މުޅި ދުނިޔޭގައި ކޯވިޑް-19 ހަލުވިކަމާއެކު ފެތުރެމުން އަންނާތީ، ޤައުމުތަކުން އަޅަމުންދާ ފިޔަވަޅުތަކާ ގުޅިގެން، ޔޫރަޕިއަން ޔޫނިއަން (އީ.ޔޫ) ގެ ޤައުމުތަކަށާއި އެހެން ބައެއް ޤައުމުތަކަށް ދަތުރުކުރާ ދިވެހިން ސަމާލުވުމަށް ޚާރިޖީ ވުޒާރާއިން އިލްމާސް ކޮށްފިއެވެ.
އީ.ޔޫ ގެ ޤައުމުތަކަށް ދަތުރުކުރާ ދިވެހިން ސަމާލުވުމަށް ޚާރިޖީ ވުޒާރާއިން އިލްމާސް ކޮށްފައި ވަނީ ދަތުރުފަތުރުކުރުމުގައި ބައެއް ފިޔަވަޅުތައް އެޅުމަށް އީޔޫ ކައުންސިލުން ނިންމާފައި ވާތީއެވެ. އީ.ޔޫ. ކައުންސިލުން މިމަހު 17 ގައި ނިންމާފައިވާ ކަންތައްތަކުގެ ތެރޭގައި، އީ.ޔޫ.ގެ "އެކްސްޓަރނަލް ބޯޑަރސް" 30 ދުވަހަށް ބަންދުކުރުން ހިމެނެއެވެ. މިނިންމުމުގައި އީ.ޔޫ.ގެ ޤައުމުތަކަށް ނިސްބަތްވާ މީހުންނާއި ދިގުމުއްދަތަށް އީ.ޔޫ.ގެ ޤައުމުތަކުގައި ދިރިއުޅޭ ފަރާތްތައް އިސްތިސްނާވާނެކަމަށް ބަޔާންކޮށްފައިވާ ކަމަށް ޚާރިޖީ ވުޒާރާއިން ވަނީ ވިދާޅުވެފައެވެ.
ޤައުމުތަކުން އަޅައިފައިވާ ފިޔަވަޅުތަކާ ގުޅިގެން ދަތުރު ކުރުމުގައި ސަމާލުކަން ދޭންޖެހޭ އިތުރު ޤައުމުތަކުގެ ތެރޭގައި ރަޝިޔާއާއި ސްރީލަންކާއާއި މިސުރާއި އެކުވެރި އަރަބި އިމާރާތް (ޔޫއޭއީ) އާއި ވިއެޓްނާމާއި ކަޒަކްސްތާނާއި ބަގްލަދޭޝް އާއި އިނގިރޭސި ވިލާތާއި މެލޭޝިޔާ އާއި އެނޫން ވެސް ބަލި ފެތުރެމުންދާ ބައެއް ބައެއް ޤައުމުތައް ހިމެނެއެވެ.
ރަޝިޔާގެ ސަރުކާރުން ވަނީ އިއްޔެ އިން ފެށިގެން މެއި މަހުގެ ފުރަތަމަ ދުވަހާ ހަމައަށް، ބޭރު ޤައުމުތަކުގެ ޑިޕްލޮމަޓިކް އަދި ކޮންސިއުލާ އޮފީސްތަކުގައި މަސައްކަތްކުރާ ފަރާތްތައް ފިޔަވައި، އެހެން ބިދޭސީންނަށް އެ ޤައުމަށް އެތެރެވުން ވަގުތީގޮތުން މަނާކޮށްފައެވެ.
ސްރީލަންކާގެ ސަރުކާރުން އަޅަމުންގެންދާ ފިޔަވަޅުތައް އިތުރަށް ހަރުދަނާކުރުމުގެ ގޮތުން، ރޭ ފަތިހު، ސްރީލަންކާ ގަޑިން 4:00އިން ފެށިގެން ހުރިހާ ކެޓެގަރީ އެއްގެ ވިސާ ދޫ ކުރުން ވަނީ ވަގުތީގޮތުން ހުއްޓާލާފައެވެ.
