ބާޒާރުން ޑޮލަރު ލިބުން ދަތި ވިޔަނުދިނުމަށްޓަކައި އަންނަ ހަފްތާއިން ފެށިގެން ބާޒަރަށް ވިއްކާ ޑޮލަރުގެ މިންވަރު އިތުރު ކުރައްވާނެ ކަމަށް އެމްއެމްއޭގެ ގަވަރުނަރު އަލީ ހާޝިމް ވިދާޅުވެއްޖެއެވެ.
އެމްއެމްއޭއާއި، ފިނޭންސްމިނިސްޓްރީއާއި އިކޮނޮމިކް މިނިސްޓްރީން ގުޅިގެން މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި ގަވަރުނަރު ވިދާޅުވީ ކޮވިޑް-19 ގެ ސަބަބުން ރާއްޖޭގެ އިގްތިސާދަށް އަންނަމުންދާ ބަދަލުތަކާ ގުޅިގެން ޑޮލަރު ލިބުމަށް ދަތިވެދާނެ ކަމަށެވެ.
އެކަން ހައްލު ކުރުމަށްޓަކައި އަންނަ ހަފްތާއިން ފެށިގެން ވިއްކާ ޑޮލަރުގެ އަދަދު އިތުރުކޮށް ލިބޭނެގޮތް ހައްދަވާނެ ކަމަށް ވެސް ވިދާޅުވިއެވެ. އަދި އިތުރު 150 މިލިއަން ޑޮލަރުގެ ބޭންކުތަކަށް ލިބޭނެގޮތް ހަދަވައިދެއްވާނެ ކަމަށް ވެސް ވިދާޅުވިއެވެ. އެކަން އެގޮތަށް ކުރައްވަނީ ޑޮލަރު ލިބުން ތިޔާގި ކުރުމަށް ނުވަތަ ބާޒާރުގައި ޑޮލަރު ހިފެހެއްޓުމަށް ކުރާކަމެއްގެ ގޮތުގައި ކަމަށް ވެސް ވިދާޅުވިއެވެ.
