ބޭނުން ވެއްޖެ ހިނދެއްގައި އާރަށް ވެސް ކަރަންޓީން ފެސިލިޓީއަކަށް ބޭނުން ކުރެވޭނެކަމަށް ކޮވީޑް-19 އާ ބެހޭގޮތުން މަޢުލޫމާތު ދެއްވުމަށް ކަނޑައަޅައިފައިވާ ސަރުކާރުގެ ތަރުޖަމާނު މަބްރޫޤް ޢަޒީޒު ވިދާޅުވެއްޖެއެވެ.
މަބްރޫޤް މިހެން ވިދާޅުވެފައިވަނީ ކޮވިޑް 19 އާ ބެހޭގޮތުން މަޢުލޫމާތު ދެއްވުމަށް ބާއްވާ ސިލްސިލާ ނޫސްވެރިންގެ ބައްދަލުވުންތަކުގެ ތެރެއިން ރޭ ބޭއްވި ނޫސްވެރިންގެ ބައްދަލުވުމުގައި، އާރަށް ކަރަންޓީން ފެސިލިޓީއެއްގެގޮތުގައި ބޭނުންކުރުމަށް ނިންމެވި ނިންމެވުން ރައީސުލްޖުމްހޫރިއްޔާ ބަދަލުކުރެއްވީތޯ. ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުންނެވެ. އާރަށަކީ ރައީސުލްޖުމްހޫރިއްޔާއަށް ޚާއްޞަ ކުރައްވައިފައިވާ ރަށެކެވެ.
މަބްރޫޤް ވިދާޅުވީ ކަރަންޓީން ފެސިލިޓީތަކަށް ބޭނުންވާ ރިސޯޓްތައް ސަރުކާރުން ބޭނުން ކުރަމުން ދަނީ އެރަށްތައް ބޭނުންކުރާ މުއްދަތުގައި ކުލިމަޢާފުވާގޮތަށް ކަމަށެވެ. މިހާތަނަށް ހުޅުލޭއައިލެންޑް ހޮޓަލާއެކު ދިހަ ރިސޯރޓެއް ވަނީ ކަރަންޓީން ފެސިލީޓީގެ ގޮތުގައި ބޭނުން ކުރުމަށް ސަރުކާރަށް ނަގައިފައެވެ. އެއްބަސް ވުމުގައި ވާގޮތުން ކަރަންޓީން ފެސިލިޓީގެ ގޮތުގައި ރިސޯރޓްތަކުން ދެމުންދާ ޚިދުމަތްތަކަށް، ކޮޓަރިއަކަށް 750 ރުފިޔާ ދައްކަން ޖެހޭ ކަމަށް މަބަރޫޤް ވިދާޅުވިއެވެ. ރިސޯރޓްތަކުން ދޭންޖެހޭ ޚިދުމަތްތަކުގެ ތެރޭގައި ފެނާއި ކަރަންޓާ ލޯންޑްރީގެ ޚިދުމަތާއި ރަށުތެރެ ސާފްކުރުން ހިމެނޭކަން މަބަރޫޤް ފާހަގަ ކުރެއްވިއެވެ. މިހާރު ނަގައިފައިވާ ރިސޯރޓްތަކުގެ ތެރޭގައި އަދި އެއްވެސް އެނދެއް ބޭނުންކުރަން ނުފަށާ ތިން ރިސޯޓް ހިމެނެއެވެ. އެއި ރޯޔަލް އައިލެންޑާއި އެނބޫދޫ އާއި މަޑިވަރެވެ.
މަބްރޫޤް ވިދާޅުވީ ރިސޯރޓްތަކުގެ އެގްރިމެންޓްގައިވާގޮތުން ކުއްލި ނުރައްކަލުގެ ޙާލަތުގައި ތިންމަސް ދުވަހަށް ސަރުކާރުން ބޭނުންވެއްޖެނަމަ ރިސޯޓްތައް ނެނގޭނެކަމަށެވެ. އަދި ބޭނުންވެއްޖެ ހާލަތެއްގައި ކުއްޔަކާ ނުލައި މުއްދަތު އިތުރުވެސް ކުރެވޭނެކަމަށް އޭނާ ވިދާޅުވިއެވެ.
ކަރަންޓީން ފެސިލިޓީގެ ގޮތުގައި ސަރުކާރުން ނަގަމުން ދަނީ މާލެކައިރީގެ 30 ކޮޓަރި ނުވަތަ 60 އެދަށް ވުރެ ،މަދުނޫން ޢަދަދަކަށް އެނދު ހުންނަ ރިސޯރޓްތައްކަމަށް ވެސް ސަރުކާރުގެ ތަރުޖަމާނު ވިދާޅުވިއެވެ. އެންމެ ފުރަތަ ކަރަންޓީން ފެސިލިޓީއަކަށް ބޭނުންކުރި ފަރުކޮޅު ފުށީ މިހާރުވަނީ މަރާމާތު ކުރުމަށް ބަންދުކޮށްފައެވެ.
ރާއްޖޭގެ ކަރަންޓީން ފެސިލިޓީތަކާ މެދު، އެތަންތަނުގައި ތިބި ގިނަބަޔަކު ދަނީ ހިތްހަމަޖެހުން ފާޅުކޮށް ތަޢްރީފްކުރަމުންނެވެ.
