އދ. ގެ ސަލާމަތީ މަޖިލީހުގެ ގޮނޑި ދިވެހިރާއްޖެއަށް ކާމިޔާބު ކުރުމުގެ ފުރުސަތު ފަހިވަމުން ދަނިކޮށް ރައީސް ޢަބްދުﷲ ޔާމިންގެ ސަރުކާރުން މިވަނީ އެފުރުސަތު ހުތުރުގޮތަކަށް ނަގާލައިފައިކަމަށް އެމްޑީޕީން ބުނެފިއެވެ.
ގޮނޑި ކާމިޔާބު ނުވުމުން އެކަމާ ކަންބޮޑުވުން ފާޅުކޮށް އެޕާޓީން ނެފައިވާ ބަޔާނެއްގައި ބުނެފައިވަނީ ގޮނޑި ކާމިޔާބު ނުވުމުން އެކަމާ ކަންބޮޑުވާ ކަމަށެވެ. "މިފަދަ ބޮޑު ފަޟީހަތެއްވުމުގެ ސަބަބުތަކުގެ ތެރޭގައި މި ސަރުކާރުން އދ. ގެ މުއާހަދާތަކާއި ޤަރާރުތަކަށް ބޯނުލެނބުމާއި، ބައިނަލްއަޤުވާމީ ހަމަތަކާއި މިންގަނޑުތަކުން ނެއްޓެމުންދިއުމާއި، ރައީސް މުޙައްމަދު ނަޝީދާއި އެނޫން ވެސް ބައެއް ސިޔާސީ ފަރާތްތައް މިނިވަންކުރުމަށް ގޮވާލާ އދ. ގެ ގުނަންތަކުން ނިންމާފައިވާ ނިންމުންތަކަށް އިޙްތިރާމް ނުކުރުމާއި، ރާއްޖޭގެ ރައްޔިތުންގެ އިންސާނީ ޙައްޤުތަކަށް ފާޅުގައި އަރައިގަންނަމުންދާދިއުން ހިމެނޭކަން ކަށަވަރެވެ. ހަމަ އެފަދައިން ބައިނަލްއަޤުވާމީ ދުނިޔެއާ ގުޅުން ކެނޑުމުގެ ދޯހަޅި ސިޔާސަތު ގެންގުޅުމާއި، އިންޑިއާ ކަނޑުގެ ހަމަޖެހުން ނަގާލުމުގެ ޢަމަލުތައް ހިންގުމާއި، ދީނުގެ ނަމުގައި އެކި ޤައުމުތަކަށް ހަނގުރާމައަށް ދާ ދިވެހިން އުފައްދާ ތަނަކަށް ރާއްޖެ ހަދައި، ހަރުކަށި ފިކުރުތަކަށް ޖާގަދިނުމާއި، ކަޅުފައިސާ ދޮވުމާއި ސަރުކާރުން ހިންގާފައިވާ ބޮޑެތި ވައްކަންތަކާއި ޚިޔާނާތުގެ ޖަރީމާތައް ހިމެނޭކަން ވެސް ކަށަވަރެވެ." އެ ބަޔާނުގައި ބުނެފައިވެއެވެ.
އެޕާޓީން ބުނެފައިވަނީ މިފަދަ ކަންކަމަށް ބަލާއިރު މިސަރުކާރަކީ ބައިނަލްއަޤުވާމީ ދުނިޔެއާއި ދިވެހިރާއްޖެއާ ދެމެދު އޮންނަންޖެހޭ ގުޅުމުގެ ތެރެއިން ރާއްޖެއަށް ލިބެން ހުންނަ މަންފާތަކާއި ކުރިއެރުންތަކުގެ އެއްވެސް އުއްމީދަކާ ގުޅިފައިވާ ސަރުކާރެއް ނޫން ކަމަށެވެ.
