ފާއިތުވި ޑިސެންބަރު މަހު ޗައިނާގައި ފެތުރެންފެށި ނުރައްކާތެރިި ނޮވެލް ކޮރޯނާ ވައިރަސް (ކޮވިޑް-19) ފެތުރޭ މިންވަރު އެގައުމުގައި ދަށްވާން ފަށާފައި ވާއިރު ދުނިޔޭގެ އެހެން ސަރަހައްދުގައި ކޮރޯނާ ވައިރަސްގެ ނުރައްކާ ދަނީ ބޮޑުވަމުންނެވެ.
އިއްޔެގެ ހާލަތަށް ބަލާއިރު ވައިރަސް އެންމެ ހަލުވިކޮށް ފެތުރި ގިނަ މީހުން މަރުވަމުންދާ ސަރަހައްދުތަކުގެ ތެރޭގައި ހިމެނެނީ ޔޫރަޕާއި، މެދު އިރުމައްޗެވެ. ޔޫރަޕްގެ އިޓަލީއާއި މެދު އިރުމަތީގެ އީރާނެވެ.
އިޓަލީން ހާމަކޮށްފައިވާ ގޮތުގައި ކޮރޯނާ ވައިރަސް ޖެހިގެން އެ ގައުމުގެ 11 މީހަކު ވަނީ މަރުވެފައެވެ. އަދި ވައިރަހަށް ޕޮޒިޓިވް މީހުންގެ އަދަދު ވަނީ 300 އަށް އަރާފައެވެ. އިޓަލީގެ އުތުރުގެ ބައެއް ސަހަރައްދުތައް ވޫހާން ސިޓީ ފަދައިން ކަރަންޓީނުކޮށްފައިވާ ކަމުގެ ޚަބަރުތައް ވެސް ދަނީ ލިބެމުންނެވެ.
"އަހަރުމެން މިދައްކަނީ ސަރަހައްދީ ރޮނގަށް ބެލުމެއް ނެތި ފެތުރެމުންދާ ވައިރަހެއްގެ ވާހަކަ." އިޓަރީގެ ހެލްތު މިނިސްޓަރޯ ރޮބަރްޓޯ ސްޕެރަންޒާ އިއްޔެ ވިދާޅުވިއެވެ.
އިޓަލީން ހާމަކުރި ގޮތުގައި ކޮރޯނާ ވައިރަސް ޖެހިގެން އެގައުމުން މަރުވި އެންމެންނަކީ ކުރިން އެހެން ބަލިތަކުގައި އުޅެމުން އައިސްފައިވާ އުމުރުން ދުވަސްވީ މީހުންނެވެ.
އިޓަލީގައި ހަލުވިކަމާއެކު ވައިރަސް ފެތުރެމުން ދިއުމާއެކު، ޔޫރަޕް ސަމާލުކަމަށް އައިސްފައިވާއިރު، ޔޫރަޕްގެ ގައުމުތަކުން އަދި ވަނީ ސަރަހައްދީ ރޮނގު ބަންދުކުރުމަށް ދެކޮޅުހަދާފައެވެ.
މެދުއިރުމަތީގައި ކޮރޯނާ ވައިރަސްގެ 'މަރުކަޒަކަށް' ވެފައިވާ އީރާނުގައި މިހާތަނަށް އެ ވައިރަސް ޖެހިގެން 15 މީހަކު ވަނީ މަރުވެފައެވެ. އީރާނުގައި ވައިރަހަށް ޕޮޒިޓިވް މީހުންގެ އަދަދު ސަތޭކައާއި ގާތްކުރާއިރު، ޕޮޒިޓިވް މީހުންގެ ތެރޭގައި ޑެޕިއުޓީ ހެލްތު މިނިސްޓަރާއި، ގާނޫނުހަދާ މަޖިލީހުގެ މެންބަރަކު ހިމެނެއެވެ.
އީރާނުގައި ހަލުވިކަމާއެކު ކޮރޯނާ ވައިރަސް ފެތެރެމުންދާއިރު މެދު އިރުމަތީގެ ގިނަ ގައުމުތަކަަށް އެ ވައިރަސް ގޮސްފައި ވަނީ އީރަނުންނެވެ. އިރާގު، ކުވޭތު، ބަހްރައިން، އޮމާން، ޔޫއޭއީ އަދި ލެބަނާނަށް ވަނީ އީރާނުން ދަތުރުކުރި މީހުންގެ ފަރާތުން ވައިރަސް ފޯރާފައެވެ. އެހެންކަމުން، ގިނަ ގައުމުތަކަކުން މިހާރު ވަނީ އީރާނުން އެގައުމުތަކަށް މީހުން އެތެރެވުން މަނާކޮށްފައެވެ.
އީރާނުގެ އަވަށްޓެެރިން ކަމުގައިވާ ގަލްފުގެ ގައުމުތަކުގެ ތެރެއިން ޤަޠަރާއި ސައޫދީ އަރަބިއްޔާއިން އަދި ކޮރޯނާ ވައިރަސް ފެނިފައި ނުވިޔަސް އެ ދެ ގައުމުންވެސް ވަނީ ރައްކާތެރިކަމުގެ ފިޔަވަޅެެއްގެ ގޮތުން އީރާނަށް ދަތުރުކުރުން މަނާކޮށްފައެވެ.