މީގެ އިތުރުން އެއްވެސް ކެޓެގަރީއެއްގެ ވިސާ ލިބިފައި ހުއްޓަސް، މިހާތަނަށް މިއިން އެއްވެސް ވިސާއެއް ބޭނުންކޮށްގެން ސްރިލަންކާއަށް ދަތުރު ކޮށްފައިނުވާނަމަ، ރޭ ފަތިހު 4:00 އިން މިމަހު 25 ވަނަ ދުވަހުގެ ރޭ ލަންކާ ގަޑިން 23:59 އާ ހަމައަށް ވަނީ ސަސްޕެންޑް ކޮށްފައެވެ. އަދި އެއްވެސް ހާލަތެއްގައި ފަތުރުވެރިންނާއި ބިދޭސިން މި މުއްދަތުގެ ތެރޭގައި ސްރީލަންކާއަށް ދަތުރު ނުކުރެވޭގޮތަށް ވެސް ވަނީ ހަމަޖައްސައިފައެވެ.
މިސްރުގެ ސަރުކާރުން ވެސް ވަނީ މިއަދު މެންދުރު 12 އިން ފެށިގެން މިމަހު 31 ގެ ނިޔަލަށް، އެ ޤައުމުގެ އެއްވެސް އެއާޕޯޓަކުން އެއްވެސް ފްލައިޓެއް ދަތުރުކުރުން ވަގުތީގޮތުން ހުއްޓާލާފައެވެ. އެހެންކަމުން މި ދުވަސްތަކުގެ ތެރޭގައި މިސްރަށް ދަތުރުކުރަން ގަސްދުކުރާ ދިވެހިން ވެސް އެކަމަށް ސަމާލުވުމަށް ކާރިޖީ ވުޒާރާއިން ވަނީ އިލްތިމާސް ކޮށްފައެވެ.
އެކުވެރި އަރަބި އިމާރާތުގެ ސަރުކާރުން ވެސް ވަނީ މިއަދުން ފެށިގެން، ޑިޕްލޮމަޓިކް ޕާސްޕޯޓުތަކަށް ފިޔަވައި، އެހެން ޕާސްޕޯޓުތައް ގެންގުޅޭ ފަރާތްތަކަށް، އޮން-އެރައިވަލް ވިސާ ދިނުން ވަގުތީ ގޮތުން ހުއްޓާލާފައެވެ. އެހެންކަމުން ޔޫއޭއީއަށް ދަތުރުކުރަން ގަސްދުކުރާ ދިވެހިން މިކަމަށް ސަމާލުވުމަށް ޚާރިޖީ ވުޒާރާއިން ވަނީ އިލް ތިމާސް ކުރައްވައިފައެވެ.
ވިއެޓްނާމުން ވެސް ވަނީ މިމަހު 18 ވަނަ ދުވަހުގެ ދަންވަރު 00:00 އިން ފެށިގެން ފަތުރުވެރިންނާއި ބިދޭސީން އެ ޤައުމަށް ވަނުން މަނާކޮށްފައެވެ.
މި ދަނޑިވަޅުގައި ކޮންމެހެން ކުރަންޖެހޭ ދަތުރުތައް ފިޔަވައި، އެހެން ދަތުރުތައް ރާއްޖެއިން ބޭރަށް ނުކުރުމަށް ވެސް ޚާރިޖީ ވުޒާރާއިން އިލްތިމާސްކުރެއެވެ. އެކި ޤައުމުތަކުގައި މިވަގުތު ދިރިއުޅެމުންދާ ދިވެހިން އެ ޤައުމުތަކުގެ ސަރުކާރުތަކުގެ ނިންމުންތަކާއި އެންގެވުންތަކަށް ސަމާލުވުމަށް ވެސް ޚާރިޖީ ވުޒާއިން ވަނީ އެދިފައެވެ.
އަދި ރާއްޖޭން ބޭރަށް ދަތުރުކުރާ ދިވެހިންނާއި ރާއްޖޭން ބޭރުގައި ދިރިއުޅޭ ދިވެހިން، އެވުޒާރާގައާ އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަންގައި ރެޖިސްޓަރ ކުރުމަށްވެސް ވަނީ އިލްތިމާސްކުރައްވައިފައެވެ.
"ރާއްޖޭން ބޭރަށް ދަތުރުކުރާ ދިވެހިން ޓްރެވަލް އިންޝުއަރެންސް ހޯދުމަކީވެސް، ޚާއްޞަކޮށް މި ދުވަސްވަރު ވަރަށް ބޭނުންތެރި ކަމެއްކަމުގައި މި މިނިސްޓްރީއިން ފާހަގަކުރަމެވެ." ޚާރިޖީ ވުޒާރާއިން ބުނެފައި ވެއެވެ.
