ކުރީބައިގައި ތަކެތީގެ އަގު އެންގުމަށްފަހުގައި ކަމަށެވެ. "އޭރުން ދަނޑުވެރިންނަށް އެނގޭނެ މިވެނިވަރަކަށް އުފައްދަވައިފިއްޔާ އެވެނިވަރަކަށް ފައިސާ ނުވަތަ އާމްދަނީ ލިބޭނެކަން. އެހެންވީމާ އެއީ ލިބިގެންދާނެ ހިތްވަރަކަށްވާނެ،" ޢަމްރު ވިދާޅުވިއެވެ.
ޢަމްރު ވިދާޅުވީ ޒަމާނީ ޓެކްނޮލޮޖީ ބޭނުންކޮށްގެން ރާއްޖޭގައި ހެއްދޭނެ އެއްޗެހި ބައިވަރު އެބަހުރި ކަމަށެވެ. "އެހެންވީމާ ދަނޑުވެރިކަން ކުރާށޭ، ހައްދާށޭ، އަޅުގަނޑުމެން ގަންނާނަމޭ،" ޢަމްރު ވިދާޅުވިއެވެ.
މިތަކެތި ގަތުމަށް "އެސްޓީއޯ އެގްރިސެންޓަރ" ނަމުގައި މާލޭ ނޯތު ހާބަރުގައި ތަނެއް ހެދުމުގެ މަސައްކަތް ކުރަމުންދާ ކަމަށް ވެސް އޭނާ ވިދާޅުވިއެވެ. ޢަމްރު ވިދާޅުވީ ރާއްޖޭގައި މީގެ ކުރިން ބަސްތާ އުފެއްދޭ ވަރަށް ވެސް ހަނޑޫ ހައްދާފައިވާ ކަމަށެވެ. އެހެންވީމާ އަދިވެސް އެފުރުސަތު އޮންނާނެ ކަމަށް ދެކެވަޑައިގަންނަވާ ކަމަށް އޭނާ ވިދާޅުވިއެވެ. އެހެންވީމާ ހަނޑޫވެސް އުފައްދައި އެސްޓީއޯއަށް ވިއްކުމަށް އޭނާ އެދިވަޑައިގެންނެވިއެވެ. އޭނާ ވިދާޅުވީ ރާއްޖެ ވެސް ގައުމެއްގެ ގޮތުގައި އަމިއްލަ ފައިމައްޗަށް ތެދުވާން ވެއްޖެ ކަމަށެވެ. އެކަން އެގޮތަށް ކުރުމަށްޓަކައި ދަނޑުވެރި ކަމުގެ ބާވަތްތައް އުފައްދައި އަމިއްލައަށް ކައިބޮއި އުޅެވޭވަރުގެ ގައުމަކަށް ވާންވެއްޖެ ކަމަށް އޭނާ ވިދާޅުވިއެވެ.
އޭނާ ވިދާޅުވީ ފުޑުސެކިއުރިޓީ ނުވަތަ ކާނާގެ ޔަގީން ކަމަކީ ތިން ހަތަރު މަހަށް ބޭނުންވާ ކާޑު ގެނެސް ރައްކާ ކުރުމެއްނޫން ކަމަށެވެ. އޭގެ ބަދަލުގައި ދިވެހީންނަށް ބޭނުންވާ ވަރަށް ރާއްޖޭގައި ކާބޯތަކެތި އުފެއްދުމަކީ މިހާރު ކޮންމެހެން ކުރަންޖެހޭ ކަމެއް ކަމަށް އޭނާ ވިދާޅުވިއެވެ. ޢަމްރު ވިދާޅުވީ ކޮރޯނާ ވައިރަސްގެ ނުރައްކާތެރިކަން މުޅިދުނިޔެއަށް ފެތުރި ފަތުރުވެރިކަން ހުއްޓި އިގްތިސާދު ހަލާކުވެއްޖެ ކަމަށެވެ. އެއް ގައުމުން އަނެއްގައުމަށް މުދާ އުފުލުމާއި އެގައުމެއްގެ އެތެރޭގައި މުދާ އުފުލުން ވެސް މިހާރުވަނީ ހުއްޓިފައި ކަމަށް ވެސް ވިދާޅުވިއެވެ. މިއިން އެނގިގެން ދިޔައީ އެގައުމަށް ވާ މިންވަރަށް އެގައުމުގައި ކާނާ އުފެއްދުމުގެ މުހިންކަން ކަމަށް ވެސް ޢަމްރު ވިދާޅުވިއެވެ.
އެސްޓީއޯގެ މިހާރުގެ މިސްރާބަކީ ވީހާ ވެސް ގިނަ މީހުން ދަނޑުވެރިކަމުގެ މަސައްކަތަށް ނެރުން ކަމަށް ވެސް ޢަމްރު ވިދާޅުވިއެވެ.
