މިމަހު 13 ވަނަ ދުވަހު މެލޭޝިޔާ މަގުން ރާއްޖެއިން އިންޑޮނޭޝިއާއަށް ދިޔަ 4 ދިވެއްސަކު އެގައުމުގެ ފުލުހުންގެ ބެލުމުގެ ދަށަށް ނުވަތަ ބަންދަށް ގެންދިޔުމަށްފަހު ދޫކޮށްލައިފިއެވެ.
ދިވެހި ފުލުހުން ވިދާޅުވީ އެމައުލޫމާތު އިންޑޮނޭޝިއާގެ ކަމާބެހޭ ފަރާތްތަކުން ހިއްސާ ކޮށްފައިވާ ކަމަށެވެ. އެހެންނަމަވެސް އެމީހުންނާ ބެހޭ އިތުރު އެއްވެސް މައުލޫމާތެއް ފުލުހުން އަދި ނުދެއްވައެވެ. އެމީހުން ބަންދުކުރި ސަބަބެއް ވެސް ހާމަ ކޮށްފައެއް ނުވެއެވެ.
އިންޑޮނޭޝިއާއިން ބަންދުކުރީ 34 އަހަރާއި 46 އަހަރާ ދެމެދު ގެ 4 ދިވެހީންނެވެ. "ހައްޔަރު ކޮށްފައިވަނީ 46 އަހަރާއި، 39 އަހަރާއި، 36 އަހަރާއި އަދި 34 އަހަރުގެ ދިވެހި ފިރިހެނުންކަމަށް ކަމާބެހޭ އިދާރާތަކުން ދިވެހި ފުލުހުންނަށް މަޢުލޫމާތު ލިބިފައިވޭ. މިހާރު މި 4 މީހުން ވަނީ ދޫކޮށްލާފައި،" ދިވެހި ފުލުހުން ވިދާޅުވިއެވެ. އެމީހުން ވަނީ ފެބުރުއަރީ 15 ވަނަ ދުވަހު އެނބުރި ރާއްޖެއަށް އައިސްފައި ކަމަށް ފުލުހުން ވިދާޅުވިއެވެ. ބަންދުކުރި މީހުންގެ ތެރޭގައި ރާއްޖޭގެ އިލްމުވެރިއަކުވެސް ހިމެނޭ ކަމަށް މައުލޫމާތު ލިބިފައިވެއެވެ. އެއީ ދަރުސް ދިނުމުގެ ހުއްދަ ބާތިލް ކުރި އިލްމުވެރިންގެ ތެރޭގައި ހިމެނޭ މީހެއް ކަމަށް ވެސް ވަނީ މައުލޫމާތު ލިބިފައެވެ. އެހެންނަމަވެސް ކަމާބެހޭ އެއްވެސް އިދާރާއަކުން އަދި މިކަން ކަށަވަރު ކޮށްދީފައެއް ނުވެއެވެ.
މިކަމާ ގުޅިގެން ފުލުހުން އިތުރަށް ބަލަންޖެހޭ ކަންކަން ދަނީ ބަލަމުންނެވެ.