މިސަރުކާރުގެ ޚާރިޖީ ސިޔާސަތަކީ ބައިނަލްއަޤުވާމީ ހަމަތަކުން ނެއްޓި، ކުފޫހަމަނުވާ ޚާރިޖީ ސިޔާސަތެއް ކަމަށާއި، ރައީސް ޔާމިނުގެ ސަރުކާރުން އދ.ގެ ސަލާމަތީ މަޖިލީހުގެ މެމްބަރުކަމަށް ދިވެހިރާއްޖެ ވާދަކުރުވައި މުޅި ދުނިޔޭގެ ކުރިމަތީގައި ދިވެހިރާއްޖެ ފަޟީހަތް ކޮށްފައިވާ ކަމަށްވެސް އެމްޑީޕީން ބުނެފައިވެއެވެ.
"އދ. ގެ ސަލާމަތީ މަޖިލީހުގެ މެމްބަރުކަން ހޯދުމަށް ދިވެހިރާއްޖެއަށް އެންމެ ބޮޑު ފުރުސަތެއް ލިބުނު މި ފަހަރުގައި، އޭޝިޔާ ޕެސިފިކް ސަރަޙައްދުން އިންޑޮނޭޝިޔާއާއެކު ދިވެހިރާއްޖެ ވާދަކޮށް ނާކާމިޔާބުވެފައިވަނީ ހައިރާންކުރުވަނިވި ނަތީޖާއަކުންނެވެ. 144 ޤައުމަކުން އިންޑޮނޭޝިޔާއަށް ވޯޓުދީފައިވާއިރު، ދިވެހިރާއްޖެއަށް ލިބިފައިވަނީ އެންމެ 46 ވޯޓެވެ. އިންޑޮނޭޝިޔާ މީގެ ކުރިން ސަލާމަތީ މަޖިލީހުގެ މެމްބަރުކަމަށް 3 ފަހަރެއްގެ މަތިން ހޮވިފައިވުމުގެ ސަބަބުން، އައު ޤައުމަކަށް މި ސަރަޙައްދުން އެ ފުރުސަދު ލިބުމަކީ ވަރަށް ގާތްކަމަކަށްވީ ނަމަވެސް ދިވެހިރާއްޖެ އެވަނީ ބޮޑުތަނުން ނާކާމިޔާބާ ކުރިމަތިލާފައެވެ. އަދި މި ނާކާމިޔާބު ލިބިފައިވަނީ އެކަމަށްޓަކައި ވަރަށް ބޮޑެތި ޚަރަދުތަކެއް ދައުލަތުންކޮށް، ދިގު މުއްދަތަކަށް ވަރަށް ބޮޑަށް ކޭމްޕޭން ހިންގައި، އަދި ސަރުކާރުގެ ޔަޤީންކަން އޮތް މިންވަރުގެ ވާހަކަ ވަރަށް ބޮޑަށް ފަތުރާފައިވަނިކޮށެވެ." އެބަޔާނުގައި ވެއެވެ.
މިސަރުކާރު އޮވެގެން ލަދުގަންނަވަރުގެ ނާކާމިޔާބެއް ދިވެހިރާއްޖެއަށް ލިބިފައިވާއިރު، އެމް.ޑީ.ޕީ ސަރުކާރުގައި 2009 ވަނަ އަހަރު އދ.ގެ އިންސާނީ ޙައްޤުތަކާބެހޭ މަޖިލީހަށް ދިވެހިރާއްޖެ ވާދަކޮށް ކާމިޔާބުކޮށްފައިވަނީ ރެކޯޑު އަދަދެއްކަމަށްވާ 185 ވޯޓުން ކަމަށްވެސް އެޕާޓީން ވަނީ ބުނެފައެވެ. އަދި އެއަށްފަހު މަސައްކަތްކުރަމުން ދިއައީ ސަލާމަތީ މަޖިލީހުގެ ގޮނޑި ވެސް ކާމިޔާބުކުރުމަށް ކަމަށް ބުނެފައިވެއެވެ.
