ހއ. އަތޮޅުގައި ހިންގާ ޖޭއޭ މަނަފަރު މޯލްޑިވްސް ރިސޯޓުން ކޮވިޑް-19 އަށް ޝައްކުކުރެވޭ އަލާމާތްތައް ހުރި ދިވެއްސެއްގެ ސާމްޕަލް ނަގައި ޓެސްޓް ކުރުމުގެ މަސައްކަތް ކުރަމުންދާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ބުނެފި އެވެ.
ކޮވިޑް 19 އާގުޅިގެން ޢަމަލުކުރަމުންދާ އުސޫލުގެ ދަށުން އެމީހާގެ ޓެސްޓުގެ ނަތީޖާ ލިބެން ދެން، މަނަފަރު ރިސޯޓު ވަނީ ބަންދުކޮށް މޮނީޓަރިންގެ ހާލަތަށް ގެންގޮސްފައެވެ.
މަނަފަރު އިތުރުން މި ވަގުތު މީހުން އަރައި ފޭބުން މަނާކޮށް މޮނިޓަރިންގައި ވަނީ ރީތި ބީޗް ރިސޯޓެވެ. އެ ރިސޯޓު އިއްޔެ މޮނީޓަރިންގައި އޮތީ ދިވެއްސަކާއި ބިދޭސީއެއްގެ ފަރާތުން ކޮވިޑަށް ޝައްކުކުރެވޭ އަލާމާތްތަކެއް ފެނުމުން ޓެސްޓު ކުރުމަށެވެ.
ރާއްޖޭން މިހާތަނަށް ކޮވިޑް-19 ޖެހިފައިވަނީ 13 މީހުންނަށެވެ. އޭގެތެރެއިން ފަސް މީހުން މިހާރުވަނީ ބަލިން ރަނގަޅިވެފައެވެ. ރާއްޖޭގައި މިބަލި ޖެހުނު މީހުންގެ ތެރޭގައި މުޅިންވެސް ހިމެނެނީ ރާއްޖެއަށް އައި ފަތުރުވެރިންނާއި ރާއްޖޭގައި މަސައްކަތްކުރާ ބިދޭސީންނެވެ. ނަމަވެސް ޔޫއޭއީގައި ފުތަމަ ފަހަރަށް ދިވެއްސަކު ވަނީ މިބައްޔަށް ޕޮސިޓިވް ވެފައެވެ.
