ލާމަރުކަޒީ ނިޒާމުގެ ތެރޭގައި އުޅެން އެމްޑީޑީޕީ ނޫން ބަޔަކަށް ނުވަތަ ޕާޓީއަކަށް ނޭނގޭނެ ކަމަށް އެމްޑީޕީގެ ނާއިބުރައީސް މުޙައްމަދު ޝިފާޒު ވިދާޅުވެއްޖެއެވެ.
އޭނާ މިހެން ވިދާޅުވީ އެމްޑީޕީ ތިލަދުންމަތީ އިރުވައި ކޮންފަރެންސް ގައި ވާހަކަ ދައްކަވަމުންނެވެ. އެކޮންފަރެންސްގައި އޭނާ ވާހަކަދެއްކެވީ ކުރީ ސަރުކާރުން "ލާމަރުކަޒީ ގާނޫނު އުލުބޭންދި" މައުޟޫއަށެވެ. ޝިފާޒު ވިދާޅުވީ ރައީސް ޔާމީންގެ ސަރުކާރުގައި މަސައްކަތް ކުރައްވާފައިވަނީ ކޮންމެ ކައުންސިލެއްގެ ވެސް ޒިންމާދާރުވެރިޔާ (ޒެޑުވީ) މެދުވެރިކޮށް ރައީސް ޔާމީން ބޭނުންފުޅުވާ ކަމެއް ކުރައްވަން ކަމަށެވެ. އޭރު އެމްޑީޕީގެ ކައުންސިލެއް އޮތަސް ޒިންމާދާރުވެރިއަކަށް ލައްވާފައި ހުންނަވަނީ ރައީސް ޔާމީންގެ އެޖެންޓެއް ކަމަށް ވެސް އޭނާ ވިދާޅުވިއެވެ.
ޝިފާޒު ވިދާޅުވީ ލާމަރުކަޒީ ނިޒާމުގެ ތެރެއަށް ޕީޕީއެމް ވަނީ މަޖުބޫރުވެގެން ކަމަށެވެ. "މިނިޒާމުގެތެރޭގައި ޕީޕީއެމްގެ ބޭފުޅުންނަކަށް ވެސް، އަދި އެމްޑީޕީނޫން އެއްވެސް ބަޔަކަށް އުޅޭކަށް ނޭނގޭނެ. ސިޔާސީ ޕާޓީ ހިންގާކަށް ވެސް ނޭނގުނު އެމްޑީޕީ ނޫން އެހެން އެއްވެސް ބަޔަކަށް،" ޝިފާޒު ވިދާޅުވިއެވެ. އޭނާ ވިދާޅުވީ ސިޔާސީ ޕާޓީތައް ވެސް އުފައްދާ ހިތުން އުފެއްދީ އެމްޑީޕީން އެކަނި ކަމަށެވެ. އެމްޑީޕީން އެކަންކުރި އިރު އެހެން އެންމެން ތިބީ އެކަމާ ދެކޮޅުހަދައިގެން ކަމަށް ވެސް އޭނާ ވިދާޅުވިއެވެ.
ސިޔާސީ ޕާޓީތައް ވެސް ހަދާ ހިތުން ހެދީ އެމްޑީޕީން ކަމަށާއި އެހެންނަމަވެސް މަޖުބޫރުވެގެން ސިޔާސީ ޕާޓީތައް ހެދި އެއްވެސް ބަޔަކަށް ޕާޓީ ނުހިންގޭނެ ކަމަށް އޭނާ ވިދާޅުވިއެވެ. "އެމްޑީޕީން މިނިޒާމު އުފެއްދީމައި މަޖުބޫރުވެގެން ސިޔާސީ ޕާޓީހެދި ބަޔަކަށް ޕާޓީ ނުހިންގޭނެ. ލާމަރުކަޒީ ނިޒާމުވެސް އަޅުގަނޑުމެންގެ ފިކުރެއްގެ ގޮތުގައި އޭރު ރައްޔިތުންގެ ޚާއްސަ މަޖިލީހުގައި ތިއްބެވި އިއްޒަތްތެރި މެމްބަރުން ކުރެއްވި ބުރަ މަސައްކަތުން އަޅުގަނޑުމެންނަށް ލިބުނީމާ ދެން އެހެން ގޮތެއް ނެތިގެން މީގެތެރެއަށް (ޕީޕީއެމް) ވަނީ،" ޝިފާޒު ވިދާޅުވިއެވެ.
